Mâki 6

Dí dípôlu tɔ̀ɔ Zîsɛ ma Nâzarɛ

(Maafîu 13:53-58; Lûu 4:16-30)

1Zîsɛ è kùla naa é lí bɔ́-taai ŋɔpôlu-ƃelai dí lɛ́ɛ bôlu. 2Vii-tɔɔ-ɣelei ma, è kɛ̀ Ɣâla-mɛni lɛ̂i Ŋ̀âla fɛli-kerei mu. Nûa támaa dí kɛ̀ naa. Ŋ̀óo mɛniɛɛ dîɛi, dípɛlɛ è pù, dîyɛɛi, “Mí ƃé ǹalôŋ ŋí è mɛni-ŋai ŋí kùla naai? Lé tàre ƃé ní gáa ǹyêei? Lé ŋɛi-kɛ-maa mɛni kpaya-kpaya-ŋa ƃé ŋí a gɛ̀i! 3Kɛrɛ̂e, ŋ̀úru saa-nuui ƃé ŋí, Mere ǹóŋ? Zĩi, Zosɛ, Zudasi, da Samaŋ dílîai? Ǹêɣe-nɛyaa-nɛyaai dífe kúkɔlɛ ma ƃɛ́ máŋ?” Dífe díyee seêni ŋɔsɛŋ lɛ́ɛi mu. 4Nya ƃe Zîsɛ è mò dîa ǹyɛɛi, “Ƃâa káa Ɣâla ŋɔlóno kɛ́-ƃela dîa kwaa kélee ma. Kɛ́lɛ, dílɔii su fêi, dípɔ-bɔrɔŋ kpaa máŋ dínûai sáma.” 5Vé pɔ̂ri ní kɛ̀ ma é mɛni kpaya-kpaya kɛ̂ naa. È ǹyée pɛ̀lɛ nɔ́ kɛ̀ kɔlɔ-fela-ƃela tɛi-tɛi dîa, díƃalo. 6Ǹíi è tòo pôlu kpɔ́ a ŋ̀ánaa, kpɛ́ni fêi, laa-la fé kɛ́ ní kɛ̀ ǹûai yêei a dɔnɔ kpîŋ.

Zîsɛ ŋɔpôlu-ƃela puu kao feerɛi dítii

(Maafîu 10:5-15; Lûu 9:1-6)

7Zîsɛ è ŋɔpôlu-ƃela puu kao feerɛi tòli kwaa tɔnɔ ma. È wala-wala-laa tɛ̀ɛ dípɔ nyînaŋ nyɔ́mɔɔ-ŋa mɛi, é dítɛɛ feerɛ-feerɛ. 8È mò dîa ǹyɛɛi, “Káfe lì a sɛŋ da kélee kásiai ma fɛ̂ɛ nɔ́ tṹaŋ. Káfe lì máŋ a kpólo, kolâ, kpaa máŋ sɛŋ-kâo Kábɛ̂bɛ-ŋai su. 9Ka kákpâŋkpali-ŋai lɔ́, kɛ́lɛ káfe lì a yɛkɛ feerɛ.” 10È mò dîa ŋɔ́nɔ ǹyɛɛi, “Bɛ́rɛi kélee da pâi kálaâi kulâi m̀ui, ka lɛɛ naa é lɛ́ɛ la zu ká kpɛ́ɛ m̀ɛnii ma ká lì gɛ̂i daai kpîŋ sui. 11Kà lì kwaa da ma ɣâla-woo ƃôi da wàla díyee sée kámu, kpaa máŋ dí díwoli tɔ́ɔ kâa, ka kúla maa kwaai ma. Kà kɛ̀ kulâi naa, ka muluŋ kpɛ́mɛŋ kákɔɔ ŋá. Muluŋ ƃé pâi kɛ̂i a kásêre.” 12Nya ƃe dí kùla naa dí li, díkɛ Ɣâla-woo ƃo, a gɛ́ɛ núu kélee é ǹíi pene. 13Dí nyînaŋ nyɔ́mɔɔ támaa kpɛ̀ nûa pôlu, dí ɔle wúlɔ sía gɔlɔ-fela-ƃelai dîa dí díƃalo.

