Zôo 24
24
1Ŋ̀wála-wâla kélee Ɣalai fé nîi tãi kpɛtɛ ní a gɛɛ é ŋ̀wana-lɔ̂ɔ-ƃelai dí mɛnii ŋá tée.
Lé mɛni ƃé bôlu-ƃelai dífe nîi gáa ní gɛ́ zɔnyɔ̂ŋ-ƃelai dí mɛnii ŋá tèei?
2“Ǹûai da díkpâlaŋ-ŋa tii kɛ̂ díƃarâai dílɔii ma dífa mò dîa.
Ǹûa tɔnɔi ŋí da díƃarâai dítaa-tulɛ-ŋai ŋûma dí dípu díwɔ̂-ŋai sáma díkɛ díŋaa kɔ̀ŋ yɛ̂ɛ à kɛ̀ a dípɔɔ.
3Da dee-loŋ-ŋai díwɛlɛ-sôo-ŋai ŋùma. Da kpa pìli bɔɔ-nɛyãai dîa,
da dítii-kɛ niŋa-sirɛ-ŋai sîɣe a sɛ́ɣɛ é lɛ́ɛ la zu dí gbai tée.
4Dífa ǹɛɛ naa gôlo-ƃelai dí m̀ɛni-ŋai kɛ́ nyii da pɔ̂ri gɛ̂i.
M̀ɛni ma da kɛ̀ pâi mɛni da kɛ̂i fɛ̂ɛ dí díloo ŋ̀wana-lɔ̂ɔ-ƃelai dîa.
5“Gôlo-ƃelai díkaa vɛ̃ɛ-kpâlaŋ sui,
gáa dîa a kpà a gɛɛ dí díkɔnɔŋ kɔ́ri yɛ̂ɛ wɛlɛ-sôo nyii mɛi-káa-nuu fé mai a gɛ̀ lai.
Bere sîi ŋí nɔ́ ƃé da pɔ̂ri dínîa-pɛlɛɛi kɔ́nɔŋ kɔ̂rii la.
6Da díkɔnɔŋ kùla núu da kpɛ́ni-ŋa díkpâlaŋ ŋá.
Ǹyaŋ da kɛ̂ nɔ́ díkɔnɔŋ kɔ̂rii ŋ̀wana-lɔ̂ɔ-ƃelai díkpâlaŋ-ŋai ŋá.
7Da nyîi a díkaŋ gbínii su kɔ́lɛ kɛ́ tɛ̀ dîa kpɛ́ni fêi,
seɣe fé díyêei dí bɛlɛ dí mɛi.
8Ǹyéei su tunai a dí yɔ̂ɔ, díkɛ kpùlɔŋ gɔni-ŋai dîa a gɛɛ díkponôi é fãa,
kpɛ́ni fêi pɛ́rɛ fé díyêei.
9Ŋ̀wana-lɔ̂ɔ-ƃelai da kpa pìli gôlo-ƃelai dîa.
Tãi gbai tée sɛŋ fa kɛ̂ la díyêei, da dínîa-pɛlɛɛi sôŋ a sɛ́ɣɛ.
Da ŋíni kpele nia-pɛlɛɛ nyii-ŋai dínâŋ-ni da saai, da díkùla dílee-ni ŋíni mu.
10Gôlo-ƃelai da kɛ̂ tɛ̂i díkɛ yèŋ a díkaŋ, kpɛ́ni fêi seɣe fé díyêei.
Díkɛ ǹûai dímii-sãai tĩyɛ a díkoi fôlo.
11Gôlo-ƃelai da kɛ̂ tíi kɛ̂i ŋ̀wana-lɔ̂ɔ-ƃelai dí ɔle kpalaŋ-ŋai ŋá, kɛ́lɛ dífa fâa ma a gɛɛ dí da mìi.
Da kɛ̂ díkpɔmɔ ƃai tânii kɛ́lɛ dífa ǹyá da kpèle.
12Diai dí díŋwâna da diai kɛ̀ saa-wolo lai, díkɛ wɔ̂lɔi Ɣâla ma a gɛɛ é kpɔŋ mâa tɛɛ dípɔ.
Díkɛ̀ wɔ̂lɔi dîyɛ Ɣâla ma kpɔŋ kûa.
