Lûu 23
23
Zîsɛ káa Pâle ŋɛ́i túɛ
(Maafîu 27:1, 2, 11-14; Mâki 15:1-5; Zɔ̂ŋ 18:28-38)
1Gɛɛ tí, gbɔŋ kélee dí dímu sìɣe dí pa la Pâle pɔ naa. 2Nya ƃe dí pɛ̀lɛ mɛni lɛɛ̂i ma, dîyɛɛi, “Ku nalôŋ ŋi kàa gɛ kúsîi-ŋai kɛ̀ a gɛɛ dí tɔɔ gɔmɛnɛi ma. Gɛ mò dîa a gɛɛ dífe ŋuŋ-fela-fei tɛɛ Gâloŋ Siizɛ pɔ, gɛ mo, ǹyɛɛ a gɛɛ ǹyaa kpîŋ ƃa Kôrai nyii gáa a kâloŋ.” 3Nya ƃe Pâle e m̀arê kɛ̀, ǹyɛɛi, “Yá ƃa Zûu-ŋai Díkâloŋ?” E ŋ̀óo su tòo, ǹyɛɛi, “Yâa m̀ó.” 4Pâle e mò zâla láa soŋ-ƃela kpaya-kpayai da ǹûai dîa, ǹyɛɛi, “Fe mɛni nyɔ́mɔɔ da káa ni nalôŋ ŋi kponôi.” 5Kɛ́lɛ, dí mò a zu kɛtɛ-pere, dîyɛɛi, “Gáa ǹûai kɛ̂i wúlee a ŋɔsɛŋ-lɛɛi Zuda-lɔii kélee su, e gɔ́ɔ pîlaŋ Galalii, e seri máŋ la ƃɛ.”
Zîsɛ káa Ɛɛlɔ ŋɛ́i túɛ
6Tãi Pâle e mɛ̀ni lai, è mare-kɛ̂ɛ kɛ̀ à kɛ̀ nalôŋ è kɛ̀ a Galalii-nuu. 7Gɛɛ a gɔ́lɔŋ a gɛɛ e kɛ̀ a Ɛɛlɔ ŋɔlɔii-ma-nuu dai, e dɛ̀ɛ Ɛɛlɔ pɔ naa nyii kɛ̀ Zerusâlɛŋ a maa-tãi ti. 8Tãi Ɛɛlɔ Zîsɛ kàa lai, ǹíi è kɛ̀ a nɛ̃ɛ a ŋ̀ánaa. Kpɛ́ni fêi, è kɛ̀ ŋ̀wɛ̂lii é gáa a tãi su kôyaa, berei è mɛni támaa mɛni la é pîlaŋ mai. Gíli è kɛ̀ ma a gɛɛ a pâi ŋɔmɛni kpaya-kpaya kɛ́ɛ kâai. 9Gɛɛ tíi, è mare-kɛɛ támaa kɛ̂ m̀a, kɛ́lɛ, ve zu too ni. 10Nya ƃe zâla láa soŋ-ƃela kpaya-kpayai da gɔlɔ-pɔ̃yɛ-ƃelai dí tɔɔ gɔlɛ, díkɛ mɛni lɛɛ ma a gbanaŋɔɔ. 11Nya ƃe Ɛɛlɔ da ŋɔǹɔii maa kpɛ́-ƃelai dí kɛ̀ tuâi la a ƃaa-kula-maa pere, díkɛ ɣɛlɛ-maa kula gbonôi. Dí yokpo lɛ́lɛɛ ŋánaa tòo gɔŋ ma, dí dɛɛ pôlu Pâle pɔ naa. 12Maa-ɣelei ti Ɛɛlɔ da Pâle dí nɛ̀ɛ a díkîe. Kpɛ́ni fêi, nyiŋi e lɛɛ pâi kɛ̂i dí kɛ̀ a díkîe-ni kpɔaraa.
Ka Zîsɛ wɛ̂lii, kpaa máŋ Barâƃa?
