Kɔleŋtiɛŋ Veerɛi 5

1Ku gɔ́lɔŋ a gɛ́ɛ à kɛ̀ ǹɔii ŋí su-pɛrɛi kúkaa mui garâi, pɛ́rɛ káa kúyêei é kúla Ɣâla yêei, nyíi gáa a pɛ́rɛ dífe dɔɔ ni a díyêei. Gáa a wɔlɔ-wɔlɔ-pɛrɛ Ɣâla-taa. 2Tɔ̃yâ ma kúkaa kúŋuŋ su-woo saâi ǹɔii ma ƃɛ, kúkɛ ŋ̀wɛli a gɛ́ɛ kú kɛ́ Ŋ̀âla-taa-pɛrɛi mu, 3a gɛ́ɛ kwà kɛ̀ mu, kúfe kɛ̀ ŋíni ŋá. 4Tãi kúkaa niî la bɛ́rɛi ŋí mui, kúkaa kúŋuŋ su-woo saâi a lii-sɛlɛŋ; zu-kulai fa kwa ŋ̀wɛ̂lii ku kúla mu, kɛ́lɛ, kwa ŋ̀wɛ̂lii kú kɛ́ pɛ́rɛ lɛ́lɛɛ mu é tɛ́ɛ nyíŋi ma, a gɛ́ɛ sɛŋ nyíi kélee a tɛ̂ɛi fulu-laa é zu kara. 5Ǹúui a kúkpɛtɛ m̀ɛnii ŋí mɛni mai, ǹyaa ƃa Ɣâla, nyíi a M̀ɔlêŋ tɛ́ɛ kúpɔ a kono-tee-wooi.

6Mɛni ma fɔlɔ-fɔlɔ káa kúyêei a tãi kélee. Kú gɔ́lɔŋ a gɛ́ɛ tãi kúkaa la ƃɛ́ kúkponôi sui, kú kɛ̂i kôyaai Kúnuu-namui ma. 7Kpɛ́ni fêi, kwa sîa a laa-la, kúfa sîa a kwaa-kaa. 8Fɔlɔ-fɔlɔ káa kúyêei, ǹyaŋ ǹɛ́lɛɛ a gɛ́ɛ kú kɛ́ a kúkɛ̂i gôyaa kúkponôi mâ kwa Kúnuu-namui-ni kúkɛ bɔ-taai. 9Mɛni ma à nɛ̀ɛ máŋ ku kɛ́ kúpɔ-taai kpaa máŋ ku kúla naa, ku kúkili ŋá sîa a gɛ́ɛ ku ǹíi láa. 10Kpɛ́ni fêi, fɛ̂ɛ kúkelee kútûa-perei é lɛ́ Kôrai ŋɔmɛni-ŋa-tee see-sɛŋ ŋɛ́i tuɛ a gɛ́ɛ núu kélee é ŋɔfela-fei lɛ́lɛɛi kpaa máŋ ŋɔfela-fei nyɔ́mɔɔi sɔlɔ ƃó yɛ̂ɛ berei e ŋɔfúlu-laai kɛ̀ la gbonôi.

Loai-kpɛtɛ maa-tii kɛ́ɛ

11Mɛni ma berei kú Kúnuu-namui ŋɔkili-ŋa-siai kɔ́lɔŋ lai, kúkaa nuu-kpune líi penêi. Berei kúkaa lai Ɣâla è gɔ́lɔŋ, ǹyaŋ eêi pɔ̂ri kɛ̂i a sɛŋ a gɛ́ɛ káa máŋ ka gɔ́lɔŋ kákili-ŋa-siai su. 12Kúfe kúkpîŋ lɛ̂i káa ŋɔ́nɔ, kɛ́lɛ, kúkaa sâpo lɛ̂i káa a gɛ́ɛ kálii é nɛ̃ɛ kúmɛni ma a gɛ́ɛ diai da yoŋka tèe núu-tɔɔi mɛni ma, kɛ́lɛ, dífa yoŋka tèe núu líi mɛni mai, pɔ̂ri é kɛ́ káa a gɛ́ɛ ká dímarê-kɛɛi su kula. 13Kpɛ́ni fêi, à kɛ̀ kúƃoɔɔ̂i, gɛ̀ ní gáa kúloai kwa Ɣâla-ni; à kɛ̀ kútarêi gɛ̀ ní gáa kámɛni ma. 14Kôrai ŋɔwɛli kɛ́-maai káa tíi kɛ̂i a kúa, kpɛ́ni fêi, kúlaâi la a gɛ́ɛ núu tɔnɔ è sàa núu kélee mɛni ma. M̀ɛni ma núu kélee a saa. 15È sàa núu kélee mɛni ma a gɛ́ɛ diai díkaa ɣele mai, dífe kɛ̀ ɣele ma díkpîŋ mɛni ma, kɛ́lɛ, dí kɛ́ ɣele ma Kôrai mɛni ma, nyíi sàa dí-mɛni ma é mu siɣe saa yêei.

16Mɛni ma é síɣe tãi ŋí ma e li tuɛ-pere, kúfa núu maa-mɛni ŋá tèe yɛ̂ɛ núu-kpune ŋɔmɛni ŋá-tee-pere; berei máŋ tãi tɔnɔ ku Kôrai maa-mɛni ŋá tèe la yɛ̂ɛ núu-kpune ŋɔmɛni ŋá-tee-perei, kúfa ŋɔ́nɔ maa-mɛni ŋá tèe ti. 17M̀ɛni ma, à kɛ̀ núu da kélee káa Kôrai kponôi, gɛ̀ ní gáa a núu nina. M̀ɛni pɔlɔi a tɛɛ, ka gáa mɛni ninai a pá. 18Nyíŋi kélee a kúla Ɣâla yêei nyíi ǹyaa kpîŋ è kúloai kpɛ̂tɛ kwa dîa-ni Kôrai sarâi é tíi tɛ́ɛ kúpɔ a gɛ́ɛ kú díloai kpɛtɛ da ǹûai. 19Zu-kulai ƃa Ɣâla è kɛ̀ Kôrai kponôi, tãi ǹyaa Ɣâla è kɛ̀ díloai kpɛ́tɛ̂i la da ŋ̀éniɛi su-ƃelai, ve dítɔ̂ŋ-karaa-ŋai siɣe ni a dísɔŋ. È loai-kpɛtɛɛ maa-worɛ-woo tɛ́ɛ kúpɔ. 20Mɛni ma kúkaa a Kôrai pɔ́ɔ-ŋa-ƃela, Ɣâla kɛ́ ǹûai tòli ku-sarâi. Kwa kákpera fei Kôrai mɛni ma a gɛ́ɛ ka Ɣâla-ni ká káloai kpɛtɛ. 21Kpɛ́ni fêi, Kôrai nyíi ve kɛ́ ni a sɔnyɔ̂ŋ kɔ́lɔŋɔɔ̂i, Ɣâla e sɔnyɔ̂ŋ pu mà kúmɛni ma a gɛ́ɛ ku kɛ́ a ǹyaa Ɣâla ŋɔtɔ̃yâ-ƃela Kôrai kponôi.

Currently Selected:

Kɔleŋtiɛŋ Veerɛi 5: KWB

Highlight

Copy