ROMANOS 14
14
Notipquis nasa apvisay ingyalhing
1Altamjoc oltimnacsic quellhip: Am sat ancoc coyimnaac apvalhoc aptimem meyasquiyam, elpasim sat mataa quellhip. Noelatingmap nasa ayinyema moclhama asoc apquillhanma quellhip. 2Apcanayquic mataa lhama ingyalhing apmopvan etovc aclhamoclhojo asoc. Am etavac mataa aclhamoclhojo asoc poc ingyalhing acyitna mocjam coyimnatem apvalhoc. Aptovquic acvamlha asoc apquinayclha. 3Aptovquic sat ancoc lhip aclhamoclhojo asoc, nolhenam nasa apvisay aptomja metom aclhamoclhojo asoc. Actomjac coo siyanya poc: Aptovquic sat ancoc lhip acvamlha asoc apquinayclha, nolhenam nasa apvisay aptomja aptom aclhamoclhojo asoc. Ayinyemaclha Dios alhta aptimesquiscama appeyvomo as ingyalhing etnejic apquitca. 4¿Soc lhip enlhit qui? Copvanquejec lhip elhenam apvisay aptomja poc apvisqui apquilancam. Apvamlha apvisqui pac apvanquic eyicpilcojo aptemaclha apquilancam naysicsa apyiplovquiscama najan naysicsa aplhinganyam. Emyovacpoc sat apquilancam, ayinyemaclha apvanquic Visqui ingac emyoc apquilancam.
5Altamjoc oltimnacsic mocjam: Apquililtamjoc napocja ingilyalhinga eltamilsic mataa acnim acponquinomalhca. Apquilanayquic poc ingilyalhinga acno moc mataa aclhamoclhojo acnim. Incaymalhquic elyasamcojo apanco moclhama ingyalhing. 6Apponquincasquic sat ancoc acnim, apquiltamjoc yoyam colhic ayaco Visqui ingac. Aptovquic sat ancoc aclhamoclhojo asoc, apquiltamjoc yoyam colhic ayaco Visqui ingac. Ayinyemaclha gracias aptomjac mataa yoyam colhic ayaco Dios Ingyapam apmescama aptom. Aptovquic sat ancoc acvamlha asoc apquinayclha, apquiltamjoc najan yoyam colhic ayaco Visqui ingac. Ayinyemaclha gracias aptomjac mataa yoyam colhic ayaco Dios Ingyapam apmescama aptom.#Col 2.16.
7Ningileyvec nincoo, cotnaja yoyam ongileyoc inganco. Ningitsepquic sat ancoc, cotnaja yoyam ongitsapoc inganco. 8Ongilanam sat mataa Visqui ingac naysicsa ningileyvam. Visqui ingac sat jintimjic apanco naysicsa ningitsepma. Naso, apancoc jingiltomjac mataa Visqui ingac naysicsa ningileyvam najan naysicsa ningitsepma. 9Eycaso ayinyemaclha apquitsepma Cristo aptomja aplhaticjangviyam nipyesicsa apquilmasquingvaycmo. Yoyam etnejic Apvisqui nipyesicsa apquilmasquingvaycmo najan nipyesicsa apjalhnancaoc.
10Quip ingyeylhojo lhip. ¿Soctomja aptomja nac lhip apyicpilquemo aptemaclha ingyalhing? Ingyeylhojo sat poc. ¿Soctomja aptomja nac lhip apvinéycam ingyalhing? Ongilanam sat ninlhamoclhojo napato Dios naysicsa apma netin aptajanem apanco yoyam elyicpilcojoc nintemaclha nincoo.#2 Co 5.10. 11Intomjac nic nat Dios appayvam actalhesomalhca:
Eycaso Dios Visqui ingac appayvam: Nasoc anco sicpayvam.
Elticlhoc sat aptapnaoc sicnaclha aplhamoclhojo enlhitaoc lhalhma anco.
Eltimjic sat selayo apquilanomacpo enlhitaoc#Is 45.23.
—nic nat aptomjac Dios.
12Jingilanic sat Dios yoyam ongilatingmojo naysicsa singyicpilquemo.
Nosilhnana nasa lhip inyalhing
13Pac ongilvatsamcoc nincoo ningillheneycam apquiltemaclha ingilyalhinga. Incaymalhquic colhenic mataa ingvalhoc yoyam mongilsilhnanejec ingyalhing, yoyam monlhinganimsic ingyalhing. 14Acyasamcoc coo ayinyema seyascasingviyam Visqui ingac Jesús: Paj lhama nintom actomja singascama ontoc. Apcanayquic sat ancoc ingyalhing acmasom nintom, actemaclha singascama ontoc. Nasoc anco sat etnesquisic acmasom singascama ontoc. 15Apvitac sat ancoc ingyalhing aptova lhip nintom metomaclha ingyalhing, coyiplovjoc sat acyimtalhnama apvalhoc ingyalhing. Am eyca eyiplovcasac lhip actemaclha ningasicjayo. Apvanquic lhip etovc aclhamoclhojo nintom. Copvanquejec eyca lhip esilhnana yoyam etvasacpoc ingyalhing. Lhip aptom actomja acsilhnanoncama. Ayinyemaclha apquitsepquic alhta Cristo acyanmongam najan as ingyalhing. 16Eltamilsojo sat quellhip nipyesicsa enlhitaoc lhalhma anco yoyam casmesalhquejec actemaclha actamila acyitna quellhip. 17Am conyemac actemaclha nintom najan actemaclha ningyam yoyam ongilpalhavomoc Dios apquilnancascama. Eyca ayinyema ningyiplovquiscama actemaclha acpeyvomo najan actemaclha actamilaycam ingvalhoc najan acpayjayclha ingvalhoc ayinyema Espíritu Santo. 18Ningyiplovcasquic sat ancoc actema nac jay yoyam ongilanam Cristo, eyispac sat Dios nintemaclha, elyispac sat najan enlhitaoc.
19Ingilane sat ongilinlhanmojo ningyiplovquiscama yoyam coytic mataa actamilaycam ingvalhoc. Yoyam najan ongiltimjic mataa ningilpasmeyquiclha yoyam coyangvomoc actemaclha mongyasquiyam. 20Notvas nasa lhip aptemaclha Dios apyanmonquiscama apvalhoc ingyalhing. Ayinyema lhip apsilhnanoncama aptoycaoc aclhamoclhojo nintom. Naso, intasic ontoc aclhamoclhojo nintom. Am eyca cotamilo ontoc nintom yoyam esilhnanacpoc ingyalhing. 21Intasic anco montoc apitic najan mongyinic vino uva yingmenic najan moc asoc yoyam mesilhnanacpeje ingyalhing. 22Iyiplovquis sat lhip actemaclha acyascamco apvalhoc napato Dios. Apquilinyajavoc anco lhip aptomja meyiplovquiscama asoc singascama ongyiplovcasojo. Cotnejic sat mepqui actamjaycam apvalhoc. 23Aptovquic sat ancoc lhip naysicsa apyasquiyam, esilhnanacpoc sat napato Dios. Ayinyemaclha am eyiplovcasac lhip actemaclha acyascamco apvalhoc. Aclhamoclhojo asoc ningyiplovquiscama naysicsa ningyasquiyam actomja mongyascalhma.
Currently Selected:
ROMANOS 14: ENHL
Highlight
Share
Copy
Want to have your highlights saved across all your devices? Sign up or sign in
