Génesis 10
10
Noé aptawán'ák neptámen
(1 Cr 1.5-23)
1Keso Sem, Cam tén han Jafet axta aptawán'ák neptámen, Noé axta apketchek. Apkelweteyak axta apketchek apancha'awók natámen axta yegmen ekyawe.
2Keso Jafet axta apketchek se'e: Gómer, Magor, Madai, Javán, Tubal, Mésec, tén han Tirás. 3Keso Gómer axta apketchek se'e: Asquenaz, Rifat, tén han Togarmá. 4Keso Javán axta apketchek se'e: Elisá, Tarsis, Quitim, tén han Rodanim. 5Cháxa Jafet axta aptawán'ák neptámen xa, apheykencha'a axta neyáwa wátsam ekwányam. Apagkok apagko' axta han chá'a xapop, ektáhakxa nak chá'a apnámakkok apancha'awo', apkelpeywa apancha'awo' axta han chá'a xama apheykegkaxa'.
6Keso Cam axta apketchek se'e: Cus, Misraim, Fut, tén han ma'a Canaán. 7Keso Cus axta apketchek se'e: Sebá, Havilá, Sabtá, Raamá, tén han ma'a Sabtecá, keñe axta Raamá apketchek se'e: Sebá, tén han Dedán. 8Cus axta apyáp ma'a Nimrod, apteme axta apteyapma apmonye' énxet ekha apyennaqte keso náxop, 9Nimrod axta apteme apmopwána enempaqwók, hakte Wesse' egegkok axta apmopmenyého etnehek xa ektáha nak. Cháxa ekteyapmakxa axta s'e ektéma nak amya'a: “Exho Nimrod, apteme axta apmopwána enempaqwók eñama apmopmenyého etnehek ma'a Wesse' egegkok.” 10Axta sekxók tegma apkelyawe aptémakxa wesse' apwányam ma'a Babel, Érec, Acad, tén han ma'a Calné, cham'a yókxexma nak Sinar. 11Cháxa yókxexma apkeñamakxa axta han apmaheykegko m'a Asur, apkelánegweykmo axta han ma'a tegma apkelyawe nak Nínive, Rehobot-ir, Quélah, 12tén han ma'a tegma apwányam nak Resen, apyetnama nak neyseksa halep Nínive tén han teyp Quélah.
13Misraim axta apkeleñamak apkelánteyapma m'a ludeos, anameos, lehabitas, naftuhítas, 14patruseos, casluhítas, tén han caftoritas, cháxa apkeleñama axta m'a filisteos.
15Canaán axta apyáp ma'a Sidón, apmonye' apwete apketche axta, tén han ma'a Het. 16Canaán axta apkeleñamak apkelánteyapma m'a jebuseos, amorreos, gergeseos, 17heveos, araceos, sineos, 18arvadeos, semareos, tén han hamateos. Tén axta apkexpánma apyókxoho m'a Canaán axta apnámakkok. 19Weykmok axta xapop apagkok énxet'ák Canaán ma'a yókxexma nak Guerar, eyeynamo m'a tegma apwányam nak Sidón, ekweykekxoho m'a tegma apwányam nak Gaza, ekmeyeykekxa nak ma'a tegma apkelyawe Sodoma tén han Gomorra, Admá, tén han Seboím, ekweykekxoho m'a tegma apwányam nak Lesa. 20Keso ektáha axta chá'a Cam aptawán'ák apagko' se'e, apagkok apagko' axta han chá'a xapop, ektáhakxa nak chá'a apnámakkok apancha'awo', apkelpeywa apancha'awo' axta han chá'a xama apheykegkaxa'.
21Apweteyak axta han apketchek ma'a Sem, apepma axta m'a Jafet, Sem aptawán'ák neptámen axta m'a apyókxoho nak Éber apketchek. 22Keso Sem apketchek axta s'e: Elam, Asur, Arfaxad, Lud, tén han Aram. 23Keso Aram apketchek axta s'e: Us, Hul, Guéter, tén han Mas. 24Arfaxad axta apyáp ma'a Sélah, keñe Éber apyáp ma'a Sélah. 25Keñe axta apweteya apqánet apketchek ma'a Éber, xama apwesey axta Péleg, hakte apkexpánchesamakpek axta apheykha énxet'ák ma'a aphamakxa axta; Joctán axta han apwesey m'a Péleg nak apyáxeg. 26Joctán axta apyáp ma'a Almodad, Sélef, Hasar-mávet, Jérah, 27Hadoram, Uzal, Diclá, 28Obal, Abimael, Sebá, 29Ofir, Havilá, tén han Jobab. Cháxa Joctán apketchek axta xa apyókxoho nak. 30Axta apheykha m'a xapop eyeynamókxa nak yókxexma Mesá, ekweykekxoho m'a Sefar, cham'a yókxexma élámhakxa nak meteymog ekpayho nak ekteyapmakxa ekhem. 31Cháxa ektáha axta Sem aptawán'ák neptámen xa. Apagkok apagko' axta han chá'a xapop, ektáhakxa nak chá'a apnámakkok apancha'awo', apkelpeywa apancha'awo' axta han chá'a xama apheykegkaxa'.
32Cháxa ektáha axta Noé apketchek apnámakkok apancha'awo' xa, ektáhakxa axta chá'a apnámakkok apancha'awo tén han aptawán'ák neptámen, keñe han xapop apagkok apagko'. Apkexpánmeyk axta ekyókxoho yókxexma keso náxop, natámen axta yegmen ekyawe, apxámáseykekxeyk axta pók aptémakxa énxet'ák keso náxop.
Currently Selected:
Génesis 10: ENXBI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Enxet Lengua Sur Bible © Paraguayan Bible Society, 2015.