(Maafîu 27:15-26; Mâki 15:6-15; Zɔ̂ŋ 18:39--19:16)
13Pâle è zâla láa soŋ-ƃela kpaya-kpayai da gɔmɛnɛ-ƃelai tôli díkîe ma da ǹûai. 14È mò dîa, ǹyɛɛi, “Ká pà a nalôŋ ŋi ḿbɔ, káa a ǹûai kɛ̂i díkɛ tɔɔ gɔmɛnɛi ma; kɛ́lɛ, ka gáa, ŋaâ zu kɔɔŋ káŋɛi tuɛ, fé mɛni nyɔ́mɔɔ kaa ni nalôŋ ŋi kponôi e pîlaŋ la mɛnii kélee ma ka nɛ ḿâi; 15Ɛɛlɔ fulɔi máŋ fé gáa ni, kpɛ́ni fêi, e dɛ̀ɛ pôlu kúpɔ. Ka gáa, ve mɛni nyɔ́mɔɔ da kɛ́ ni a gɛɛ e zu-saa kɛ́; 16maa-mɛni ma, ŋa pâi ǹókwâi ŋa tee ma.” [ 17Nya ƃe è nâa kɛ̀ tí, fɛ̂ɛ é tée gbini-pɛrɛi mu nuui dɔnɔ ma, é dɛ́ɛ dípɔ a gúui ŋele.]
18Kɛ́lɛ, díkelee dí làɣi a gîe, dîyɛɛi, “Ka lí a nalôŋ ŋí, í tee Barâƃa ma í dɛɛ kúpɔ!” 19Dí Barâƃa ŋí pìli kpini-pɛ̂rɛ mu kpɛ́ni fêi è kɔ̀ gɔmɛnɛi pɔ́ daa-leei su da núu paa-mɛ̂ni. 20Pâle e lòno dípɔ ŋɔ́nɔ, gɛ ŋ̀wɛli a gɛɛ e tee Zîsɛ ma; 21kɛ́lɛ, dí kɛ̀ nɔ lâɣii ma, dîyɛɛi, “Gbamo saa-wuru ma, gbamo saa-wuru ma!” 22Zaaƃa-tãi e mò dîa, ǹyɛɛi, “Le-mɛni ma? Le-mɛni nyɔ́mɔɔ ƃe e gɛ̀? Fe niî mɛni nyɔ́mɔɔ kélee da kaa ni gbonôi nyii fɛ̂ɛ e saa zu; maa-mɛni ma, ŋa pâi ǹókwâi ŋa tee ma.” 23Kɛ́lɛ, dí kɛ̀ kpɔ́ nɔ́ bôlu a gbanaŋɔɔ a dílaɣi-woo a gɛɛ é gbamo saa-wuru ma. Díwoo-ŋai è ŋ̀ɔi mɛi pɛ́lɛ 24Gɛɛ tí, Pâle è m̀ɛnii têe a gɛɛ m̀ɛnii dí kɛ̀ ŋ̀wɛ̂lii é kɛ́i, é kɛ́. 25È tèe ǹalôŋ ma dí marê kɛ̀ m̀ɛni ma, nyii dí bìli kpini-pɛrɛ mu, gɛɛ kɔ̂i gɔmɛnɛi pɔ da ǹúu-paa-mɛni mai; kɛ́lɛ, è Zîsɛ tɛ̀ɛ dípɔ a gɛɛ dí dínîa-mɛni kɛ́ la.
