Pitɛ Veerɛi 1
1
Laa-ti-maa
1Ńyãa Samaŋ Pitɛ, ŋ́gaa a Zîsɛ Kôrai yée-mu-nuu da ŋɔsia-nûu,
Diai ǹaa-laa maa-mɛni kpanaŋɔɔi sɔlɔ ƃo nyíi da kúwɔ̂i dí pɔ̂riɛɛi dɔ̃yâ-laai sârai nyíi kùla Kúɣâlai da Kúƃalo-nuui Zîsɛ Kôrai yêei.
2Ƃɛlɛ-sêe da lii-sêe díkɛ káyêei a dámaa dárei sarâi nyíi kùla Ɣâla da Zîsɛ Kôrai Kúnuu-namui yêei.
Ɣâla ŋɔmaa-waa laai sɔlɔ ƃo-ƃelai
3Ŋɔɣâla-laai su wala-walai a sɛŋ kélee tɛ́ɛ kúpɔ nyíi-ŋai díkaa fúlu-laa da Ɣâla-mɛni kɛ́-mɛni mai, dárei sarâi nyíi kùla ǹúui yêei kútòli a gbîŋ-folo-laai da ŋɔkɛ́tɛ-laai. 4È ŋɔkono-tee kpaya-kpaya maa-mɛni kpanaŋɔɔ-ŋai tɛ̀ɛ kúpɔ a gbîŋ folo-laai da ŋɔkɛ́tɛ-laai a gɛɛ nyíi-ŋai sarâi ká kula zu-karai sú nyíi núu-kpune ŋɔtûa-pere nyɔŋ maa-sɛŋ wɛ̂liɛi a gɛ́ ǹɔii sui, ká kɛ́ a Ŋâla-kɛ-perei da sɔlɔ-ƃo-ƃela. 5Sapoi ŋí kpîŋ ma ká kɔ́ kpɔ́ la a pere sii kélee ká kálaa-lai da pú mà a mɛni lɛ́lɛɛ-kɛɛ, ká kámɛni lɛ́lɛɛ-kɛɛi da pú mà a táre. 6Ka kátarei da pú mà a kákpîŋ mɛi-kaa, ká kákpîŋ mɛi-kaai da pú mà a fɔlɔ-fɔlɔ, ká káfɔlɔ-fɔlɔi da pú mà a Ɣâla-mɛni-kɛɛ. 7Ka Ɣâla-mɛni-kɛɛi da pú mà a lii-lɛlɛ kákîe-ni mɛni ma. Ka kálii-lɛ̂lɛi da pú mà kákîe-ni mɛni ma a wɛli-kɛ-maa. 8Kpɛ́ni fêi, à kɛ̀ zãai ŋí kélee díkaa káyêei a ǹáa-fɛɛ, da pâi kákɛ̂i ká tíi lɛ́lɛɛ kɛ́ ká ƃá Kúnuu-namui Zîsɛ Kôrai maa-tarei su. 9Kpɛ́ni fêi, ǹúui kélee zãai ŋí fé yêei, maa-nuui ŋ́ɛi púɔɔ̂i, va kwaa kôyaa ma kàa. Maa-nuui a nîa a gɛɛ ŋɔsɔnyɔ̂ŋ pɔlɔi è wàa ma. 10Mɛni ma ŋánûa, ká kɔ́ kpɔ́ a gbanaŋɔɔ a gɛɛ ká kátolii da kálɛi maa-mɛni é kɛ́ a tɔ̃yâ, kpɛ́ni fêi, à kɛ̀ kà nyíŋi kɛ̀, gɛ̀ ní káfe pâi wɔ́lɔ toôi. 11Ɣâla a pâi Kúnuu-namui da Kúƃalo-nuui Zîsɛ Kôrai ŋɔwɔlɔ-wɔlɔ kâloŋ-laai su-perei kpɛtɛ̂i a ǹɛ́lɛɛ a gɛɛ ká lí naa.
12Mɛni ma ŋa gbɛ̀tɛ ŋ́gili ŋá a tãi kélee a gɛɛ ŋa m̀ɛni-ŋai ŋí tóo kákili ŋá, berei máŋ ká díkɔlɔŋ la a dɔ̃yâi nyíi gáa káyeêi gɛ ƃo kákili ŋá a ǹɛ́lɛɛi. 13Ŋá ŋ́gili ŋá sìa a gɛɛ gáa a mɛni lɛ́lɛɛ tãi nɔ ŋ́gbonôi káa niî la a vúlui a gɛɛ ŋa kálii mu siɣe a mɛni-toɔɔ kákili ŋá, 14kpɛ́ni fêi, ŋa gɔlɔŋ a gɛɛ ŋa pâi kulâi ŋ́gbonôi su a maa félaa, yɛ̂ɛ berei Kúnuu-namui Zîsɛ Kôrai è ǹɛ la ḿâi. 15Ŋa pâi gaâi a gɛɛ tãi ŋa lí lai, pɔ̂ri é kɛ́ kâa a gɛɛ mɛni-ŋai ŋí dí lɛ́ɛ kákili ŋá a tãi kélee.
Kôrai ŋɔfólo-laai káa maa sêre-ŋai
16Kúfe pîlaŋ ní wôya-tare pôlu nyíi gáa a lɛ́ɛ-mɛni pɔlɔi tãi kú Kúnuu-namui Zîsɛ Kôrai ŋɔwala-walai da ŋɔpa-mɛnii lɛ́ la kâai, kɛ́lɛ, kú kɛ̀ a ŋɛi-kao sere-ŋa ŋɔkɛ́tɛ-laai mɛni ma. 17È ƃaa-kɛ-maa da folo-laa sɔlɔ ƃô Ɣâla Nàŋ-nuui yêei. Volo-laa kɛ́tɛi è ŋ̀óoi ŋí tɛ̀ɛ bɔ naa, nyíi mò, nyɛɛi, “Ŋáwɛli-kɛ-maa loŋ ká ŋí, nyíi ǹíi lâai mɛni mai.” 18Kú ŋ̀óoi ŋí mɛ̀ni nyíi kùla ŋelei sui, kpɛ́ni fêi, kwa dîa-ni kú kɛ̀ ǹyée maa waai ma. 19Nyíŋi a ǹɛ kûa a gɛɛ Ɣâla ŋɔlóno-kɛ-ƃelai díwooi káa a tɔ̃yâ. A pâi kɛ̂i a mɛni lɛ́lɛɛ à kɛ̀ kà káwoli tɔ̀ɔ nyíŋi ma yɛ̂ɛ laŋpo ƃe sonîi kpinii é lɛ́ɛ la zu ɣele é ƃɔ́ ŋele-wala pɛmɛlɛŋ kaoi é kúla kálii su. 20Maa-ŋuŋ fɛ̂ɛ ká táre nyíŋi su a gɛɛ Ŋ̀âla-kɔlɔi maa Ɣâla-woo-ƃoɔɔ fé a núu kpîŋ mɛni ŋá lɛ́ɛ, 21kpɛ́ni fêi, Ɣâla-woo-ƃoɔɔ fa pâ a núu kpîŋ nia-mɛni, kɛ́lɛ, M̀ɔlêŋ Maa Waai ƃa núu kɛ̀ é Ɣâla ŋɔwóoi ƃó.
Currently Selected:
Pitɛ Veerɛi 1: KWB
Highlight
Share
Copy
Want to have your highlights saved across all your devices? Sign up or sign in
