Zôo 14
14
1“Ǹúui nyii kélee nɛnî è maa sɔlɔ ƃôi, víi kpɛɛ̂i, pɔ̂ri maa fé mì.
Ŋɔfúlu-laai láa fɛ̂ɛi a mɛni kpɔ̂lu, m̀ɛni ma, a sâa a maa félaa.
2Ŋɔkɛ̀ ɣéniɛi kɔ́ɔ a pîlaŋ nɔ́ yɛ̂ɛ wúru pôa,
nàa à kɛ̀ tí é kpála. A lâŋ nɔ́ yɛ̂ɛ núu ninîŋ.
3Ɣâla, íkpaaŋɔ̂ɔi, í gɔ́lɔŋ a gɛɛ ŋ́gaa ƃɛ́?
Ya pâi liî a ńyãa m̀ɛni-sâa ƃó-kerei mu í ŋá mɛnii ŋá tée?
4Sɛŋ maa waa fa pɔ̂ri kulâi sɛŋ da kponôi
nyii maa fé waa nii yɛ̂ɛ nuu-kpunei.
5Yaâ gbɛtɛ íkili-ŋa a gɛɛ í núu-kpune ŋɔkɛ-ɣeniɛi su kpua.
Ya núu-kpune ŋɔkɛ-ɣeniɛi kóyɛŋ láa a gɛɛ vé tɛ̀ɛ naa ma.
6Mɛni ma, ye tée bôlu é víi tɔ́ɔ,
é ŋɔtíi kpânaŋ ŋaa-nɛ̃ɛ kula.
7“À kɛ̀ núu da a wúru tèe, kili kɛ-zu káa maa-nuui tí yêei a gɛɛ ŋ̀úru-ŋumei tí a pâi sôoi ŋɔ́nɔ pôlu.
Kili kɛ-zu a kɛ́ ǹyéei a gɛɛ ŋ̀úru-ŋumei tí a pɔ̂ri ƃɔɔ̂ŋ-nii é ŋɔ́nɔ kɛ́ ɣele ma.
8É máŋ kɛ́ tí, ŋ̀úru-samei a pâi nâmui ǹɔii mu
é lɛ́ɛ la zu é lûla.
9A pɔ̂ri ƃɔɔ̂ŋ-nii a nina à kɛ̀ nɔ́ a yá-loŋ sɔlɔ ƃô.
10Núu-kpune a sàa ŋɔtãi a kpɛ̂ɛ.
Ǹyaŋ à kɛ̀ kwa sàa, mí ƃé kwa kɛ̂ naai?
11Núu-kpune ŋɔkɛ-ɣeniɛi káa nɔ́ yɛ̂ɛ póa a kpàla,
kpaa máŋ yɛ̂ɛ ya-lee à kpèra ɣilîŋ-nii.
12Bere sii ŋí nɔ́ ƃé núu-kpune a sàa la,
pere fa ŋɔ́nɔ kɛ̀ naa é pá pôlu. Tãi nɔ́ ŋ̀ele-kɔlɔŋ káa la naai,
zaa-nuui fa pɔ̂ri mu siɣêi kpaa máŋ é mu-siɣe saa yêei.
13“À kɛ̀ nɔ́ ya pɔ̂ri ńoôi saa-táa í mɛi káa,
é lɛ́ɛ la zu ílii-ŋwanai ŋá é yéŋ ítãi láa mà,
ɣele ɣɛɛlu ƃé ŋa pâi gɛ̂i saa-taai ífe nîa mà.
14À kɛ̀ núu da a sàa a ŋɔ́nɔ pà pôlu?
Ŋa pâi lɛɛ̂i tɔɔ̂ni ƃɛ́ é lɛ́ɛ la zu núu da é pá é ḿaa tée.
15À kɛ̀ ya ŋ̀wɛ̂lii ńyãai a íkpɛtɛ-sɛŋ í ńdoli,
gɛ̀ ní ŋa pâi fâai.
16À kɛ̀ tí, gɛ̀ ní ya pâi ḿɛi kâai.
Ífe ŋɔ́nɔ pâi ḿaa kpɛɛ̂i ŋá sɔnyɔ̂ŋ mɛni ma.
17Ya pâi ŋá sɔnyɔ̂ŋ pûi ƃɔrɔ su í ǹáa ɣíri,
ífa ŋɔ́nɔ zìɣe a ńzɔŋ.
18“Ǹyaŋ ǹyée kɛ́tɛi a pâi pûi zu,
gɔni-ŋai kélee dí kúla dílâai.
19Ǹyái a pâi gɔni-ŋai kélee fũai,
ǹyá-kpoloŋ a pâi ǹɔii mâ kɔɔ̂i.
Gɛ̀ ní ya pâi núu-kpune ŋɔkili-kɛ-zui su-karai.
20Í tɔɔ̂i núu-kpune ma a tãi kélee, mɛni ma a pâi saâi.
A kɛ̀ saâi, ŋ̀ɛ́i maa a fâleŋ.
21Ǹyaŋ à kɛ̀ da ƃaa kɛ́-maa tɛ́ɛ ǹônii-sinaai pɔ́ va kɛ a gɔ́lɔŋɔɔ,
kpaa máŋ à kɛ̀ da ƃâa kùla dîa va kɛ̂ a gɔ́lɔŋɔɔ.
22Gbɔ́ɔi sɛŋ-soli maai nɔ́ ƃé a kɛ̂ a gɔ́lɔŋɔɔ.
À kɛ̀ tí gbîŋ nɔ́ ƃé a malôŋ sèe.”
Currently Selected:
Zôo 14: KWB
Highlight
Share
Copy
Want to have your highlights saved across all your devices? Sign up or sign in
