SAN MARCOS 16

Aplhaticjangvoycamlha Jesús

(Mt 28.1-10; Lc 24.1-12; Jn 20.1-10)

1Lhama alhta acyeycaa acnim ninnayclha. Almiyaclho alhta alyanmomalhquilha quilvanaa María Magadalena najan María, Jacobo inquin najan Salomé. Inmalhquic alhta asoc masis, yoyam catsisquisic Jesús apyovoclhojo. 2Alhtooc anco alhnancoc semana allhinga alhta quilvanaa. Intipquic alhta acnim alvaclho tacjalhop. 3Inquilpamejitsalhquic alhta:

—¿Soc sat enlhit jinliquisic mataymong ayapma atong tacjalhop? —alhta inquiltomjac.

4Inquilanoc alhta tacjalhop, alvita eyca mataymong aclicamalhca. Acyiviy anco alhta mataymong. 5Yejemoc alhta alantalhningvocmo tacjalhop. Pilapcasquic alhta alvita apyimnanic apna acyimnatamaclha. Apava apmopoy apvinatem alhta apcalomap. Inquilacac alhta quilvanaa. 6Apquilpamejitsa alhta apyimnanic:

—Nojela nasa. Inquilyocta inyicje Jesús co Nazaret quilyipitquiscama alhta asoc timyescama. Aplhaticjangvocmec lhac, am enlhit ma asi. Ca incolanojo quilpiquenaclha —alhta aptomjac. 7Coltajojo, coltimnasquiclha sat apquiltamsoycaoc najan Pedro: Nic lhac apmiyaclhec apmamyi maa Galilea.#Mt 26.32; Mr 14.28. Elviticlhac sat maa, acno actomjaclha alhta apquiltimnascama quellhip, sat coltimjic colanic quellhiya —alhta aptomjac.

8Inquilpecjasquic alhta alantepa tacjalhop. Innateymaoclhec alhta quilvanaa. Inquilpilhyinimquic alhta, inquilyingvaquic anco. Am alhta colpametaoclha almiyaclhilha. Inquilacac alhta.

Jesús aptajanyey María Magdalena

(Jn 20.11-18)

9Alhtooc anco alhnancoc semana aplhaticjangvocmo Jesús. Acvitayclha amamyi alhta intomjac María Magdalena. Siete somquic quilyicjamo alhta apquilantipcasac avalhoc as quilvana. 10Yejemoc alhta aclhinga. Inquiltimnascaclhec alhta Jesús apquillhalhmaa. Inquilipvamamquic alhta. Apyipcalhquic alhta najan. 11Apjalhnancoc lhac Visqui ingac. Acvitac lhac coo —alhta intomjac ayanya. Lhama alhta apquillinga amyaa, apquilyascacmec alhta eyca.

Jesús aptajanyey apcanit apquiltamsoycaoc

(Lc 24.13-35)

12Natamin alhta aplhinganimsacpo Jesús. Apquilvitangvocmec alhta apcanit apquiltamsoycaoc. Naysicsa apquillhingam amyip alhta apvitacpoc. 13Yejemoc alhta apquiltajingvocmo. Apquiltimnascactamo alhta apnaymacoc. Apquilyascacmec alhta apquiltimnasa.

Jesús nipyesicsa apquiltamsoycaoc

(Mt 28.16-20; Lc 24.36-49; Jn 20.19-23)

14Aptovcamquic alhta once apquiltamsoycaoc. Yejemoc alhta apvitacpo Jesús. Apyimnatasquic alhta appayvam, aplhena apquilyasquiyam najan alyimnatem apquilvalhoc apquiltamsoycaoc. Apquilyascacmec alhta mataa apquililtimnascama apnaymacoc apquilvitayclha natamin aplhaticjangviyam. 15Apquilpamejitsa alhta:

—Ellhing sat quellhip lhalhma anco. Eliltimnas sat aplhamoclhojo enlhit tasic amyaa.#Hch 1.9-11. 16Am sat ancoc ongyascacmoc, coyiplovjoc sat singyapasquiscama yingmin, ongilvomsalhcac sat tap. Ningyascacmec sat ancoc, ongiltovasalhcac sat. 17Am sat ancoc ongilyascacmoc, cotnejic sat ninlhalhma asoc sinpilapquiscama. Ongilantipsic sat somquic quilyicjamo ayinyema apvisay apanco Jesús. Ongilpamejitsic sat appayvomo lhama poc enlhit. 18Cotmongvomoyc sat onpatningvomjo nimisma. Ningyinamquic sat ancoc asoc sinavoy, mejingvejec sat. Nininquinquic sat ancoc ingmeoc tacjaplhit ningmasquem actomjaycaoc, yejemoc sat eltamalvomoc —alhta aptomjac Jesús.

Jesús apmiyayclha netin

(Lc 24.50-53)

19Lhama alhta apsovja apquiltimnaycam Visqui Jesús, apmiyaclho eyca netin.#Hch 1.9-11. Apnaclhec alhta apnaclha Dios Ingyapam. Yejemoc alhta apquillhinga apquiltamsoycaoc. 20Apquililtimnasa alhta amyaa lhalhma anco. Apquilpasmec alhta mataa Visqui ingac naysicsa apquiltamjaycam. Apquilyimnatasquic alhta apquililtimnascama amyaa ayinyema asoc monquinatquiscama quilyiploycam alhta mataa. Amén.

Currently Selected:

SAN MARCOS 16: ENHL

Highlight

Copy