Ibulu 7
7
Mɛkisɛdɛ ŋɔsâla láa soŋ-nuu-laai
1Mɛkisɛdɛ ŋí è kɛ̀ a Salɛŋ-kaloŋ, gɛ ƃo ŋɔ́nɔ a Ŋ̀âlai Gɛ́tɛi ŋɔsâla láa soŋ-nuu, è Eberaɣɛ̃ɛ káa kulâi kɔ́ kɔ̂i nyíi è kâloŋ-ŋa da-ni paa zui, é lûwa láa ma. 2Nya ƃe Eberaɣɛ̃ɛ è gɔ̃liŋ kélee buu-ɣelei tɛ̀ɛ bɔ. Maa-ŋuŋ, yɛ̂ɛ berei ǹáa su-kulai káa lai, gáa a tɔ̃yâ-laa-kaloŋ, gɛ ƃò ŋɔ́nɔ a Salɛŋ-kaloŋ, nyíi su-kulai ƃa lii-sêe-kaloŋ. 3Ǹâŋ fé ma, kpaa máŋ ǹee, kpaa máŋ zûu-pîlanii. Ŋɔɣele-ŋai kɔ́ɔ pîlanii fé ma, kpaa máŋ ŋɔɣéniɛi kpɛɛ ŋá, kɛ́lɛ, berei moloŋɔɔ̂i la Ɣâla Ǹóŋ mai, gáa nɔ́ a sâla láa soŋ-nuu wɔlɔ-wɔlɔ da wɔlɔ-wɔlɔ.
4Ka gáa berei gɛ́tɛ̂i lai! Zãâi kúnâŋ Eberaɣɛ̃ɛ è gùla gɔ́i sui, è buu-ɣelei tɛ̀ɛ bɔ. 5Liiva ŋɔsuui-su-ƃelai nyíi-ŋai sâla láa soŋ-mɛni káa dípɛrɛ lái, gáa dɔ̂ŋ su a gɛɛ dí ǹûai kɔ̃liŋ buu-ɣelei sɔlɔ ƃo. Zu-kulai ƃa díƃarâai, berei máŋ ǹûai ŋí máŋ dí kùla la Eberaɣɛ̃ɛ ŋɔsuui sui. 6Kɛ́lɛ, nalôŋ ŋí nyíi vé kúla ní dísuui sui, è Eberaɣɛ̃ɛ kɔ̃liŋ buu-ɣelei sɔlɔ ƃô é lûwa láa Eberaɣɛ̃ɛ ma nyíi gono-tee-ŋai díkaa ǹyêei. 7Sîa kélee fé zu a gɛɛ núu pɔlɔ a lûwa làa lôloŋ ma. 8Gáa a sɛŋ a gɛɛ diai da sâai dí nûa-kɔ̃liŋ buu-ɣelei sɔlɔ ƃó, gɛ ƃô ŋɔnɔ a sɛŋ a gɛɛ ǹúui dí maa-sere-faa kɛ̀ a gɛɛ é kɛ́ ɣele mai é nûa-kɔ̃liŋ buu-ɣelei sɔlɔ ƃo máŋ. 9Núu a pɔ̂ri máŋ môi a gɛɛ Liivai ǹyaa kpîŋ nyíi a nûa-kɔ̃liŋ buu-ɣelei sɔlɔ ƃô é gɔ̃liŋ buu-ɣelei tɛ́ɛ Eberaɣɛ̃ɛ sarâi, 10kpɛ́ni fêi, è kɛ̀ niî Eberaɣɛ̃ɛ kponôi tãi Mɛkisɛdɛ è gàa lai.
11Eêi kɛ̀ núu eêi pɔ̂ri maa-waa-laa sɔlɔ ƃôi Liiva-ŋai kɛ́ɛ a sâla láa soŋ-nuu sarâi kpɛ́ni fêi, ŋɔsâla láa soŋ-mɛnii yée mu ƃe ǹûai dí dɔ̂ŋ sɔlɔ ƃô naai, gɛ̀ ní le-mɛni ƃe fɛ̂ɛ dí sâla láa soŋ-nuu da kpɛni lɛ́ la yɛ̂ɛ Mɛkisɛdɛ, é tɛ́ɛ ǹúui ma nyíi gáa yɛ̂ɛ Eelɔŋ? 12Kpɛ́ni fêi, à kɛ̀ maa-faleŋ káa zâla láa soŋ-mɛnii su, gɛ̀ ní maa-faleŋ káa máŋ dɔ̂ŋ su. 13Ǹúui dí mɛni-ŋai ŋí ƃò é pîlaŋ mai, a kulâi núu-suu da kpɛni su, nuu-suui nyíi núu da fé niî wɔ́lɔ tíi kɛ́ ni mì Ŋ̀âla-teƃelei mai. 14Gáa a tɔ̃yâ a gɛɛ Kúnuu-namui è kùla Zudasi ŋɔsuui su, ǹyaŋ Mose fé sâla láa soŋ-nuu-mɛni ƃo ni é pîlaŋ nuu-suui ti ma.
