Génesis 25

Abraham aptawán'ák neptámen tén han Queturá

(1 Cr 1.32-33)

1Aptegyeykekxeyk axta makham mók aptáwa' Abraham, ekwesey axta Queturá. 2Keso apketchek ekwetasso axta s'e: Zimrán, Jocsán, Medán, Madián, Isbac, tén han ma'a Súah. 3Jocsán axta apketchek ma'a Sebá tén han Dedán, Dedán aptawán'ák neptámen axta m'a asureos, letuseos, tén han leumeos. 4Keso Madián axta apketchek se'e: Efá, Éfer, Hanoc, Abidá, tén han ma'a Eldaá. Queturá axta atawán'ák natámen xa apyókxoho nak. 5Isaac axta apkelxaweykekxak ekyókxoho aqsok apagkok axta m'a Abraham. 6Aqsok apkelmésso naqsa axta aqsa apkelmeyáseykegkok Abraham ma'a mók apnaqteyegka'a étchek nak, apyetnakhassegkek axta eyke apketche Isaac, apyennaqtamakxa axta makham, apcháphassama m'a yókxexma ekteyapmakxa ekhem.

Abraham apketsapma tén han kélátawanye

7Ciento setenta y cinco apyeyam axta weykmok apha Abraham, 8apwányamók apagko' axta han aptemék apketsapma, appáxaqweykekxeyk axta m'a apyapmeyk nano' axta. 9Apchátawanyeyk axta apketchek, cham'a Isaac tén han Ismael ma'a meteymog áxwa nak Macpelá, ekpayho nak ekteyapmakxa ekhem teyp Mamré, xapop apagkok axta m'a Efrón, apketche axta Sóhar, aptáha nak hitita. 10Cháxa Abraham axta han apma xa xapop nak, apagkok axta m'a hititas. Axta kélátawanyak han Abraham ma'a, ekyetnamakxa axta aptáwa' Sara. 11Aptaqmelchessessek axta apha Dios Isaac natámen axta apketsapma Abraham, apheykmo axta m'a nekha yámelchet ekwesey nak “Memassegwayam tén han seté.”

Ismael aptawán'ák neptámen

(1 Cr 1.28-31)

12Keso apketchek axta Ismael se'e, Abraham axta apketche, tén han ma'a Agar, Sara axta eyásenneykha naqsa m'a kelán'a nak Egipto, 13ektémakxa axta chá'a appalleyam: Nebaiot axta apketche átnaha apketkok, tén axta m'a Quedar, Adbeel, Mibsam, 14Mismá, Dumá, Masá, 15Hadar, Temá, Jetur, Nafís, tén han Quedmá. 16Cháxa apkelwesey axta doce apketchek ma'a Ismael, cháxa apkelwesey axta han kéltemessáseykekxo axta han chá'a élwesey m'a xapop apagkok, tén han ma'a apheykegkaxa nak. Xama axta han chá'a apkemha apmonye' apagkok ektáhakxa nak chá'a énxet'ák apagkok.

17Ciento treinta y siete apyeyam apagkok axta weykmok Ismael apketsapma. Appáxaqweykekxeyk axta apyapmeyk nano'. 18Apkelheykmek axta aptawán'ák neptámen ma'a teyp nak yókxexma Havilá, halep nak Sur, keto' nak Egipto, ámay ekmahéyak nak Asiria. Axta apkelheykmok ma'a neyseksa axta eykhe megkalmopmenyého m'a apnámakkok.

Esaú aptéyam tén han Jacob

19Keso ektémakxa axta apha Isaac se'e, Abraham axta apketche. 20Cuarenta apyeyam apagkok axta weykmok Isaac apmoma axta m'a Rebeca, Betuel axta apketche, Labán axta apyáxa', énxet'ák arameos, apheykencha'a axta m'a Padán-aram. 21Megkate étche axta han ma'a Rebeca, keñe axta Isaac apkelmaxnéssessama Wesse' egegkok ma'a. Aplegayak axta han apkelmaxnagko Wesse' egegkok, keñe axta ektéma lóso' ma'a Rebeca. 22Xama axta ekyekpelchama aptéma apqánet étchek ma'a Rebeca, tén han apkelnápomákpo chá'a kañe' awáxok, keñe axta élchetama awáxok. “Temék sa' agkok xa ektáha nak, tásek watsapok.” Keñe axta ekya'aweykxo Wesse' egegkok éltamho kay'asagkohok ektáhakxa'. 23Aptáhak axta apchátegmowágko s'e:

“Ánet apchókxa

pók aptémakxa

énxet'ák hágkok

kañe' awáxok.

Apqánet énxet

apkelnápékpok

amonye' appalleyam.

Xama sa' etnehek

apyennaqte apagko',

mexók sa' ma'a pók nak,

apchásenneykha sa'

etnehek átnaha

apketkok ma'a

apsexyo nak.”

24Wokmek axta ekhem yaqwánxa katnehek naqláwa Rebeca, wet'ak axta apqánet appalleykmoho étchek. 25Ekyexwase apwa' axta m'a apmonye' aptéyam, sawheykekxók axta áwa' apyempehek, Esaú axta kéltemessásak apwesey. 26Keñe axta apteyekmo han ma'a apyáxeg, apmásseságkek axta apáhak ma'a Esaú, axta keñamak kélteméssesa apwesey Jacob. Sesenta apyeyam apagkok axta weykmok Isaac, ektéma axta naqláwa m'a Rebeca.

Esaú apyenyeykekxa ektémakxa axta apteme átnaha apketkok

27Apkektegkek axta xa wokma'ák apketkók nak, ekmátsa eweynchamha yókxexma axta han aptemék ma'a Esaú, apmopwána enempaqwók, keñe axta Jacob aptéma xama énxet meyke appekhe, atsek axta aqsa exek ma'a appakxanma nak. 28Axta han apchásekhayókxa apagko' Isaac ma'a Esaú, hakte apmenyeyk axta chá'a etwok ma'a aqsok apchaqhe apnempaqwayam, keñe axta Rebeca ekpeheweykmo eyásekhayo m'a Jacob.

29Xama ekhem axta apwákxo Esaú apyampayo apkenyekto m'a yókxexma, chaqhawók axta han aphanakxa apto m'a Jacob 30aptáhak axta apcháneya s'e:

—Heyák han ko'óxa xa aphanma ekyexwásamo nak, meyk agko' ko'o etnahak. (Cháxa keñamak apkeltamhomakpo nak Edom ma'a Esaú.)

31—Hegkés sekxók ko'o apteme nak átnaha apketkok kélketche —axta aptáhak apchátegmowágkokxo m'a Jacob. 32Tén axta Esaú aptáha s'e:

—Meyk agko' ko'o etnahak, mehepasmehek ko'o ektémakxa nak sekteme kélketche átnaha apketkok.

33—Hetnésses naqso' peya hegkések se'e kaxwo' nak —axta aptáhak ma'a Jacob.

—Apkelyahákxók axta han ma'a Esaú, apmeyásekxeyk axta Jacob ma'a ektémakxa nak apteme kélketche átnaha apketkok. 34Tén axta Jacob apmésa kelpasmaga m'a Esaú, yetlo m'a aphanma yágkeleyke aktek. Xama axta appenchesa apto Esaú, tén han apyá, apkempákxeyk axta néten apxega, meyke ekyetnakhayo apwáxok apteme kélketche átnaha apketkok.

Currently Selected:

Génesis 25: ENXBI

Highlight

Copy