Ifisiɛŋ 2
2
Ɣâla a kúƃàlo ƃɛlɛ-sêe sarâi
1È ká kɛ̀ a káfulu tãi ka kɛ̀ la a kasaa tɔ̂ŋ karaa sarâi da sɔnyɔ̂ŋ. 2Ká sia tɔ̂ŋ karaa su da sɔnyɔ̂ŋ a maa-ŋuŋ. Ká kɛ́ ŋ̀éniɛi ŋí su tua-perei pôlu, ká kɛ́ nyînaŋ nyɔ́mɔɔ-ŋai díkâloŋ pôlu, nyíi gáa tíi kɛ̂i diai sama da Ɣâla wóo pìlii. 3Kú kɛ̀ nyíi-ŋai ŋí sama a maa-ŋuŋ, diai díkɛ ɣeniɛi kɛ̀ a díkpîŋ-tua-pere-nyɔŋ maa-sɛŋ-wɛliɛi. Kú kɛ́ kúkili-ŋa-siai da kúkponôi dísɛŋ wɛliɛɛi pôlu. Mɛni ma kúkpîŋ tua-perei su Ɣâla ŋɔtɔŋ-kpɛ́-maai è kɛ̀ kúmɛni ma nɔ́ yɛ̂ɛ núu kpeli-ŋai. 4Kɛ́lɛ, Ɣâla ŋɔmaloŋ-kaai kɛ́tɛ̂i, kpɛ́ni fêi, wɛli-kɛ-maa kɛ́tɛ káa ǹyêei kúmɛni ma, 5berei máŋ kú kɛ̀ a kúsaa la kútɔ̂ŋ karaai sarâi. Ǹyaa ƃe kúkɛ̀ fulu-laa su kwa Kôrai-ni (ƃɛlɛ-sêe sarâi ƃe ka ƃalo la), 6è kúmu siɣe saa yêei gîe ma kwa Kôrai-ni. È kúkɛ̀ kwa dîa-ni kú see kwaa tɔnɔ ma Ɣâla-taa Zîsɛ Kôrai sarâi. 7È nyíŋi kɛ̀ a gɛ́ɛ tãi pâi pâi é ŋɔƃɛlɛ-sêe su kɛ́tɛi lɛ́ sɔŋ-lɛlɛ-pere su Zîsɛ Kôrai sarâi. 8Kpɛ́ni fêi, ƃɛlɛ-sêe sarâi ƃe ká ƃálo la laa-la sarâi. Kákpîŋ-mɛni kɛ́ɛ fei, gáa a Ɣâla ŋɔsama-sɛŋ 9tíi kɛ́ɛ fei, a gɛ́ɛ núu é yoŋka tée. 10Kpɛ́ni fêi, kúkaa a Ɣâla ŋɔkpɛtɛ-sãa. È kúkpɛ̀tɛ Kôrai kponôi tíi lɛ́lɛɛ-ŋa kɛ́ mɛni ma, nyíi-ŋai Ɣâla è díkpɛ̀tɛ gíli ŋá nàa tuɛ a gɛ́ɛ kú díkɛi.
Ɣâla a pá a kúa pôlu zaa-wurui sarâi
11Mɛni ma é lɛ́ɛ kákili ŋá a gɛ́ɛ kákaa perei su, ká kɛ̂ a Zɛ̃tai-ŋa a maa-ŋuŋ, Zûu-ŋai nyíi-ŋai kɛ̀ a díseɛɛ kpono mâ a núu yeei, dí kátòli a ǹûai dífe see-ní kpono mâ, 12é lɛ́ɛ kákili ŋá a gɛ́ɛ ká kɛ̀ a kákulaa Kôrai m̀a a maa-tãi ti. Káfe kɛ́ ni a Eezuɛ-ŋai ta. Ká kɛ̀ a ŋɔ̃yâ-ŋa Ɣâla ŋɔkono-teei maa-mɛni kpɛtɛɛi mɛni ma. Kili-kɛ-zu fé kɛ́ ni káyêei, Ɣâla fé tela kɛ́ ni káyêei ŋ̀éniɛi su. 13Ká kɛ̀ a kámaa kôyaa Ɣâla ma, kɛ́lɛ, ka nâa lɛɣɛ la Kôrai ŋɔŋãai sarâi. 14Kpɛ́ni fêi, ǹyaa ƃe gáa a kúlii-sêei. A Zûu-ŋai da Zɛ̃tai-ŋai kɛ́ zu tɔnɔ. È gbɔara-siɣãŋ wôlo díloai. 15È Zûu-ŋai dítɔ̂ŋ-ŋai kpera da dísu-woo-ŋai kélee a ŋɔfúlu-laai tɛ̂ɛi, a gɛ́ɛ ǹyaa kpîŋ zarâi é núu nina tɔnɔ kpɛtɛ núu feerɛ pɔ́ɔ ŋá. Berei tí ƃe a lii-sêe kɛ̀ la. 16È nyíŋi kɛ̀ a gɛ́ɛ é pá a Zûu-ŋai da Zɛ̃tai-ŋai pôlu Ɣâla pɔ́ kpono tɔnɔ su zaa-wurui sarâi, a gɛ́ɛ é kpɔara-mɛni kélee kpera. 17È pà é lii-sêe maa-mɛni ƃó kâa, káai kɛ̀ kwaa kôyaa mai da káai kɛ̀ naa kɔlɛi. 18Kpɛ́ni fêi, zarâi ƃe Zûu-ŋai da Zɛ̃tai-ŋai da pere kâa naa a gɛ́ɛ dí pa Nàŋ-nuui pɔ kili-ŋa-sia tɔnɔ su. 19Mɛni ma ŋɔ̃yâ fa ŋɔ́nɔ a káa lɔii da kpɛni su, kɛ́lɛ, ka Ɣâla ŋɔnûai kákaa a lɔii tɔnɔ su-ƃela, ká ƃo a Ɣâla ŋɔnuu-suui su-ƃelai da. 20Kákaa nɔ́ yɛ̂ɛ pɛ́rɛ nyíi dɔɔ̂i Zîsɛ ŋɔsia-ƃelai mɛi da Ɣâla ŋɔlóno kɛ́-ƃelai. Zîsɛ Kôrai ǹyaa kpîŋ káa a bɛ́rɛi zonoŋ-su kɔnii. 21Bɛ́rɛi gwaa kélee puɔɔ̂i gîe ma Kôrai kponôi, ǹyaŋ bɛ́rɛi a ƃɔ̂lɔ a gɛ́ɛ é kɛ́ a Ɣâla-pɛrɛ kɛ́tɛ maa waa Kúnuu-namui kponôi. 22Kápuɔ̂i kákîe-ni ma Kôrai kponôi kwaa ma mɛni ma ƃɛi Ɣâla Ŋɔmɔlêŋ a kɛ̂ naai.
Currently Selected:
Ifisiɛŋ 2: KWB
Highlight
Share
Copy
Want to have your highlights saved across all your devices? Sign up or sign in
