Ɛtɛ 9
9
Zuda-ŋai dí díkpɔara-ƃelai yée mɛi ɣâle
1Ŋ̀áloŋ buu káo feerɛi nyii da dòli a Adai ŋɔfólo puu káo saaƃai è sèri. Ŋ̀ele kûui ŋí ƃé kɛ̀ a ŋ̀elei gɔlɔi Pɛsia kaloŋ Atasɛra è dɛ̀ɛ Zuda-ŋai kélee páa mɛni ma ǹɔii kpîniŋ-ŋai sui, dí ŋàa see kɛ́ la. Ŋ̀ele kûu tɔnɔi ŋí ƃé kɛ̀ máŋ a ŋ̀elei Zuda-ŋai díkpɔara-ƃelai díkɛ̀ a díkpɛtɛɛ la a gɛɛ dí díwala-walai kúla díyêei díkɛ ƃò dímɛi. Kɛ́lɛ m̀ɛnii ŋí è pène ŋ̀á a dia, Zuda-ŋai dí díyee mɛi ɣále. 2Zúu-ŋai díkoli-ŋa dí kɛ̀ Gâloŋ Atasɛra ŋɔlɔii kpîniŋ-ŋai su taa-lee-ŋai su. Dí díkpîŋ kpɛ̀tɛ a gɛɛ núu da a kɔ́ pɛ̀lɛ dîa, da dîa-ni dí gɔ́. Ǹɔii kpîniŋ-ŋai su-ƃelai kélee dí yào Zuda-ŋai dia. Núu da fé kɛ̀ pɔ̂ri ní kɛ̀ tɔɔ̂i da ŋɛ́i é kɔ́ bɔ́. 3Ǹɔii láa túɛ-ƃelai, ǹɔii-ƃelai da diai kɛ̀ a gâloŋ ŋɛ́i gao-ŋa ǹɔii kpîniŋ-ŋai sui, dí kpɔ̀ŋ Zuda-ŋai dîa, kpɛ́ni fêi díkɛ̀ yaôi Mɔdikai ma. 4Mɔdikai tɔɔ̂i è kɛ̀ a gɛ́tɛ ŋɔwála-wala-laai su kɛ́ kɛ̀tɛ gâloŋ-pɛrɛi mu. Ǹáa è tàa-taa ǹɔii kpîniŋ-ŋai su gwaa kélee mâ. 5M̀ɛni ma Zuda-ŋai dí díkpɔara-ƃelai kélee pàa a ƃóa-sɔkpɔ-ŋa. Dí dísu-kara yɛ̂ɛ berei díkɛ̀ ŋ̀wɛ̂lii dí gɛ̀ lá a díkpɔara-ƃelai.
6Maa ɣelei tí, Zuda-ŋai dí núu ŋuŋ lɔ́ɔlu (500) pâa Susa taa-leei su nyii gáa a ǹɔii ŋɔtaa-lêe kɛ́tɛi. 7-10Amedata ǹóŋ-surɔŋ Emaŋ nyii kɛ̀ a Zuda-ŋai díkpɔara-nuui, ǹônii-sinaa puui díkɛ̀ ǹûai ŋí sáma máŋ. Dia ƃé kɛ̀ a Pasaŋdata, Daafoŋ, Asipata, Porata, Adalia, Aridata, Pamasita, Arisai, Aridai da Vaizata. Kɛ́lɛ dífe lɛɣɛ ní díkɔ̃liŋ da ma.
11Diai kélee dí dípàa Susa taa-leei sui, dí díkɔni sîɣe dí dɛ̀ɛ gâloŋ pɔ́ a ŋ̀ele tɔ̂nɔi tí. 12Gâloŋ è mò Ɛtɛ ma ǹyɛɛi, “Zuda-ŋai daâ kpakolo ŋuŋ lɔ́ɔlu (500) da Emaŋ ǹônii-sinaa puui páa Susa taa-leei su. À kɛ̀ dí núu kɛ́ɛ ŋí pàa daa-leei su, dí dámaa pàa ǹɔii kpîniŋ-ŋai su. Lé ƃé ya ŋ̀wɛ̂lii ŋɔ́nɔ ŋá gɛ́ yɛ̂ɛi? M̀ɛnii ya ŋ̀wɛ̂lii ŋɔ́nɔi, mó mâ. Ŋa pâi gɛ̂i.”