Kɛ́lɛ Ɣâla fé ŋ̀óli tɔɔ-ní m̀ɛni nyɔ́mɔɔi ma dɔɔ-ƃelai díkɛ̀ gɛ̂i a gôlo-ƃelai.
13“Ŋ̀wana-lɔ̂ɔ-ƃelai dífa ŋ̀wɛli a gɛɛ ɣele é ƃɔ́.
Dífa sîa pere su ponoɔɔ su.
Dífa lɛ̂ɛ pere su ponoɔɔ ma.
14Ǹúu paa-nuui a mù sìɣe a ɣele ƃɔ̂i kpini a gɛɛ é lí é gôlo-nuui páa.
Tãi kpíni a pɛ̂lɛ lai, ǹúu paa-nuui ŋí a kɛ̂ a ŋúma-nuu.
15Mɛni pili zu-kpakolo a maa kpɛ̂ŋ kɛ̀ a gɛɛ gbínii é pɛ́lɛ.
A mò gbîŋ ma ǹyɛɛi, ‘Núu da fé pâi ŋ́gâai.’ A ŋ̀ɛ́i lòo.
16Ŋ̀uma-ƃelai da pɛ́rɛ wôlo, dí lɔ́ m̀u.
Da dílòo a ɣele ƃɔ́ɔ.
Dífe wɛ́li-ni a ɣele-ƃɔɔ.
17Dí ŋwɛ́li-ni a kpíni é tɛ́ɛ ɣele ƃɔ́ɔ ma kpɛ́ni fêi,
kpíni su ƃé da dímɛni nyɔ́mɔɔ-ŋai kɛ̀ la.
18“Í mò yɛ̂ɛ, ‘Dí káa yenîi a ǹyai yɛ̂ɛ yá-file.
Ɣâla a ŋɔlɔii náɣaŋ-laa.
Núu da fé naa é tíi kɛ́ ŋɔkpɔmɔ-ƃa kpalaŋ ŋá.
19Berei nɔ́ sãɔ a sêɣeŋ la fólo ŋái,
bere sîi tɔnɔi ŋí ƃé zɔnyɔ̂ŋ-ƃelai da sêɣeŋ la dí yéŋ saa-taa.
20M̀aa mɛni kíli fé lɛ̀ɛ ní ǹee ŋá.
Kpeli-ŋa dí boma mîi, dí zu kara yɛ̂ɛ da wúru pɔ̀ŋ.
21A kɛ̂ tí kpɛ́ni fêi, da bɔɔ nɛ̂ni-ŋai mɔ̃lɛ
díkɛ tua-nyɔŋ támaa kɛ́ a gbóma nɛ̂ni-ŋai.
22Kɛ́lɛ Ɣâla a ŋ̀wála-wala-ƃelai su kâra.
Ɣâla é máŋ mɛnii ŋá tée, ŋ̀wana-lɔ̂ɔ-nuui ŋɔkɛ-ɣeniɛi aâ kpɛɛ.
23Ɣâla a gɛ̀ dí gáa yɛ̂ɛ sɛŋ ƃe a dí mɛi kâai,
kɛ́lɛ a kɛ̂ dítûa-pere kélee maa kpɛɛ̂i.
24Ŋ̀wana-lɔ̂ɔ-ƃelai da kɛ̂ nɔ́ a dítɔ̂ɔi kɛ́tɛ a tãi kpua, nàa a kɛ̀ tí dífa ŋɔ́nɔ kɛ̀ sɛŋ da su.
Da díŋuŋ pîlaŋ yɛ̂ɛ wúru-poa a kɛ̀ kpâlai.
Da dítêe yɛ̂ɛ sí-sɛŋ sí-nuu a ŋɔsí-sɛŋ tèe.
25À kɛ̀ ŋâa mɛni nyɔ́mɔɔ ƃó, núu da é mó ŋaŋ ḿâ a gɛɛ ŋa lɛ́ɛ kɛ̂i.
É nɛ́ ŋaŋ a gɛɛ ḿve tɔ̃yâ ƃôi.’ ”
Currently Selected:
Zôo 24: KWB
Highlight
Share
Copy
Want to have your highlights saved across all your devices? Sign up or sign in