Batâi-kɛ-nuui Zɔ̂ŋ saa pere

(Maafîu 14:1-12; Lûu 9:7-9)

14Gâloŋ Ɛɛlɔ è Zîsɛ maa tuŋ m̀ɛni, kpɛ́ni fêi, duŋ ŋí è tàa-taa kwaa kélee ma. Ǹûai da-ni dí kɛ̀ m̀ôi dîyɛɛi, “Batâi-kɛ-nuui Zɔ̂ŋ a m̀u siɣe saa yêei. Ŋɛi-kɛ-maa támaa maa wala-wala-laa káa ǹyêei.” 15Ǹûai da-ŋa dí mò dîyɛɛi, “Gáa a Ilaiza.” Gbeli-ŋai dîyɛɛi, “Gáa yɛ̂ɛ Ɣâla ŋɔlóno kɛ́-ƃelai wɔlɔ-wɔlɔ kɛ̂i dɔnɔ.” 16Ɛɛlɔ kɛ́ɛ a mɛ̀nii ŋí ḿɛnii, è mò ǹyɛɛi, “Zɔ̂ŋ, nyii ŋá ŋ̀uŋ tèei, a m̀u siɣe saa yêei.” 17È m̀ɛnii ŋí ƃò, kpɛ́ni fêi, è núu tɛ̀ɛ a ɣele tɔnɔ da è wólo Zɔ̂ŋ ma é ŋ̀iri é bìli kpini-pɛrɛ mu ǹêɣe Fele ŋɔnɛnîi Ɛlodia mɛni ma nyíi è zìɣe é gɛ́ a ŋɔnɛnîi. 18Zɔ̂ŋ è m̀ɛnii ŋí ƃò Ɛɛlɔ ma ǹyɛɛi, “Vé dɔ̂ŋ lá-woo ma a gɛ́ɛ í ílêɣe ŋɔnɛnîi síɣe í gɛ́ a ílaa pôlu nɛnî.” 19Ɛlodia è Zɔ̂ŋ wóo tí pìli ǹíi su, gɛ́ ŋ̀wɛ̂li é bàa. Kɛ́lɛ, vé pɔ̂ri ní kɛ̀, 20kpɛ́ni fêi, Ɛɛlɔ è yào Zɔ̂ŋ ma. E gɔ̀lɔŋ a gɛ́ɛ è kɛ̀ a núu sã́a, gɛ́ ƃo a núu maa waa. Vé mɛni da kɛ́ ní la. Ɛɛlɔ a kâa ŋ̀wɛli é ŋ̀óli tɔ́ɔ ma a tãi kélee a kɛ̀ ɣâla-woo ƃôi, berei máŋ ŋ̀óoi ŋí è kɛ̀ la ma a lii-sɛlɛŋ kpɛɛ́ pôlui. 21Nya ƃe ɣele tɔnɔ da è kɛ̀ a Ɛɛlɔ maa sɔlɔ ƃó-ɣele kuui. M̀ɛnii ŋí è kɛ̀ Ɛlodia ma a lii-nɛ̃ɛ kɛ́tɛ. Ɛɛlɔ è kúu kɛ́tɛ kɛ̀ a maa ɣelei tí. È ƃɛlɛ-toli ƃò a ŋɔnûa kpaya-kpayai, guluƃa-ŋai da Galalii-lɔii lonii. 22Ɛlodia ǹóŋ-nɛnîi è lɔ̀ é mãla kpɔ́ ǹûai ŋɛ́i a ǹɛ́lɛɛ m̀aa mɛni é Ɛɛlɔ líi nɛ̃ɛ da diai è m̀ɛlɛ tolii ƃò a diai. Nya ƃe ǹâŋ Ɛɛlɔ è mò ma, “Lé ƃé yâ wɛ̂lii ŋá gɛ́ yɛ̂i? Zɛŋ kélee yâ ŋ̀wɛ̂lii m̀ó ḿâ ŋa pâi dɛɛ̂i ípɔ.” 23È sãa támaa maa kono tèe kɛ̀ ǹyêei, ǹyɛɛ mai, “Zɛŋ kélee yâ wɛ̂lii lai, ḿvɛ̀li ma, ŋa pâi dɛɛ̂i ípɔ, à nɛ̀ɛ ma kpîŋ é kɛ́ a ŋákâloŋ-laai gbua.”