Dí Zîsɛ kpàmo zaa-wuruii ma
(Maafîu 27:32-44; Mâki 15:21-32; Zɔ̂ŋ 19:17-27)
26Nya ƃe díkɛɛ liî a Zîsɛ, dí Sailini naloŋ Samaŋ soŋ, nyii kɛ̀ kulâi gbâlaŋ ŋái, dí zaa-wuruii láa gâraŋ ŋá a gɛɛ e pîlaŋ la Zîsɛ pôlu. 27Nya ƃe kpɔŋ kɛ́tɛ e pîlaŋ bôlu, da nɛyaa nyii-ŋai kɛ̀ díkeŋei tuâi, díkɛ gbêɣei too m̀ɛni mai. 28Kɛ́lɛ, Zîsɛ e tìnaŋ dípɔ e m̀o dîa, ǹyɛɛi, “Zerusâlɛŋ loŋ-nɛni-ŋa, káfe wɔlɔ ḿɛni ma. Kɛ́lɛ, ka wɔlɔ kákpîŋ kámɛni ma da kánîa-pɛlɛɛi. 29Kpɛ́ni fêi, ka gáa, ŋele-ŋai káa pâi tãi da pâi m̀ôi, dîyɛɛi, ‘Lûwa káa gboma-ƃelai dîa da gôo-ƃɔlɔŋ-ŋai dífe niî loŋ sɔlɔ ƃo níi, da ŋini-ŋai lóŋ fe niî gbele níi.’ 30Maa-tãi ti da pâi pɛlɛɛ̂i m̀óɔ ma ǹyée kpaya-kpayai dîa, dîyɛɛi, ‘Ka too kûa’; da ǹyée pɛlɛɛ-ŋai dîa, dîyɛɛi, ‘Ka kúmɛi pɛ́lɛ.’ 31Kpɛ́ni fêi, à kɛ̀ dí nyiŋi kɛ̀ a ŋ̀úru ŋunui, lé ƃe pâi kɛ̂i a ŋ̀úru kpalai?”
Zîsɛ paa-pêre zaa-wuruii ma
32Dí lì a tɔ̂ŋ-kara-ƃela feerɛ máŋ a gɛɛ da dîa-ni dí dípaa. 33Tãi dí sèri la gwaai ma da kɛ̂ ma Ŋuŋ-konoŋ-kwaai mai, dí gbamo naa zaa-wuruii ma, bɛlɛɛ dɔ̂ŋ-kara ƃelai dia máŋ, dɔnɔ kɛ́ ƃo ǹáa-mii-yee mɛi-pere, gbeli e ƃo gɔɔ-yee mɛi-pere. 34Nya ƃe Zîsɛ e mò, ǹyɛɛi, “Ńâŋ, dísu-mɛni lɛɛ; kpɛ́ni fêi, dífe mɛnii kɔ́lɔŋ da gɛ̂i.” Dí ŋɔseɣei ŋá kɔ̀lɛ kpɛɛŋ su. 35Nya ƃe ǹûai dí kɛ̀ tɔɔ̂ni gɔlɛ, díkɛ naa kaa. Gɔmɛnɛ-ƃelai máŋ dí kɛ̀ ɣɛ́lɛ-maa kulâi gbonôi, dîyɛɛi, “È núu da kpɛni-ŋa ƃàlo. À kɛ̀ gáa a Kôrai nyii kulâi Ɣâla yêei, Ŋɔsu-ɣɛɛ-nuui, ǹɛɛ naa é gbîŋ ƃálo!” 36Gɔkuluƃa-ŋai máŋ dí kɛ̀ ɣɛ́lɛ-maa kulâi gbonôi, dí pa a lɔɔ-kpona a gɛɛ dí dɛɛ bɔ. 37Díyɛɛi, “À kɛ̀ íkaa a Zûu-ŋai Díkâloŋ, íkpîŋ ƃalo!” 38Kɔlɔ-pɔ̃yɛɛ e kɛ̀ ŋuŋ mɛi-pere, ǹyɛɛ, “Zûu-ŋai Díkâloŋ ká ŋi.”
Ŋuma-ƃela feerɛi
39Dɔ̂ŋ-kara-nuui dɔnɔ nyii kɛ̀ sɛ́lɛnîi naai, e laa-kara-woo ƃo mà, ǹyɛɛi, “Kɛrɛ̂e, yá ƃa Kôrai? Íkpîŋ ƃálo bɛlɛɛ kûa!” 40Kɛ́lɛ, ǹúui gbeli e ǹia-woo ƃò, ǹyɛɛi, “Ífe máŋ yáôi Ɣâla ma, íkɛ gáa a gɛɛ íkaa mɛni-lɛɛ maa-laa tɔnɔi ti su? 41Zã́âi kúmɛni ma; kpɛ́ni fêi, kúkaa kúsɔŋ ŋɔfela-fei sɔlɔ ƃôi; kɛ́lɛ, nalôŋ ŋi fé mɛni nyɔ́mɔɔ da kɛ́ ni.” 42Nya ƃe e mò ma, ǹyɛɛi, “Zîsɛ, ḿaa-mɛni é lɛ́ɛ íkili ŋá tãi yà pà la íkâloŋ-laai sui.” 43E mò ma, ǹyɛɛi, “Tɔ̃yâ ma, ŋá m̀ó yâ, sâa kwa ya kwa pâi kɛ̂i Paredai.”
