Pitɛ Maa-ŋuŋ 5
5
Ka Ɣâla ŋɔnuu-kpului mɛi káa
1Mɛni ma ŋa ǹúu-pɔlɔ-ŋai lia-woo ƃôi kásama, ńyãai ŋ́gaa a díƃarâŋ-nuu-pɔlɔ, ŋ́gɛ ƃo ŋɔ́nɔ a Kôrai ŋɔmɛni-soli-kaai maa-sere da vólo-laai pâi lɛ̂i da sɔlɔ ƃo-nuui. 2Ka Ɣâla ŋɔnuu-kpului mɛi káa nyíi kákaa mɛi. Vé a sɛŋ fɛ̂ɛ nɔ́ ká gɛ́, kɛ́lɛ, ka gɛ́ é kúla kálii su yɛ̂ɛ berei Ɣâla a ŋ̀wɛ̂lii ka gɛ lai. Káfe gɛ sɛŋ mɛni ma ŋumɛ-pere su, kɛ́lɛ, ka gɛ́, kpɛ́ni fêi, ka ŋ̀wɛ̂lii kpɔ́ a ŋánaa a gɛɛ ká gɛ́. 3Diai kákaa dímɛi, káfe dímɛi kàa a wala-wala-laa, kɛ́lɛ, ká kɛ́ a pɔkɔɔŋ ǹúu-kpului mɛni ma. 4Ǹyaŋ tãi da M̀ála mɛi-kaa-nuu kɛ́tɛi lɛ̀ lai, ka pâi volo-laai maa-kaloŋ-ƃɔrɔi sɔlɔ ƃôi, nyíi va karâi. 5Káai kákaa a ǹúu tɔɔ-ŋai máŋ ká kɛ́ ǹúu-pɔlɔ-ŋai mu a bere sii tí. Kákelee ka kámaa ɣiri a maa-yeŋ-lii kákîe-ni mɛni ma, kpɛ́ni fêi, “Ɣâla tɔɔ̂i yoŋka-nuu ma, kɛ́lɛ, a ƃɛlɛ-sêe tɛ̀ɛ maa-yeŋ-nuu pɔ.” 6M̀ɛni ma ka kákpîŋ maa yéŋ Ɣâla yée wâla-walai mu a gɛɛ tãi à sèri é kámaa tɛ́. 7M̀ɛnii kélee a kálii sɛ̀lɛŋ ka bu ŋ̀ɛ́i. Kpɛ́ni fêi, gbáaŋɔɔ̂i kámɛni ma. 8Káŋuŋ-su é kɛ́ a zéɣeŋɔɔ, ká kámɛi káa. Dɛ̂ƃele nyíi gáa a kákpɔara-nuui gáa tɛɛ-tɛɛ̂i yɛ̂ɛ yala-sulu ƃe kpéɣêi gɛ núu kɔ̂ri m̀ii mɛni ma. 9Ka kɔ́ bɔ ká tɔ́ɔ a gbanaŋɔɔ kálaa-lai su. Ka gɔlɔŋ a gɛɛ mɛni-soli tɔnɔi tí káa kánûai kponôi ǹɔii gwaa kélee. 10Kámɛni-soli-kaai pôlu ma nàa kuro à kɛ̀ tí, m̀ɛlɛ-see kélee Ɣalai nyíi a kátoli ŋɔwɔlɔ-wɔlɔ fólo-laai mâ Kôrai kponôi, ǹyaa kpîŋ a pâi kámaa waâi, é kátɔɔ̂i kpanaŋ, é kákponôi kpanaŋ. 11Ŋ̀wála-wâlai é kɛ́ a bɔ́ɔ wɔlɔ-wɔlɔ da wɔlɔ-wɔlɔ. É kɛ́ tí.
Naa-ti-maai gbɛɛ ŋái
12Seveenɔ, nyíi gáa a kúƃarâŋ-nuu sã́ai, yɛ̂ɛ berei ŋa gaâi lai, zarâi ƃe ŋá gɔlɔ kpuai ŋí pɔ̃yɛ la kápɔ, ŋá kálîa-woo ƃói ŋa ǹɛ a gɛɛ Ɣâla ŋɔtɔ̃yâ-ƃɛlɛ-sêei ká ŋí. Ká tɔ́ɔ zu a gbanaŋɔɔ.
13Nɛnîi gáa Babelɔŋ, nyíi máŋ dí nɛ̀i, è fàa kâa. Ńoŋ Mâki máŋ è fàa kâa. 14Ka kála tí kákîe-ni dîa a la-gbɔ-see-maa wɛli-kɛ-maa pere su.
Káai kélee kákaa Kôrai kponôi, lii-sêe é kɛ́ káyeêi.
Currently Selected:
Pitɛ Maa-ŋuŋ 5: KWB
Highlight
Share
Copy
Want to have your highlights saved across all your devices? Sign up or sign in
