Génesis 15

Dios apkelane ekhémo mók apkelpaqhetchásamákpoho Abram

1Appaqhetchessek axta Wesse' egegkok Abram natámen xa, apwanmagko axta eyke, aptáhak axta apcháneya s'e:

—Abram, nágyé aqsa, ko'o sekteme sekmasma exchep, awanhek sa' katnehek ekyaqmageykekxa aqsok yaqwayam exkak xép.

2-3Aptáhak axta apchátegmowágko Abram se'e:

—Dios Wesse' ahagkok ¡Kaqhók eyke ko'o hegkések ma'a aqsok peya nak hegkések, hakte méko ko'o étchek! Séláneykha Eliézer, apkeñama nak Damasco, sa' elxewekxak ma'a ekyókxoho aqsok ahagkok nak, hakte mehegkéssók ko'o exchep xama hatte.

4Aptáhak axta Wesse' egegkok apchátegmowágko s'e:

—Apketche apagko' sa' elmekxak ma'a aqsok apagkok nak xép, háwe sa' pók énxet.

5Keñe axta Wesse' egegkok aptekkesa yókxexma Abram. Aptáhak axta apcháneya s'e:

—Yenmexho sa' néten, elyetset sa' yaw'a, apkepwagko enxoho elyetsetek. Sa' exhok apxámokma exchep aptawán'ák neptámen xa.

6Axta ey'ássekmok Abram Wesse' egegkok, axta keñamak apma takha' Wesse' egegkok apxéna aptáha appéwomo xa. 7Keñe axta aptáha apcháneya s'e:

—Ko'o sekteme Wesse' apagkok, ko'o axta sektekkesso exchep ma'a Ur yókxexma apagkok nak caldeos, yaqwayam agkések se'e xapop nak, yaqwayam etnehek apagkok.

8Keñe axta aptáha apchátegmowágko s'e, —Dios Wesse' ahagkok ¿háxko atnehek ko'o ay'asagkohok peya atnehek ahagkok se'e xapop nak? —axta aptáhak apchátegmowágko Abram.

9Aptáhak axta Dios apchátegmowágko s'e:

—Héntegkásenta ko'o xama weyke étkok kelwána, tén han xama yát'ay, tén han xama nepkések apkennawo' ekweykmoho nak chá'a apqántánxo apyeyam apagkok, tén han xama sapop, tén han xama wáx'ay apketkok.

10Apnaqlántegkessek axta Abram Dios xa ekyókxoho aqsok kélnaqtósso nak, apyepteyk axta chá'a neyseksa apkenmexcháseykxo mók ma'a appáxqatma nak, keñe axta náta mepáxqata chá'a neyseksa. 11Appallénteyk axta chá'a máma ekhágkaxa apák ma'a aqsok kélnaqtósso, apmenxenchek axta eyke chá'a Abram. 12Xama axta peya kayaqtések, aptenchek axta Abram ekyentaxno agko', yetlókok axta nahan eyáhapwe ekyaqtessóxma ekyentaxno agko', apchekawók apagko' axta nahan. 13Tén axta Wesse' egegkok aptáha apcháneya s'e:

—Kéméxcheyk ey'asagkohok xép peya exmakha aptawán'ák neptámen ma'a megkatnahakxa nak apchókxa, sa' etnahagkok kélásenneykha naqsa m'a, cuatrocientos apyeyam sa' kammok kélnaqtawáseykegkoho. 14Allegássesagkohok sa' eyke ko'óxa m'a énxet'ák peya nak etnehek apkelásenneykha naqsa, keñe sa' kólchexeykxak ma'a aptawán'ák neptámen nak, elántépok sa' yetlo ekxámokma aqsok apagkok. 15Yetsapok sa' eyke exchep meyke ektemegweykmoho exma, aptáha enxoho apwányamo', epáxaqwakxak sa' ma'a apyapmeyk nano' axta. 16Apkelántépeykxeyk sa' agkok ma'a aptawán'ák neptámen ekwokmo enxoho cuatro apkelántépeykekxa, elmeyenták sa' makham se'e xapop nak, megkayagwánxa nak makham élmasagcha'a apkeltémakxa amorreos.

17Xama axta ektaxna ekhem, yáqtéssek axta, tekkek axta xama táxa axagkok, pánchessek axta, weynchámeyha axta han neyseksa m'a yámet eyáléwe ekhágkaxa axta m'a aqsok kélnaqtósso ápetek kélpáxqatma neyseksa. 18Cháxa ekhem apkelanakxa axta han ekhémo mók apkelpaqhetchásamákpoho Wesse' egegkok ma'a Abram. Aptáhak axta apcháneya s'e:

—Agkések sa' ko'o aptawán'ák neptámen se'e xapop nak, eyeynamo m'a wátsam nak Egipto, ekweykekxoho m'a wátsam ekyawe nak Éufrates, 19xapop apagkok nak ma'a quenitas, tén han quenizitas, tén han ma'a cadmoneos, 20tén han hititas, tén han ferezeos, tén han ma'a refaítas, 21tén han amorreos, tén han cananeos, tén han gergeseos, tén han ma'a jebuseos.

Currently Selected:

Génesis 15: ENXBI

Highlight

Copy