24Nya ƃe nɛnî-looi è lì é m̀ó ǹee ma, ǹyɛɛi, “Lé ƃé ŋa pâi vɛlîi?”

Ǹee è mò ma ǹyɛɛi, “Batâi-kɛ-nuui Zɔ̂ŋ ŋuŋ fɛ́li.”

25E kîrɛ sìɣe é pá ǹâŋ pɔ́ naa ǹyɛɛ mai, “Ŋa ŋ̀wɛ̂lii í Batâi-kɛ-nuui Zɔ̂ŋ ŋuŋ tɛ́ɛ ḿbɔ loníi ma kawulu su.”

26Malôŋ è tòo gâloŋ ma a ŋ̀ánaa, kɛ́lɛ, vé pɔri ní kɛ̀ ŋ̀óo siɣêi pôlu, kpɛ́ni fêi, è góno tèe dîai è m̀ɛlɛ tolii ƃò a diai díŋɛi. 27È m̀aa kpɛ́-nuui tɛ̀ɛ a maa félaa, ǹyɛɛ ma lí í pá a Zɔ̂ŋ ŋuŋ. È lì gbini-pɛrɛi mu é Zɔ̂ŋ ŋuŋ tee, 28é pá la kawulu su e dɛɛ nɛnî-kpelai pɔ́. È lì la é dɛɛ ǹee pɔ́. 29Zɔ̂ŋ ŋɔpôlu-ƃelai kɛ́ɛ da m̀ɛnii, dí pà dí lí a bomai dí ǹoo.

Ǹúu wála lɔ́ɔlu ŋá kɔŋ mɛnii

(Maafîu 14:13-21; Lûu 9:10-17; Zɔ̂ŋ 6:1-14)

30Zîsɛ ŋɔsia-ƃelai dí pà pôlu bɔ́ naa, dí m̀o ma nyii kélee dí gɛ̀ dí ǹɛ́. 31Kpɔŋ támaa è ŋ̀á tɛ̀ ma ƃɛ́i Zîsɛ è kɛ̀ naai. Pere fé kɛ́ ní kpîŋ naa a gɛ́ɛ dí dílaa míi. Nya ƃe è mò dîa, ǹyɛɛi, “Kwaa lí kútee-tee kwaa ma, ka káfii tɔ́ɔ a guro.” 32Nya ƃe dí tɛ̀ ǹya ŋá-keleŋ su dí lí dítee-tee kwaa ma. 33Díkɛɛ lîi, núu támaa dí díkàa dí díkɔlɔŋ. Dí kùla daai kélee su a kîrɛ díkɔɔ ŋá, dí seri naa dítuɛ. 34Zîsɛ pîlaŋɔɔ zîŋ mai, è kpɔŋ kɛ́tɛ kàa dímalôŋ é gɛ́, kpɛ́ni fêi, dí kɛ̀ yɛ̂ɛ ƃála-ŋa nyii dímɛi káa-nuu fé mai. Nya ƃe è mɛni támaa lɛ̀ dîa. 35Ɣele-wulii kɛ́ɛi, ŋɔpôlu-ƃelai dí pà bɔ́ naa dí m̀o ma díyɛ̂ɛi, “Lɔii kpâla su ká ŋí, vóloi a kɛ́ liî. 36Dítɛɛ a gɛ́ɛ dí li gbâlaŋ-ŋai ŋá da gbanâŋ-ŋai lá ƃɛ́ kɔlɛ ma, dí mii-sɛŋ yá díkpîŋ mɛni ma.” 37Kɛ́lɛ, e díwoo su tòo, ǹyɛɛi, “Káa kpîŋ ka sɛŋ da tɛɛ dípɔ dí m̀ii.” Dí m̀are kɛ̀ dîyɛɛi, “Gɛ̀ ní, kú lí ku sêleŋ ŋuŋ feerɛ kpólo-kpala yá, ku dɛɛ dípɔ dí m̀ii?” 38E dímarê kɛ̀, ǹyɛɛi, “Kpólo-kpala ɣɛɛlu ƃé káyêei? Ka lí ká naa káa.” Gbóloi káa dîɛi, dí mò ma, “Kpólo kpala lɔ́ɔlu da nyɛ̃ɛ kpua feerɛ káa naa.” 39Nya ƃe è díkɛ̀ díkelee dí see a díkpulu tɛi-tɛi gala ŋunui ŋá. 40Dí sèe a díkpulu-ŋa, ŋuŋ tɔnɔ da buu lɔ́ɔlu. 41È gbólo kpâla lɔ́ɔlui sìɣe da ǹyɛ̃ɛ kpua feerɛi, é ŋ̀ɛi té ŋ̀elei su, é lûwa láa ma. È gbólo kpâlai su ɣàle é dɛɛ ŋɔpôlu-ƃelai pɔ́, a gɛ́ɛ dí dɛɛ ǹûai pɔ́ dí m̀ii. È nyɛ̃ɛ kpua feerɛi ŋá kɔ̀lɛ díkelee dîa. 42Díkelee dí da mìi dí péla. 43Gbólo pɛnɛi da nyɛ̃ɛ kpua-kpuai dí ŋ̀á tɛ̀ ma, é kpɔ̂lɔ puu kao feerɛ láa fɛ́ɛ. 44Diai gbóloi da ǹyɛ̃ɛ kpua-kpuai feerɛi mìi, dí kɛ̀ a kpakolo wála lɔ́ɔlu.

