SAN MARCOS 11

Aptalhningvayclho Jesús tingma Jerusalén

(Mt 21.1-11; Lc 19.28-40; Jn 12.12-19)

1Apquilamquitvoclhec alhta Jerusalén. Lhama alhta apquilvaclho tingma Betfagé najan tingma Betania, nicja inquilhe acvisay Olivos. Apquilapajasquic alhta apcanit apquiltamsoycaoc. 2Aptomjac alhta apquilanya:

—Elmiyaclha natingma apyitna nac maa. Apquilvoclhec sat ancoc maa, elvitac sat yamelyeyjaycoc ayitcoc mepqui incanamtec, mactetem tama. Elliquis sat tama, elyantamenta sat. 3Aptomjac sat ancoc enlhit:

—¿Soctomja apliquisa nac tama? Eltime sat elanic: Visqui ingac lhac apquiltamjoc. Quilhvoc sat etajicsojoc mocjam —alhta aptomjac Jesús.

4Apquillhinquic alhta. Apquilyantavoclhec alhta yamelyeyjaycoc ayitcoc mactetem tama apatong tingma. Inyancac alhta amay avalhoc. Aplicasquic alhta inyicje tama. 5Apcanvocmec alhta maa enlhit:

—¿Soctomja apliquisa nac tama yamelyeyjaycoc ayitcoc? —alhta apquiltomjac.

6Yejemoc alhta apquiltimnasa enlhit actomjaclha appayvam Jesús. Yejemoc alhta apcapajasa avtip. 7Apquilyantamentac alhta yamelyeyjaycoc ayitcoc apnaclha Jesús. Lhama alhta apquiljalhyovasamco apquilantalhnama apquiltajanquisa eyca yamelyeyjaycoc. Yejemoc alhta apquinamta Jesús. 8Aplhamoclhojo alhta enlhit apquilpayesamco apquilantalhnama amay avalhoc apmiyaclhilha. Apquilyatemenquic alhta yamit ava. Apninquinamquic alhta amay.

9Apquillhinquic alhta apquilmamyi napocja enlhit. Apquilyiplaclhec alhta apnaymacoc apquilpalhamamcaa:

—Sas, tasic anco. Ningilayo aptomja apquilhyam apsoyam apvisay Visqui ingac.#Sal 118.25-26. 10Ningilayo actomja apquilnancascama ingyap David, yoyam covac sat. Sas, tasic anco netin aja —alhta apquiltomjac.

11Lhama alhta apvaclho Jesús Jerusalén. Aptalhningvoclho alhta tingma apponquinomap. Apquilyacyesam alhta aclhamoclhojo asoc maa. Intalhnacmo alhta aptepa aptajaclho Betania. Apquillhalhmaa alhta doce apquiltamsoycaoc.

Jesús apyamascama higo yamit

(Mt 21.18-19)

12Moc acnim alhta intomjac apquimpaclho Betania. Mayc alhta incajac. 13Mocjay alhta apvita higo yamit alyimseleycaoc ava ayimja inlhapco. Apyocmec alhta inyicje, apquiltamjoc eta acyilhna. Lhama alhta apvocmo, am alhta etac acyilhna, acvamlha ava. Coylhejec alhta incovocmo inlhojo mocjitma.

14Aptomjac alhta apcanya Jesús:

—Cotovalhquejec mataa acyilhna as yamit —alhta aptomjac.

Apquillingavoc alhta appayvam apquiltamsoycaoc.

Jesús apquilantipquiscama enlhit tingma apponquinomap

(Mt 21.12-17; Lc 19.45-48; Jn 2.13-22)

15Apquilvoclhec alhta tingma Jerusalén. Lhama alhta aptalhningvoclho tingma apponquinomap. Apquilapajasquic alhta enlhit apquilyanmongsomap congne. Apquilyanincasamquic alhta mesa apancaoc apquilyanmonquiscama moc solyayem. Apquilyanincasamquic alhta apquiltajanem enlhit apquilhacjam yamvalhaay. 16Apmiyovquic alhta Jesús esaclhac asoc enlhit congne tingma apponquinomap. 17Apquillhicmosquic alhta Jesús:

—Yitnec actalhesomalhca vaycajac: “Coo tingma ajac cotnejic sat apquilmalhnancamaclha enlhit apnaycam lhalhma anco.”#Is 56.7. Apquiltimescasquic quellhip as tingma apquilyilhanmomaclha apquilminyilhma —alhta aptomjac.#Jer 7.11.