13Ɛtɛ è ŋ̀óo su tòo ǹyɛɛ mai, “Ŋánuu-namui, à kɛ̀ gáa a ílii láa mɛni, ǹɛɛ naa Zuda-ŋai Susa taa-lêei sui dí sía tínaa a gɔlɔi ŋí wóo nyii í gbɛ̀tɛ ŋ̀elei ŋí mɛni mai. Veerɛi, fáa ma a gɛɛ dí Emaŋ ǹônii sinaa puui poma sɛ̂lɛŋ ǹyeŋkêŋ-ŋai dîa tínaa.” 14Gâloŋ è fàa Ɛtɛ wóo ma. È wála-wala-laa tɛ̀ɛ Zuda-ŋai pɔ́ a gɛɛ dí Emaŋ ǹônii-sinaa puui poma sɛ̂lɛŋ ŋ̀úru yeŋkeŋ-ŋai ma Susa taa-leei su. 15Zuda-ŋai dí díŋaa tɛ̀ gîe ma Susa taa-leei su a Adai ɣaloŋ ŋɔfólo puu káo náaŋ ɣele dí kpakolo ŋuŋ saaƃa (300) páa. Kɛ́lɛ dífe díkɔ̃liŋ da siɣe ní.
16Zuda-ŋai kɛ̀ ǹɔii kpîniŋ kpéli-ŋai sui, dia máŋ dí díŋaa tɛ̀ ma a gɛɛ dí díkpîŋ maa kɔ̃ɔ díkpɔara-ƃelai yêei. Dí núu wála buu lɔ́ɔlu mɛi feerɛ káo lɔ́ɔlu (75,000) pàa. Kɛ́lɛ dífe díkɔ̃liŋ da siɣe ní. 17Dí m̀ɛnii ŋí kɛ̀ a Adai ɣaloŋ ŋɔfólo puu káo saaƃa ɣele, dí dífii tɔ́ɔ a ŋɔfólo puu káo náaŋ ɣele. Dí kúu kɛ̀ dí lii-nɛ̃ɛ kula. 18Zuda-ŋai kɛ̀ Susa taa-leei sui, dí ŋ̀ele kûui buu káo lɔ́ɔlui sìɣe a kúu kɛ́tɛ kɛ́ ɣele da lii-nɛ̃ɛ kula ɣêle. Kpɛ́ni fêi dí díkpɔara-ƃelai pâa a ŋ̀ele kûui buu káo saaƃai da buu káo náaŋ, dí dífii tɔ́ɔ a ŋ̀ele kûui buu káo lɔ́ɔlui. 19M̀ɛnii ŋí ƃé a gɛ́ diai a Zuda-ŋai díkaa daa pɛlɛɛ-pɛlɛɛi sui da Adai ŋɔfólo puu káo náaŋ ŋí sìɣe la a ɣele kûu kɛ́tɛ. Da kúu kɛ̀ a ŋ̀ele kûui ŋí, dí lii-nɛ̃ɛ kula dí sama-sãa tɛ̀ɛ díkîe-ni pɔ́.
Dí Puriŋ ɣelei sîɣe a ɣele kɛ́tɛ
20Mɔdikai è m̀ɛni-ŋai ŋí kélee pɔ̃yɛ kɔlɔ ma é ǹâai kɛ́. È gɔlɔi ŋí da-ŋa tɛ̀ɛ Zuda-ŋai pɔ́ naa gâloŋ Atasɛra ŋɔlɔii kpîniŋ-ŋai kélee su, 21a gɛɛ dí Adai ɣaloŋ ŋɔfólo puu káo náaŋ da gáo lɔ́ɔlui síɣe a ɣele kûu kɛ́tɛ dífulu-laai su a kóraŋ kélee. 22È mò dîa a gɛɛ dí ŋ̀ele-ŋai ŋí síɣe a ɣele kɛ́tɛ-ŋa, kpɛ́ni fêi, ŋ̀ele-ŋai ŋí ƃe dí ŋuŋ ma ƃô sɔlɔ ƃô la, dílii too pôlui é pene a lii-nɛ̃ɛ, díwɔlɔi é pene a ɣɛ́lɛ. È mò dîa máŋ a gɛɛ dí ŋ̀ele kûu-ŋai ŋí mɛi káa a ǹɛ́lɛɛ, díkɛ kúu kɛ̀ a maa ɣele-ŋai, díkɛ lii-nɛ̃ɛ kula, díkɛ dímii-sãa sama-sãa tɛɛ díkîe-ni pɔ́, díkɛ sama-sãa tɛ̀ɛ gôlo-ƃelai pɔ́. 23Nya ƃe Zuda-ŋai dí díyee sèe Mɔdikai ŋɔkɔlɔi mû díkɛ sìa a ŋ̀óo.