Zîsɛ è sìa ǹyái ŋá

(Maafîu 14:22-33; Zɔ̂ŋ 6:15-21)

45Zîsɛ è m̀o ŋɔpôlu-ƃelai dîa a gɛ́ɛ dí tɛ́ ǹya ŋá-keleŋ su a maa félaa dí lí dúɛ Bɛsaida ǹyái pôlu, gɛ́ gbɔŋ pâma. 46Gúlaa dísamai, è lì ǹyée su a gɛ́ɛ é Ɣâla fɛli. 47Gbínii è pɛ̀lɛ, géleŋ kɛ́ ƃò nîi nyúo-loŋ ŋá, Zîsɛ ǹyaa tɔnɔ kɛ́ ƃò zîŋ ŋá. 48È ŋɔpôlu-ƃelai kàa dí kɛ̀ kɔ̀ a géleŋ kɛ́ɛ, kpɛ́ni fêi, vãai è kɛ̀ géleŋ lókwâi. Zîsɛ è sìa ǹyái ŋá, é lí dípɔ-pere a ɣele-ƃɔi kpini. È kɛ̀ pâi tɛɛ̂i dîa, 49kɛ́lɛ, dí gàa gɛ́ sìa ǹyái ŋá yɛ̂ɛ gɔfɛ, díkɛ làɣi, 50kpɛ́ni fêi, díkelee díŋuŋ-kɔ̂lɔŋ è yèŋ a dia. Kɛ́lɛ, è m̀o dîa ǹyɛɛi, “Ka kálii kpéle, ńyãa ƃe. Káfe yào.” 51È pìli dîa géleŋ su, vãai é kpéra. Dípɛlɛ è pù a zu kɛ́tɛ, 52kpɛ́ni fêi, dífe táre ní gbólo kpâlai mɛni su.

Zîsɛ è kɔlɔ-fela-ƃela ƃàlo Gɛnɛsarɛ

(Maafîu 14:34-36)

53Tãi dí sèri la ǹyái pôlui, dí pîlaŋ Gɛnɛsarɛ dí géleŋ ɣíri zîŋ ma. 54Tãi kpɔ́ nɔ nâa dí kùla la géleŋ sui, daa-ƃelai dí Zîsɛ kɔ̀lɔŋ, 55díkɛ li a kîrɛ ǹɔii kpiniŋ su, díkɛ pa a gɔlɔ-fela-ƃelai bɔ́ naa làli-ŋa su, ƃɛ́i kélee dí m̀ɛni Zîsɛ káa naai. 56Ƃɛ́i kélee è lì naai, gbanâŋ-ŋai lá, daa-ŋai su, kpaa máŋ gbâlaŋ-ŋai ŋái, dí gɔlɔ-fela-ƃelai làa gbɔŋ too kwaa-ŋai ma, dí vɛli a gɛ́ɛ nɔ́ dí ŋɔyokpoi wóŋ sóŋ. Diai kélee díyee pɛ̀lɛ mai, dí ƃàlo.

Currently Selected:

Mâki 6: KWB

Highlight

Copy