Zɛnɛse 22

Ɣâla è mò Eberaɣɛ̃ɛ ma a gɛɛ é Aise kula a sâla

1M̀ɛni-ŋai ŋí pôlu ma, Ɣâla è Eberaɣɛ̃ɛ su kɔ̀ɔŋ. È dòli ǹyɛɛ ma, “Eberaɣɛ̃ɛ!” Eberaɣɛ̃ɛ ǹyɛɛ ma, “Ńyãa ká ŋí!”

2Ɣâla ǹyɛɛ ma, “Ílii ma loŋ Aise siɣe, nyii í ŋ́wɛlini a ŋánaai, í lí la Mɔraya lɔii su, í gula naa a kéreŋ sala ǹyée-ŋai dɔnɔ ma nyii ŋa pâi ǹɛ̂i yâi.”

3Nya ƃe Eberaɣɛ̃ɛ è mu sìɣe a ɣele-wala pɛpɛ é ŋɔwɛlɛ-sôoi maa ɣíri, é ŋɔtíi-kɛ-ƃelai veerɛ síɣe da ǹóŋ Aise. È gɔii têe géreŋ salai mɛni ma. È mu síɣe é lí ƃɛ́i mâ Ɣâla è naa lɛ̀ mai. 4Ŋ̀ele-kûui zaaƃa-ɣelei Eberaɣɛ̃ɛ è ŋuŋ mu sìɣe é maa kwaai mâ káa kwaa kôyaa ma. 5Nya ƃe Eberaɣɛ̃ɛ è mò ŋɔtíi-kɛ-ƃelai dîa ǹyɛɛi, “Ka lɛɛ ƃɛ́ ŋwɛlɛ-sôoi kɔlɛ, kwa ǹôloŋ kwa liî mánaa tí kú Ɣâla fɛli kú pá pôlu.”

6Eberaɣɛ̃ɛ è géreŋ salai kéreŋ kɔii sìɣe é ǹáa ǹóŋ Aise ŋûa é ŋɔŋ sóŋ ǹyée ŋá da móai. Nya ƃe da ǹóŋ dí lì. 7Aise è mò ǹâŋ Eberaɣɛ̃ɛ ma ǹyɛɛi, “Ńâŋ!”

Ǹâŋ ǹyɛɛ mai, “Ńoŋ, ńyãa ká ŋí.”

Aise ǹyɛɛ mai, “Gáa, ŋɔŋ káa ƃɛ́ da gɔii, kɛ́lɛ m̀álai kɔɔ géreŋ salai kula mɛni ma?”

8Eberaɣɛ̃ɛ ǹyɛɛ mai, “Ńoŋ, Ɣâla ǹyaa kpîŋ a pâi málai tɛɛ̂i géreŋ salai mɛni ma.” Nya ƃe dífeerɛ dí lì.

9Tãi dí sèri la ƃɛ́i Ɣâla è nàa lɛ̀ Eberaɣɛ̃ɛ mai, Eberaɣɛ̃ɛ è Ɣâla-teƃele tɔ̀ɔ naa é gɔii pú ŋ̀á a ǹɛ́lɛɛ. È ǹóŋ Aise sòŋ é ŋíri é ǹáa gɔii mɛi zâla-kula teƃelei ŋá. 10Eberaɣɛ̃ɛ è nâa móai sìɣe a gɛɛ é ǹóŋ páa la. 11Kɛ́lɛ Yâwɛɛ ŋɔkélai wóo è kùla ŋ̀elei su é dóli ǹyɛɛ mai, “Eberaɣɛ̃ɛ, Eberaɣɛ̃ɛ!”

Eberaɣɛ̃ɛ ǹyɛɛ mai, “Ńyãa ká ŋí.”

12Ŋ̀âla-taa-kelai ǹyɛɛ mai, “Ífe íyee pɛ̀lɛ ǹôloŋ ma, kpaa máŋ í mɛni da kélee kɛ̀ la, kpɛ́ni fêi, ŋâa gɔ́lɔŋ nâa a gɛɛ ƃa yào Ɣâla ma, ífe ílii ma loŋ kùla ní ǹyêei.”

13Nya ƃe Eberaɣɛ̃ɛ è ŋuŋ mu sìɣe é gɔlɛ mâ káa. È ƃála-sirɛ tɔnɔ káa tɔɔ̂ni bôlu-pere sɛŋ da piliɛɛ m̀ĩla. Eberaɣɛ̃ɛ è lì é m̀álai kúla, é géreŋ salai kúla la ǹóŋ pɔ́ ŋá. 14Nya ƃe Eberaɣɛ̃ɛ è maa kwaai tí ma tòli a “Yâwɛɛ a pâi dɛ̂ɛi” yɛ̂ɛ berei da mò la tãi ŋí sui, “Yâwɛɛ a pâi dɛ̂ɛi ŋɔyéei ma.”

15Ŋ̀âla-taa-kelai wóo è kùla ŋ̀elei su é Eberaɣɛ̃ɛ tóli a tãi veerɛ-ɣelei, 16Ǹyɛɛ mai, “Yâwɛɛ ǹyɛɛ, ŋá ŋ́gono tée ńyãa kpîŋ ńyêei a gɛɛ tãi nɔ́ ífe íkpɔɔi loŋ maa kɔ̃ɔ ní la mâi, 17ŋa pâi lûwa lâai yâ a zu kɛ́tɛ, ŋá ísuui táma yɛ̂ɛ Bɛmɛlɛŋ-kao-ŋai díkaa ŋ̀elei sui da Yúo ma ŋãyai. Ísuui a pâi ŋɔkpɔara-ƃelai yée mɛi ɣâlei. 18Ǹɔii-ŋuŋ-ŋai kélee da pâi ḿarê kɛ̂i a gɛɛ ŋá kpɔ́ŋ dîa ísuui sârai. Kpɛ́ni fêi, í ŋ́oo mɛ̀ni.” 19Nya ƃe Eberaɣɛ̃ɛ è pà pôlu ŋɔnûai pɔ́, dí dímu síɣe da dîa-ni dí lí Bɛɛsiba ƃɛ́i Eberaɣɛ̃ɛ è sèe naai.

Neɔ suu pîlaŋ-pere

20Mɛni-ŋai ŋí kɛ́ɛ pôlu ma Eberaɣɛ̃ɛ è mɛ̀ni a gɛɛ Maka da Eberaɣɛ̃ɛ ǹêɣe Neɔ dí nîa-pɛlɛɛ maa sɔlɔ ƃô. 21Dínîa-pɛlɛɛi láa ká ŋí. Uzi ƃé kɛ̀ a díloŋ maa-ŋuŋ, Buzi kɛ́ ƃò a ǹêɣe-surɔ̂ŋ da Kemuɛ nyii kɛ̀ a Araŋ ǹâŋ, 22da Kese é pɛ́lɛ Azo ma da Pida, Zila da Bɛtuɛ. 23Bɛtuɛ ƃé Lubɛka maa sɔlɔ ƃô. Nîa-pɛlɛɛ lɔ́ɔlu mɛi saaƃai ŋí ƃe Maka da Neɔ dí dímaa sɔlɔ ƃô. 24Neɔ ŋɔnɛnîi veerɛ-ɣelei nyii da kâa kɛ̀ ma Leumai, da ǹyaa dí Teba maa sɔlɔ ƃô da Gaaŋ é pɛ́lɛ Taasa ma da Maaka.

Currently Selected:

Zɛnɛse 22: KWB

Highlight

Copy