Zôo 13
13
1M̀ɛni-ŋai nyii kélee ŋa môi, ŋa gélee káa a ŋ́gbîŋ ŋɛi-gao,
ŋá mɛ̀ni a ŋ́gbîŋ woli, ǹyaŋ ŋá tàre zu.
2M̀ɛnii nyii kélee í gɔ́lɔŋ, ńyãa máŋ kpîŋ ŋá gɔ́lɔŋ.
Berei ƃa mɛni ŋá kàa lai, vé tɛɛ ní ḿâ.
3Kɛ́lɛ ḿve lônoi ípɔ, ŋa ŋ̀wɛ̂lii ŋá mó Ŋ̀wála-wâla kélee Ɣalai mà
a gɛɛ ńzɔŋ fé m̀ɛnii ŋí su a dɔnɔ kpîŋ.
4M̀ɛnii nyii káfe gɔ́lɔŋ ka m̀ɛi pɛ̂lɛ a lɛ́ɛ,
ká sále kɛ̀ nyii va núu da ƃàlo.
5Eêi kɛ̀ kâi lɛ̀ɛ a ká mɛi sâa,
eêi nɛ̀ a gɛɛ kátareɛ̂ɛi.
6“Íwoli tɔ́ɔ ŋá mɛni su kula wooi ma.
Ímɛi sáa í íwoli tɔ́ɔ ŋá mɛni-saa woo-ŋai dîa.
7Káfe gàa yɛ̂ɛ sɛŋ ƃé ka kpɔnîi Ɣâla ma
a lɛ́ɛ kɛ́ɛ da núu pɛlɛɛ.
8Ka pâi mɛni lɛ́lɛɛ kɛ̂i Ɣâla mì
a maa kɔ̃ɔ m̀ɛni sâa ƃó kerei mu?
9Ɣâla a ká maa kpɛ̂ɛ, mɛni da fé pâi lɛ̂ɛi kâa?
Kpaa ka pâi bɛlɛɛ̂i yɛ̂ɛ berei núu a nûa pɛ̀lɛ lai?
10À kɛ̀ kákili-ŋa a gɛɛ ká mɛni lɛ́lɛɛ kɛ̂i Ɣâla mì loôi pere,
a pâi kákula maa kɛ̂i.
11A pâi ká maa yaôi kpɛ́ni fêi maa pɔlɔ-pɔlɔɔi ŋ̀wála-wala tela.
Ka pâi yaôi kpɔ́ ká tíniŋ.
12Kásãŋ-woo-ŋai káa nɔ́ kpɛ́ni-kpɛni yɛ̂ɛ lúu.
Ká maa-kɔ̃ɔ woo-ŋai káa nɔ́ yɛ̂ɛ ƃóo pɔrɔ.
13“Í mɛi sáa í ǹɛɛ naa ŋá lóno.
Ḿve nâa kpáaŋ-ni, lé ƃé pâi ŋ́gɛ̂ii.
14Ŋ́âa ŋ́gbîŋ kpɛtɛ mɛni sii kélee mɛni ma.
15A nɛ̃ɛ ma Ɣâla é ḿbaa, lé ƃé gbáaŋ káa nâa ḿâi?
É máŋ kpîŋ kɛ́ tí, ŋa pâi ŋá mɛnii ƃôi kpɔ́ mà ŋ̀ɛ́i téniŋ ma.
16Ŋá máŋ tɔ́ɔ Ɣâla ŋɛ́i-tuɛ a pâi ǹɛ́i a gɛɛ ŋá mɛnii lɛ̂lɛɛi kpɛ́ni fêi,
sɔnyɔ̂ŋ nuu fa pɔ̂ri tɔɔ̂i Ɣâla ŋɛ́i-tuɛ.
17Íwoli tɔ́ɔ kpɔ́ a ǹɛ́lɛɛ í ŋámɛni su kula-wooi mɛ́ni a ǹɛ́lɛɛ.
18Íwoli tɔ́ɔ kpɔ́ ḿâ a ǹɛ́lɛɛ kpɛ́ni fêi ŋâa nâa ŋámɛni-saai maa woo-su kula-wooi kpɛtɛ a gɛɛ ŋá mó yâ.
Ŋá gɔ́lɔŋ Ɣâla a m̀ɛnii ŋá tèe vé pâi ńzɔŋ kâai zu.
19“Ée Ɣâla, kwa yá ƃé pâi m̀ɛnii su kulâi?
À kɛ̀ ŋámɛnii nyɔ́mɔɔ̂i, gɛ̀ ní ŋa pâi mɛi saâi ŋá sáa mî.
20Ɣâla, ŋa pâi pâi íŋɛi-tuɛ
à kɛ̀ ya mɛni feerɛ kɛ̀ ḿî.
21Ye kpera mɛni kpɔ̂lu lâai ḿâ,
íkpera maa yaôi.
22Ɣâla, kɛ́ a maa-ŋuŋ ílono, gɛ̀ ní ŋa pâi íwoo su toôi.
Kpaa máŋ nɛ̀ɛ naa ŋálono a maa-ŋuŋ a gɛɛ í ŋ́oo su too.
23Ye ǹɛ́ ḿâ tãi ɣɛɛlu ƃé ŋa mɛni nyɔ́mɔɔ kɛ̀ la a yai?
Tãi ɣɛɛlu ƃé ŋá kùla la íperei mai?
Ye bere sii lɛ́ ḿâ ŋá íwoo pìli la ŋ́gɛ mɛni nyɔ́mɔɔ kɛi.
24“Lé mɛni ƃé m̀ɛlɛ kpɛɛ̂i la íkoi a gɛɛ ŋii,
íkɛ ńzìɣe a íkpɔara-nuui?
25Lé mɛni ƃé ya ḿaa yaôi la íkɛ ŋ́gɛ̀ yɛ̂ɛ láa-kpala ƃé a kùla wúru ma,
íkɛ ŋ́gɛ̀ yɛ̂ɛ mɔlɔŋ kâla ƃé fãa a vɛ̂ɛi?
26M̀ɛni nyɔ́mɔɔ-ŋai ŋá gɛ̀i, ya maa mɛnii pɔ̃yɛ m̀ɛni-saa ƃó-ƃelai díkɔlɔi su.
M̀ɛni ma ya gɛ́ ŋa mɔ̃lɛ ńôloŋ tãi sɔnyɔ̂ŋ-ŋai mɛni ma.
27Ya ŋ́gɔɔ lá ɣíri a gɛɛ ḿve ŋɔ́nɔ sìa.
Íŋɛi káa nɔ́ ḿâ a ɣele kélee.
Íkaa nɔ́ ḿɔrɔnîi maa kpɛɛ̂i muluŋ su.
28M̀ɛni ma, ŋá toôi a bɛlɛ-pɛlɛɛ yɛ̂ɛ wúru ƃé fili a mìi,
yɛ̂ɛ seɣe ƃé ŋíliŋ a m̀ii.”
Currently Selected:
Zôo 13: KWB
Highlight
Share
Copy
Want to have your highlights saved across all your devices? Sign up or sign in