Zâla láa soŋ-nuui nyii gɛ̂ɛi yɛ̂ɛ Mɛkisɛdɛi
15Mɛnii ŋí a kɛ̂ kpɔ́ a tɔ̃yâ a zu ponoɔɔ à kɛ̀ sâla láa soŋ-nuu da kpɛni à kɛ̀ naa yɛ̂ɛ Mɛkisɛdɛ, 16nyíi kɛ̀ a sâla láa soŋ nuui, ve kɛ́ ní nɔ́ a sâla láa soŋ-nuu, kpɛ́ni fêi, dí mò a gɛɛ fɛ̂ɛ sâla láa soŋ-nuu é kúla núu sii da-ni su, kɛ́lɛ, è kɛ̀ a sâla láa soŋ-nuu a ŋwɔlɔ-wɔlɔ fulu-laai nyíi gɔ̃yɛŋ fé mai ŋɔwala-walai. 17Kpɛ́ni fêi, dí m̀aa-sere-faa kɛ̀, dîyɛɛi,
“Íkaa a sâla láa soŋ-nuu wɔlɔ-wɔlɔ da wɔlɔ-wɔlɔ
yɛ̂ɛ berei Mɛkisɛdɛ è kɛ̀ la a sâla láa soŋ-nuui.”
18Mɛni ma, dɔ̂ŋ pɔlɔi kɛ̀ díyêei, ǹáâi a dee, kpɛ́ni fêi, vii-kpɛɛi gɛ ƃo nɔ kpɛni-kpɛni. 19Kpɛ́ni fêi, dɔ̂ŋ fé sɛŋ da kélee kɛ́ ni a maa waa. Mɛni ma, kili-kɛ-zu lɛ́lɛɛ kɔ́ɔ a pîlaŋ, nyíi kwa lɛ̂ɣɛ Ɣâla kɔlɛ zarâi.
20Ǹyaŋ gili-kɛ-zu lɛ́lɛɛi ŋí kɔ́ɔ fé pîlaŋ ní fóo-woo ŋɛ́i pôlu. 21Diai wɔ́lɔ kɛ̀ a sâla láa soŋ-ƃela a maa-ŋuŋ, dí dítii-ŋai sɔlɔ ƃô fóo-woo ŋɛ́i pôlu, kɛ́lɛ, dí ǹúui ŋí lɛ̀ a sâla láa soŋ-nuu a fóo-woo.
“Kúnuu-namui a vóo,
ǹyaŋ vé pâi ŋɔkili-ŋa-siai maa fálenîi.
‘Íkaa a sâla láa soŋ-nuu wɔlɔ-wɔlɔ da wɔlɔ-wɔlɔ.’ ”
22Nyíŋi a Zîsɛ kɛ̀ a ǹúui a kpanaŋ-woo lɛ́lɛɛ kɛ̀ a tɔ̃yâi.
23Zâla láa soŋ-ƃelai maa-ŋuŋ-ŋai dí kɛ̀ a dítamaa, kpɛ́ni fêi, saa è kɛ̀ dísiɣêi dítii-ŋai mɛi tɛi-tɛi. 24Kɛ́lɛ, zâla láa soŋ-nuui ŋí káa nɔ́ a sâla láa soŋ-nuu a tãi kélee. Kpɛ́ni fêi, gáa nɔ́ ɣele mâ wɔlɔ-wɔlɔ da wɔlɔ-wɔlɔ. 25Mɛni ma, pɔ̂ri káa mì a gɛɛ é diai ƃálo wɔlɔ-wɔlɔ da wɔlɔ-wɔlɔ da lɛ̂ɣɛ Ɣâla kɔlɛ zarâi. Kpɛ́ni fêi, gáa ɣele ma a tãi kélee a gɛɛ é tɔ́ɔ dímɛni mà.
26È kɛ̀ a mɛni lɛ́lɛɛ a gɛɛ fɛ̂ɛ sâla láa soŋ-nuu kɛ́ɛ ŋí é kɛ́ kúyêei, maa waa, zɔŋ fé mà, pɔ́ɔ fé mà, da sɔnyɔ̂ŋ-ƃela díŋa kɔlɛɛ, maa tɛɛ a gɛ́tɛ ŋelei mɛi. 27Vé kɛ́ ní a sɛŋ a gɛɛ fɛ̂ɛ é sâla kúla a fólo kélee, maa-ŋuŋ gbîŋ-sɔnyɔ̂ŋ mɛni ma, naa pôlu ma ǹûai dísɔnyɔ̂ŋ mɛ̂ni mà, yɛ̂ɛ berei zâla láa soŋ-ƃela gbeli-ŋai dí gɛ̀ lai. È zâlai kélee kùla nɔ́ tɔnɔ a tãi è gbîŋ tɛ̀ɛ lai. 28Tɔ̃yâ ma, dɔ̂ŋ a núu lɛ̀ ŋɔfii-kpɛɛi su a gɛɛ a kɛ̀ a sâla láa soŋ-nuu, kɛ́lɛ, Ɣâla ŋɔfóo-wooi nyíi pà dɔ̂ŋ pôlu mai, a Ɣâla Ǹóŋ lɛ̀ nyíi maa waai wɔlɔ-wɔlɔ da wɔlɔ-wɔlɔi.
Currently Selected:
Ibulu 7: KWB
Highlight
Share
Copy
Want to have your highlights saved across all your devices? Sign up or sign in
