Galesiɛŋ 1
1
La-ti-maa
1Ńyãa Pɔ̂ɔ ŋ́gaa a sia-nuu. Núu-kpune fé ŋ́gɛ̀ ní a sia-nuu, kpaa máŋ fé kɛ́ ni a sia-nuu núu-kpune sarâi, kɛ́lɛ, ŋá kɛ̀ a sia-nuu Zîsɛ Kôrai sarâi da Ǹaŋ-nuui Ɣâla nyíi Kôrai mu siɣe saa yêei, 2ńyãa kwa ḿarâai kélee nyíi-ŋai díkaa ŋ́gɔlɛi,
Kôrai-toli-kpɔŋ-ŋai nyíi-ŋai díkaa Galesiai.
3Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai, 4nyíi gbîŋ tɛ̀ɛ kúsɔnyɔ̂ŋ mɛni ma a gɛ́ɛ é kúkula ŋ̀wana-lɔ̂ɔ ɣeniɛi ŋí su yɛ̂ɛ berei Kúnâŋ Ɣâla ŋɔnîa-mɛnii káa lai; 5nyíi fólo-laa káa nɔ́ ma wɔ́lɔ-wɔlɔ da wɔlɔ-wɔlɔi. É kɛ́ tí.
Duŋ Lɛ́lɛɛi da kpɛ́ni fé naa
6Gulaâi a ńyãa a gɛ́ɛ kákaa káyee kulâi Kôrai mu a maa félaa nyíi kátòli ŋɔƃɛlɛ-sêei sui, kakɛ tinaŋ tuŋ da kpɛni pɔ́naa pere. 7Zu-kulâi fa a gɛ́ɛ tuŋ da kpɛni káa naa, kɛ́lɛ, núu da-ni díkaa naa da káfũa-fũai, díkɛ ŋ̀wɛli dí Kôrai ŋɔtuŋ lɛ́lɛɛi maa faleŋ. 8Kɛ́lɛ, à kɛ̀ máŋ a kúa, kpaa máŋ Ɣâla-taa-kela é kúla ŋ̀elei su é tuŋ da kpɛni ƃó é kúla nyíi pôlu ku mò kâai, tɔɔ náɣâŋ é kɛ́ maa-nuui ma. 9Yɛ̂ɛ berei ku mò la káa a maa-ŋuŋ, ŋ́gaa ŋɔ́nɔ m̀ôi kâa, À kɛ̀ núu da káa tuŋ da kpɛni ƃôi káa é kúla nyíi pôlu ká zɔlɔ ƃôi, tɔɔ náɣâŋ é kɛ́ maa nuui ma.
10Ŋ́gaa ŋɛ́i lɛ́lɛɛ̂i núu-kpune yêei, kpaa Ɣâla? Kpaa máŋ ŋ́gaa kɔ̂i a gɛ́ɛ ŋá núu-kpune líi láa? Ŋâi kɛ̀ núu-kpune líi lâai, fêi pɔ̂ri kɛ̂i a Kôrai yée-mu-nuu.
Berei Pɔ̂ɔ è Duŋ Lɛ́lɛɛi sɔlɔ ƃô la gɛ́ maa-tîi kɛ̀i
11Ŋánûa, tɔ̀ɔ ŋá nɛ̀ɛ naa ká gɔ́lɔŋ a gɛ́ɛ Duŋ Lɛ́lɛɛi ŋá mòi, ve a núu-kpune ŋɔtuŋ lɛ́lɛɛi. 12Kpɛ́ni fêi, fé gula ni núu-kpune yêei, kpaa máŋ núu-kpune fé ǹɛ́ ní ḿâ, kɛ́lɛ, Zîsɛ Kôrai ƃe nɛ̀ ḿâ. 13Ka ŋáfulu-laai kɔ́ɔ pîlanii maa-mɛni mɛni Zûu-ŋai Díɣâla-m̀ɛnii su, berei ŋá Ɣâla ŋɔtóli-kpɔŋ kpɔ̂ara la a ŋ̀wana-lɔ̂ɔ-pere, ŋ́gɛ kɔ̀ a gɛ́ɛ ŋá zu karai. 14Ńdɔɔ̂i è kɛ̀ kpɔ́ a gɛ́tɛ Zûu-ŋai Díɣâla-mɛnii su é tɛ́ɛ ḿbɔri támaa ma ŋánûai sama. Maa-mɛni ƃe ŋá kɔ̀ kpɔ́ la a gbanaŋɔɔ ŋánûa-pɔlɔ-ŋai tua-perei maa-mɛni ma. 15Kɛ́lɛ, tãi ǹúui ńzîɣe dí lɛ́ɛ pâi ḿaa sɔlɔ ƃôi, è ńdòli la ŋɔƃɛlɛ-sêei sarâi, 16ǹíi è làa a gɛ́ɛ è Ǹóŋ lɛ̀ ḿâ a gɛ́ɛ ŋá maa-mɛni ƃó Zɛ̃tai-ŋai sáma, ǹyaŋ fé ŋuŋ pîlaŋ ní a núu-kpune da. 17Fé li ní Zerusâlɛŋ diai pɔ́ kɛ̀ a sia-ƃela ńduɛi, kɛ́lɛ, ŋá lì Arebia, ŋá lene ŋɔ́nɔ pôlu Dimɛika.
18Kóraŋ saaƃa tɛ̂ɛ pôlu ma, ŋá lì Zerusâlɛŋ Sîfa naa kâai, ŋá gɛ́ naa a ɣele kûu puu kao lɔ́ɔlu. 19Kɛ́lɛ, fé zia-ƃelai da kaa ni naa, fɛ̂ɛ nɔ́ Zĩi, nyíi kɛ̀ a Kúnuu-namui ǹêɣei. 20(Mɛnii ŋí ŋá bɔ̃̀yɛ kápɔ naai, Ɣâla è gɔ́lɔŋ a gɛ́ɛ fé lɛ́ɛ kɛ̂i!) 21Nàa pôlu ma ŋá lì Siria-kpiniŋ su da Sɛlisia. 22Ǹyaŋ Kôrai-toli-kpɔŋ ŋai kɛ̀ Zudai dífe niî kɛ̀ ŋ́gɔlɔŋ ni ŋ́gbono mai, 23dí mɛ̀ni nɔ́, dîyɛɛi, “Ǹúui wɔ́lɔ kúkpɔ̀arai gáa nâa ǹaa-lai maa-mɛni ƃôi nyíi è wɔ́lɔ kɔ̀ a gɛ́ɛ é zu karai.” 24Ǹyaŋ dí Ɣâla ŋɔfólo-laai maa tɛ̂ ḿaa-mɛni ma.
Currently Selected:
Galesiɛŋ 1: KWB
Highlight
Share
Copy
Want to have your highlights saved across all your devices? Sign up or sign in
