Zôo 12
12
Zôo è Zofa wóo su tòo
1Nya ƃe Zôo è Zofa wóo su tòo ǹyɛɛi,
2“Tɔ̃yâ kpîŋ ma, káa ƃa ǹûai lá gbɔ.
Óoei, káa nɔ́ ƃa dáre-ƃelai ɣéniɛ.
Kà sàa, táre nuu da fé pâi kɛ̂i ɣele ma
3Kɛ́lɛ berei ka mɛni ŋá kàa lai, vé tɛɛ ní ḿâ.
Kátarei fé tɛɛ ní ŋ́ɔ̂i ma.
Mɛni-ŋai ŋí ka môi vé a núu da tɛ̂i mɛni.
4Ǹúui nyii kélee a Ɣâla fɛ̀li gíli tɔ̂ɔ ma a gɛɛ é ŋ̀óo su tooi,
m̀arâai da gɛ̀ nɔ́ a díɣɛlɛ maa sɛŋ,
berei máŋ deniŋ ƃôɔɔi la, a Ɣâla fɛli gɛ́ ŋ̀óo mɛnii.
5Diai mɛni da fé dípôlui da wɔ́lɔ kɛ́ nɔ́ ɣɛ́lɛ maa kulâi diai mɛni kpɔ̂lu sui díkponôi.
Mɛni kpɔ̂lu a wɔ́lɔ láa nɔ́ diai mɔ̃lɛi dîa.
6Ŋúma-ƃela da diai yao maa fé díyêei Ɣâla mɛni mai, díkaa lii-see su.
Dí kíli tɔɔ̂i díkpîŋ wala-wala-laai ma a díɣâla.
7“Ye daa-tulɛ-ŋai marê kɛ́ a gɛɛ dí íteniŋ tɔɔ.
Ye ŋɔni-ŋai marê kɛ́ dí ítare Ɣâla maa mɛni su.
8À wàla kɛ́ tí, dɔara-sãai maa kpɛ́ɛ í dítûa-perei káa
é pɛ́lɛ ǹyɛ̃ɛ-ŋai nyii-ŋai díkaa ǹyá-ŋai sui dîa.
9Núu da káa nîi naa nyii vé gɔ́lɔŋ a gɛɛ Yâwɛɛ yée pɔ̂ɔ káa m̀ɛnii ŋí su?
Vé tí a dɔnɔ kpîŋ.
10Sɛŋ nyii kélee gáa ɣele mai ŋɔfúlu-laai káa Ɣâla yêei,
vúlu-laai nyii a gɛ̀ núu kɛ́ ƃò ɣele mai.
11À kɛ̀ núu a mɛni mɛ̂ni, va maa kpɛ̂ɛ é gáa à kɛ̀ gáa a tɔ̃yâ?
Tɔ̃yâ ma bere ƃé a gɛ̀ la. Bere sii tɔnɔi ŋí nɔ́ ƃé a mii-sɛŋ kɔɔŋ la
é gáa à kɛ̀ ǹɛ́lɛɛi kpaa máŋ ǹyɔ́mɔɔi.
12“Ǹúu-pɔlɔ-ŋai dí tɔ̃yâ da lɛ́ɛ loai kɔ́lɔŋ.
Tãi da pɔ̂lɔ lai, da târe m̀ɛni-ŋai su.
13Táre da wála-wala-laa káa Ɣâla yêei.
Mɛni kpɛtɛɛ da mɛni ŋákaa káa ǹyêei.
14À kɛ̀ Ɣâla a sɛŋ da kàra, núu da fa ŋɔ́nɔ gbɛ̀tɛ naa pôlu ma.
À kɛ̀ Ɣâla a núu sòŋ a luɛ, gbɛ̂ɛ ƃa pɔ̂ri maa-nuui tí maa têei?
Maa nûu fé ma.
15À kɛ̀ Ɣâla a wàla ǹɛɛ naa tuna é pú, ǹɔii a kpâla.
À kɛ̀ a ǹɛɛ naa ǹyái é fɛ́ɛ, a zãai kélee su kàra.
16“Pɔ̂ri káa Ɣâla mì a gɛɛ é ŋɔkpɔara-ƃelai su kara.
Wála-wala-laa káa Ɣâla yêei diai mɛi dílaŋɔɔi da diai da gɛ̀ núu é láŋ.
17A dáre-ƃelai su kɛ́ ǹyɔ̃ɔ,
é gâloŋ-ŋai kíli-ŋa pú.
18A gâloŋ-ŋai díkâloŋ seɣei kûla dîa,
é dímaa ɣíri a luɛ-mâ sêɣe.
19A zâla láa-soŋ-ƃelai díwala-wala-laai kùla díyêei,
é núu mɛi-ƃelai díwala-wala-laai kpera.
20A gɛ́ diai ǹûai da díwoli tɔ̀ɔ dîai dí dímɛi sáa.
É ǹúu-pɔlɔ-ŋai dí mɛni ŋá káa tarei kúla díyêei.
21A Ɣɛ́lɛ maa kûla ǹúu mɛi-ƃelai kponôi,
é ŋ̀wála-wala-ƃelai díwala-walai kúla díyêei.
22A gɛ̀ gbínii é kúla saa-taa,
é kwaa ponoɔɔ pîlaŋ gbíni maa pɔlɔ-pɔlɔɔi su.
23Ɣâla a gɛ̀ núu-suu-ŋa tɔɔ̂i é kpanaŋ, é ŋɔ́nɔ gɛ́ dí kɛ́ a fii kpɛ̂ɛ-ƃela.
À gɛ̀ díƃûu ƃó, é ŋɔ́nɔ gɛ́ díkôlo.
24Ɣâla a ǹúu láa-tuɛ-ƃelai kíli kúla díyêei,
é gɛ́ díkɛ tɛ̀ nɔ́ díkɛ yèŋ dífe ƃɛ́i kɔ́lɔŋ da liî naai.
25À gɛ́ ǹúu láa-tuɛ-ƃelai díkɛ sìa tàka-taka,
díkɛ díyee pɛ̀lɛ-pɛlɛ gbínii su yɛ̂ɛ lɔɔ-kpele-ƃela.”
Currently Selected:
Zôo 12: KWB
Highlight
Share
Copy
Want to have your highlights saved across all your devices? Sign up or sign in