Zîsɛ saa-pere
(Maafîu 27:45-56; Mâki 15:33-41; Zɔ̂ŋ 19:28-30)
44È kɛ̀ nâa a aƃai ǹɔ́ɔlu mɛi dai. Nya ƃe kpíni è pɛ̀lɛ ǹɔii gwaa kélee ma é lɛ́ɛ la zu aƃai ǹɔ́ɔlu mɛi náaŋ é seri, 45vóloi ŋɔkwaa-ponoɔi é fɛ̀ɣɛ. Ŋ̀âla-pɛrɛ Kɛ́tɛi mu-seɣei e nâa ƃela zamai. 46Nàa kɛ́ɛ ti, Zîsɛ e làɣi a ŋ̀óo kɛ́tɛ, ǹyɛɛi, “Ńâŋ, ŋa ŋámɔ̂leŋ tɛ́ɛ ípɔ!” Gɛɛ a nyiŋi ƃói, e nɛ̃wo gbɛɛ ŋái too. 47Tãi gɔkuluƃa-ŋai mɛi nuui e mɛnii ŋi kàa la é kɛ́i, e laa-maa-tɛ tɛɛ Ɣâla pɔ, ǹyɛɛi, “Tɔ̃yâ ma, nalôŋ ŋi e kɛ̀ a tɔ̃yâ-nuu!” 48Gbɔŋ kélee kɛ́ɛ a pá gîe-ma a gɛɛ dí naa kaai, dí kɛ̀ liî a díkeŋe lá tua tãi dí mɛnii ŋi kàa la é kɛ́i. 49Kɛ́lɛ, ǹúui kélee kɛ̀ a gɔlɔŋɔɔi, bɛlɛɛ nɛyâai dîa nyii-ŋai kûla Galalii-lɔii sui, dí pìlaŋ bôlui, dí tɔ̀ɔ kwaa kôyaa ma, díkɛ mɛnii ŋi kaa.
Zîsɛ loo-pere
(Maafîu 27:57-61; Mâki 15:42-47; Zɔ̂ŋ 19:38-42)
50Nalôŋ tɔnɔ e kɛ̀ naa, ǹáa ƃe kɛ̀ a Zosɛ, nyii kûla Zûu-ŋai dítaai su da kɛ̂ ma Alimatîai. È kɛ̀ a gɔyâŋ su-nuu da. È kɛ̀ a nuu lɛ́lɛɛ, gɛ ƃo a tɔ̃yâ-nuu. 51Vé fáa ní díŋuŋ pîlaŋ su-wooi ma da mɛnii dí gɛ́i. È kɛ̀ Ɣâla ŋɔkâloŋ-laai kɔ́rîi. 52Nalôŋ ŋi e lì Pâle pɔ, e m̀arê kɛ́ Zîsɛ pomai mɛni ma. 53Nya ƃe è gula, é m̀aa kpiniŋ a seɣe kole, é ǹáa ƃolôŋ su nyii dí dèe kɔni kɛ́tɛ su ƃɛi poma da fé niî wɔ́lɔ laa ni naai. 54È kɛ̀ a Zãâ kpɛtɛ-ɣelei, nya ƃe Vii-tɔɔ-ɣelei gɔ́ɔ e kɛ̀ pîlanii. 55Nɛyâai da dîa-ni dí kûla kɛ̀ Galalii-lɔii su dí lɛɛ bôlui, dí molôŋ kàa da berei bomai è kɛ̀ laâni lai. 56Gɛ́ɛ tíi, dí lì pôlu, dí wée-fũa-ŋa da wuru-ya kúŋ nɛ̃ɛ-ŋa kpɛtɛ.
Dí dífii tɔ̀ɔ a Vii-tɔɔ-ɣelei yɛ̂ɛ berei dɔ̂ŋ è mò lai.
Currently Selected:
Lûu 23: KWB
Highlight
Share
Copy
Want to have your highlights saved across all your devices? Sign up or sign in