24Zuda-ŋai dí m̀ɛni-ŋai kélee kɛ̀ kpɛ́ni fêi, Emaŋ è díkpɔ̀ara a ŋ̀ánaa. Emaŋ ǹâŋ láa ƃé kɛ̀ a Amedata nyii kùla Aga ŋɔsuui sui. Aga ŋɔsuui su-ƃelai sáma, Emaŋ ƃé kɛ̀ a Zuda-ŋai kpɔara-nuu. Emaŋ è gbɛ̀tɛ a gɛɛ é Zuda-ŋai su kara. M̀ɛni ma è kpɛɛŋ tôo nyii a dòli a Puriŋ Ibulu-wooi sui a gɛɛ é ŋ̀ele kûui kɔ́lɔŋ a pɔ̂ri m̀ɛnii ŋí kɛ̂i lai. 25Ɛtɛ è lì gâloŋ pɔ́ naa é m̀ɛnii ŋí su kula ma. Nya ƃe gâloŋ è kɔlɔ tɛ̂ɛ ǹɔii kpîniŋ-ŋai su a gɛɛ m̀ɛni nyɔ́mɔɔi Emaŋ è gbɛ̀tɛ Zuda-ŋai mɛni mai, dí gɛ́ a ǹyaa Emaŋ. Dí zɛ̀lɛŋ ǹyeŋkêŋ-ŋai dîa da ǹônii-sinaai. 26M̀ɛni ƃé Zuda-ŋai dí ŋ̀ele kûu-ŋai ŋí kélee láa sèe la a Puriŋ dísîi-wooi su. M̀ɛni-ŋai kélee kɛ̀ a dia da nyii-ŋai dí gàai dí gélee pɔ̃yɛɛ kɔlɔ ma. 27Mɔdikai è ŋ̀ele feerɛi ŋí mɛi káa mɛni pɔ̃yɛ kɔlɔ ma é gɛ́ a tɔ̂ŋ a gɛɛ Zuda lonii kélee díkɛ́ sìa a ŋ̀óo a kóraŋ kélee da pâi díyee seêi Zuda-ŋai dítûa-perei mui. 28Zuda-ŋai kélee dí díyee sèe dɔ̂ŋ ŋí mu. Dí fàa ma a gɛɛ Puriŋ ɣele feerɛi ŋí mɛi káa mɛni é kɛ́ a kpà Zuda-ŋai kélee dîa, díkɛ maa pêle kɛ̀ díkɛ maa lii-nɛ̃ɛ kùla a kóraŋ kélee ǹɔii kpîniŋ-ŋai su. Dífe wɔ́lɔ ǹia dímaa mɛni ma dífulu laai su.
29Nya ƃe Abiai ǹóŋ-nɛnii Ɛtɛ nyii kɛ̀ a gâloŋ ŋɔnɛnîi kɛ́tɛi da Mɔdikai dí ŋɔ́nɔ kɔlɔ kpânaŋ pɔ̃yɛ dí náɣâŋ gɔlɔi ma nyii dí bɔ̃yɛ é pîlaŋ Puriŋ mɛnii ma a gɛɛ ǹûai dí ŋ̀ele kûu-ŋai ŋí maa mɛ̂ni siɣe a gbanaŋɔɔ. 30Dí gɔlɔi ŋí tàa-taa ǹɔii kpîniŋ ŋuŋ tɔnɔ pôlu buu feerɛ kao lɔ́ɔlu mɛi feerɛi (127) su tɛi-tɛi Zuda-ŋai pɔ́naa. Dí ǹûai líi kula wôo-ŋa pù gɔlɔi ŋí su a tɛɛ-ŋa. 31Dí mò dîa a gɛɛ dífe yào ŋ̀ele kûu-ŋai ŋí maa lii-nɛ̃ɛ kula mɛ̂ni ma ƃɛ́i-ŋai kélee díkaa naai. Dí mò dîa máŋ a gɛɛ dísuui su-ƃelai díkɛ sûŋ siɣêi díkɛ maloŋ see ƃò kóraŋ kélee su wɔ́lɔ-wɔlɔ da wɔlɔ-wɔlɔ yɛ̂ɛ berei da sûŋ sìɣe la dí kɛ́ gúu da kpɛ́ni-ŋai mɛi kâa lai. Dí kɛ́ gɛ̂i yɛ̂ɛ berei gâloŋ ŋɔnɛnî kɛ́tɛi Ɛtɛ da Mɔdikai dí kɔlɔi è mò la dîai. 32Gâloŋ Atasɛra ŋɔnɛnî kɛ́tɛi Ɛtɛ ƃé Puriŋ mɛi káa pere maa tɔ̂ŋ pɔ̃yɛ mɛni maa wala-walai tɛ̂ɛ. Dí dɔ̂ŋ ŋí pɔ̃yɛ kɔlɔ ma dí ǹâai kɛ́.
Currently Selected:
Ɛtɛ 9: KWB
Highlight
Share
Copy
Want to have your highlights saved across all your devices? Sign up or sign in