18Apquillingavoc alhta appayvam apquilimja apmamyi sacerdotes najan apquilyascamco apquiltemaclha. Aplhenacpec alhta inyicje Jesús, yoyam ematong. Apcacpec alhta ayinyemaclha quilpilapcasquic alhta apquillinga actemaclha apmopvan apquiltimnaycam.

19Intalhnacmoc alhta apquilantepa natingma.

Higo yamit acyamay

(Mt 21.20-22)

20Alhtooc alhta naysicsa apquillhingam apquilvitangveclho higo yamit. Apac alhta intomjac. Inquilitsepquic alhta quipmenaoc. 21Yejemoc alhta aclhena apvalhoc Pedro, appamejitsa:

—Visqui, quip ilanojo higo yamit apyamneycam alhta lhip. Quitsepqui nac anco.

22Apcatingmavoc alhta Jesús:

—Noelyasquim nasa Dios Ingyapam. 23Actomjac coo siyanya quellhip: Naso, aptomjac sat ancoc enlhit ingyanic as inquilhe: “Copatyip, coyanin nayingmin.” Am sat ancoc coyascacmoc apvalhoc, yoyam cotnejic aplhenaclha, colyajaclhoc sat inquilhe.#Mt 17.20; 1 Co 13.2. 24Actomjac coo siyanya quellhip: Apquililmalhnaquic sat ancoc quellhip lhama asoc, noelyasquim nasa yoyam ellhovac. Nasoc anco, ellhovamcoc sat. 25Apquillanam sat ancoc quellhip actema nac apquilmalhnancama, elmascos sat apnatovascama quellhip Apquilyapam apna netin —alhta aptomjac.#Mt 6.14-15. 26Am sat ancoc elmascosac quellhip apnatovascama apnaymacoc, memascocseje apnatovascama quellhip Apquilyapam apna netin.

Mayasinancama Jesús

(Mt 21.23-27; Lc 20.1-8)

27Apquilvoclhec alhta mocjam tingma Jerusalén. Naysicsa aptiyascam alhta congne tingma apponquinomap apquilyoclho apnaclha Jesús apquilimja apmamyi sacerdote najan apquilyascamco apquiltemaclha najan apquilyimtalhnamo. 28Apquilpamejitsa alhta:

—¿Soc lha ayanem lhip elana as asoc? ¿Soc ayasinancama lhip? —alhta apquiltomjac.

29Apcatingmavoc alhta Jesús:

—Altamjoc coo lha, yoyam olmalhnam quellhip. Jelatingmojo sat, pac oltimnacsic siyanyomalhca coo, yoyam olanac as asoc. 30¿Soc ayanem Juan eyapasquisamcoc enlhit yingmin? ¿Visqui netin yai? ¿Enlhit inlhoyqui laa? Jelatingmam —alhta aptomjac.

31Lhama alhta alquitama apvalhoc, apquilpamejitsacpo eyca:

—Ningiltomjac sat ancoc: Visqui netin apcanem, sat etnejic jinganic: “¿Soctomja apquilyascacmo nac alhta?” 32¿Ingvanqui ya ontimjic: Enlhit apcanem? —alhta apquiltomjac. Apquilacpec alhta apnaymacoc. Apcanyacpec alhta Juan profeta Dios aplingascama. 33Apquilatingmavoc alhta:

—Lhaja, mongilyasamcoc nincoo —alhta apquiltomjac.

Aptomjac alhta apquilanya Jesús:

—Moltimnacseje coo lha siyanyomalhca olanac as asoc —alhta aptomjac.

Currently Selected:

SAN MARCOS 11: ENHL

Highlight

Copy