SAN MATEO 7

Nintimesquiscama apmapsom ingmoc

(Lc 6.37-38,41-42)

1Aptomjac alhta mocjam Jesús:

‘Noeltimesquis nasa apmapsom poc. Meltimesacpejec sat quellhip apquilmapsomcaa ayinyema Dios Ingyapam. 2Elhnasojoc sat Dios Ingyapam acyanmongayclha apquiltimesquiscama quellhip apmapsom poc. Elyipsatamcoc sat Dios Ingyapam apquiltemaclha quellhip. Elhnasojoc sat acyanmongayclha apquiltimesquiscama poc.#Mr 4.24. 3Apvita inyicje lhip yamit anic ayitcoc apatic poc. ¿Soctomja colhena nac apvalhoc yamit acyiviy apatic lhip? 4Copvanquejec lhip etnejic ingyanic poc: “Emoc, ingyane sat olicsic yamit anic ayitcoc lhip apatic, acyitna inlhojo lhip yamit acyiviy apatic.” 5Apquilaycmascam nac lhip acna anit apvalhaoc. Ilic siclho lhip yamit acyiviy apatic apanco. Natamin etac sat yamit anic apatic poc, yoyam elicsic.

6‘Noelmesaoc nasa quellhip simjing asoc acponquinomalhca. Collovc sat, coltaclhamcoc sat quellhip. Noelyinyov nasa lamom acmamnave apquilyancaclha yatepomap. Eltamoc sat —alhta aptomjac.

Ningilmalhnaycam najan ningilquitamsama

(Lc 11.9-13; 6.31)

7Aptomjac alhta mocjam Jesús:

‘Elilmalhnam, ellhovac sat. Elquitam, elviticlhac sat. Elilmalhnam yoyam ellicsic atong, colhic sat aclicsa atong. 8Ningilmalhnaquic sat ancoc, ongillhovac sat. Ninquitamquic sat ancoc, ongilviticlhac sat.#Dt 4.29; 2 Cr 15.2-15; Jer 29.13. Ningilmalhnaquic sat ancoc yoyam jinglicsic atong, colhic sat singliquisa atong.

9‘Apnec ancoc apquitca enlhit. Yejemoc sat elmalhnam apquitca quilpasmongam. ¿Apquiltamjo ya apyap emquesic mataymong? 10¿Apquiltamjo ya apyap emquesic nimisma? 11Paj. Apyap emquesic sat asoc altamila. Quip elanojo. Apsomcavo inyicje quellhip. Apvancaac quellhip elmesamcoc apquitquic asoc altamila. Aptasoc apanco Ingyapam netin. Ningilmalhnaquic ancoc asoc altamila, coyangvomoc sat singilmescama as asoc.#Jn 14.13-14; 15.7,16; 16.23-24; 1 Jn 3.21-22; 5.14-15.

12‘Pac ongnasojoc moc nintemaclha acno aclhanma mataa ingvalhoc, yoyam jintimesquisic enlhitaoc.#Lc 6.31. Eycaso actomja singanamaclha Moisés najan apquillhanma profetas Dios apquillingascama.

Atong coyoy

(Lc 13.24)

13‘Elantilh quellhip atong coyoy. Elavojo atong acyiviy najan amay acyiviy. Actomja ningitsepmo ongyiplaclha. Aplhamoc enlhit maa apquilantalhningvoyam. 14Elantilh maa atong coyoy najan amay ayitcoc. Actomja acyimnatem ingnenyic ongyiplaclha. Apcanitoc enlhit apquiltomja apquilvitay maa amay ayitcoc —alhta aptomjac.#Sal 1.6; Pr 4.18-19.

Ningyicpilquemo actemaclha acyilhna yamit

(Lc 6.43-44)

15Aptomjac alhta mocjam Jesús:

‘Elavojo quellhip apquilsoycam apquilmopvancaa amyaa apquilpalhavoy nipyesicsa quellhip. Apquilyitsomacpo apanco inyicje nipquesic. Eyca malha asoc navjac aclom apquiltemaclha apancaoc. 16Elyicpilcojo sat quellhip apquilmopvancaa amyaa ayinyema apquiltemaclha apancaoc. Conaclhalhqueje uva acyilhna naysicsa amaoc. Conaclhalhqueje acyilhna actamila naysicsa yammeyac. 17Intasic mataa acyilhna yamit actamila. Asomquic mataa acyilhna yamit acmasom. 18Casomquejec acyilhna yamit actamila. Cotamilejec acyilhna yamit acmasom. 19Am sat ancoc cotamilac acyilhna yamit, colhic sat acyatemena. Cotlhalhcac sat natilh.#Mt 3.10; Lc 3.9. 20Eycaso siclhena lhac: Elyicpilcojoc sat quellhip apquilmopvancaa amyaa ayinyema apquiltemaclha apancaoc —alhta aptomjac.#Mt 12.33.

Enlhit melantalhningviyam Dios apquilnancascama

(Lc 13.25-27)

21Aptomjac alhta mocjam Jesús:

‘Apquiltomjac sat ancoc aplhamoclhojo jelanic coo: “Visqui, Visqui”, melpalhavomejec sat napocja enlhit Dios apquilnancascama. Elpalhavomoc sat apquilvamlha enlhit apquiltomja apquilyajayquiclho apmayjayoclha coo Tata apna netin. 22Invocmec sat ancoc nelha acnim, sat eltimjic jelanic aplhamoclhojo enlhit: “Visqui, Visqui, ninlhenquic nincoo mataa lhip apvisay. Ningilantipcasquic nincoo somquic quilyicjamo ayinyema ninlhanma lhip apvisay. Ningilanac nincoo aclhamoclhojo nintamjaycam sinpilapquiscama” —sat eltimjic jelanic. 23Natamin ongvatingmojoc sat coo: “Am olyicpilcac mataa quellhip. ¡Elinyajaoc sicnaclha! Apquiltemaclha quellhip apquilmapsomcaa” —sat otnejic ongvanic coo.#Sal 6.8.

Anit actemaclha ningyiplovquiscama

(Mr 1.22; Lc 6.47-49)

24Aptomjac alhta mocjam Jesús:

‘Apjalhnoc sat ancoc enlhit coo sicpayvam, eyiplovsic sat najan. Eyca as enlhit apno enlhit apyascamcolhma. Aptomja malha apquillanay mataymong apvajac tingma. 25Yejemoc alhta acvaa acmamay. Invaac alhta acyeniyam. Apquilhcajacmec alhta piyam. Apyejingvocmec alhta as tingma. Am alhta eyaninac tingma, ayinyemaclha acyitna mataymong apvajac tingma. 26Apjalhnoc sat ancoc enlhit coo sicpayvam, am eyca eyiplovcasac sicpayvam. Eyca as enlhit apno enlhit meyascamcolhma. Aptomja malha apquillanay lhopactic apvajac tingma. 27Yejemoc alhta acvaa acmamay. Invaac alhta acyeniyam. Apquilhcajacmec alhta piyam. Apyejingvocmec alhta as tingma. Yejemoc alhta apyanina as tingma. Apsovjacpo apyanina tingma —alhta aptomjac.

28Lhama alhta apsovja apquillhicmoscama Jesús. Pilapcasquic alhta enlhitaoc apquillinga appayvam. 29Apquillhicmosquic alhta Jesús actemaclha apmopvan, am colhno enlhit apquilyascamco apquiltemaclha.#Mr 1.22; Lc 4.32.

Currently Selected:

SAN MATEO 7: ENHL

Highlight

Copy