SAN LUCAS 8

Jesús apquillhalhmaa quilvanaa

1Natamin alhta aplhinga Jesús. Apmiyaclhec alhta natingma lhalhma anco. Apquiltimnasam alhta tasic amyaa Dios apquilnancascama. Apquillhalhmaa alhta doce apóstoles apquilapajasomap. 2Quilvanaa alhta najan apquillhalhmaa. Apquiltamilquiscacmec alhta somquic quilyicjamo actovascama najan ningmasquem. Lhama acvisay María Magdalena. Siete somquic quilyicjamo alhta apquilantipcasac avalhoc. 3Moc acvisay Juana, Chuza aptava. Herodes alhta apcasinancama maa. Moc acvisay Susana najan aclhamoclhojo innaymacoc. Inquilmesquic alhta mataa asoc acyitna inlhojo.#Mt 27.55-56; Mr 15.40-41; Lc 23.49.

Apyitquiscama Jesús mayinayclha actic

(Mt 13.1-9; Mr 4.1-9)

4Apquicjingvoctac alhta enlhit appintalhnama apnaclha Jesús. Apquilinyema alhta natingma lhalhma anco. Apquiltimnasam alhta actemaclha apyitquiscama.

5Aplhinquic nic nat apcanma, yoyam epalesam actic. Appalesamquic nic nat actic. Inpalvocmec nic nat nicja actic amay. Inquiltamalhquic nic nat actic. Natamin acpalvaa nata, intovcamquic nic nat actic. 6Inpalvocmec nic nat nicja actic tacjalhit mataymong. Yejemoc nic nat actepa. Yejemoc nic nat acyamamco. Am nic nat coyaysoc lhopactic. 7Inpalvocmec nic nat nicja actic coning yammeyac. Inquictingamcoc nic nat lhama yammeyac. Inquimpanatesquic nic nat. 8Inpalvocmec nic nat nicja actic actamilaclha lhopactic. Inquictinquic nic nat. Inlhamaclhec nic nat acyilhna. Moclhama actic nic nat invocmec cien actic —alhta aptomjac Jesús.

Lhama alhta apsovja apquiltimnaycam Jesús. Apyimnatasquic alhta appayvam:

—Ingjaycaoc innac nincoo, pac ongilaylhojo —alhta aptomjac.

Aptemaclha Jesús eltimnacsic apyitquiscama

(Mt 13.10-17; Mr 4.10-12)

9Apquilmalhningvoctac alhta apquiltamsoycaoc actemaclha apyitquiscama. 10Apcatingmavoc alhta Jesús:

—Apvancaac quellhip elyasingvomoc asoc acyilhamalhca Dios apquilnancascama. Eyca poc enlhitaoc eltimnasacpoc actemaclha sicyitquiscama. Elanojoc sat yicje, eyca melvityejec sat. Elaylhojoc sat yicje, eyca melyasingvomejec sat.#Is 6.9-10.

Appeyvescasquiclha Jesús actemaclha Apyitquiscama

(Mt 13.18-23; Mr 4.13-20)

11Eycaso siclhanma lhac sicyitquiscama: Acyitsomalhco mayinayclha actic Dios appayvam. 12Enlhit apquillingay amyaa acyitsomalhco actic acpalviyam nicja amay. Yejemoc acvaa somquic quilyicjamo. Inliquic amyaa almam apquilvalhoc enlhitaoc. Inquiltamjoc yoyam elyascomoc amyaa, yoyam melvomsacpoc tap enlhitaoc. 13Poc enlhit acyitsomalhco mayinayclha actic tacjalhit mataymong. Apquillingac ancoc amyaa apquilsovascamo almam apquilvalhoc. Mepqui quipmenaoc apquilvalhoc enlhit. Apquilinlhanacmec siclho actemaclha melyasquiyam. Apquillingamcoc sat ancoc mactovascama, eyca pa elvatsamcoc. 14Poc enlhit acyitsomalhco mayinayclha actic naysicsa yammeyac. Apquillingac anco amyaa. Moc asoc eyca ayinyemaclha inquilvanatescacmoc amyaa: Asoc aclhanma apquilvalhoc lhalhma anco, najan acsilhnanoncama solyayem, najan ayitsepma apnenyaoc asoc acmasom. Coylhejec acyilhna apquilvalhoc enlhit. 15Poc enlhit eyca acyitsomalhco mayinayclha actic actamila lhopactic. Apquillingac ancoc amyaa, yejemoc almam apquilvalhoc. Inlhamaclhec anco apyilhna enlhit actemaclha apquilinlhanyam —alhta aptomjac Jesús.

Apyitquiscama Jesús calevascama

(Mr 4.21-25)

16“Ningalevasquic sat ancoc calevascama, mongajapquiseje poco apyiviy. Monpiquineje coning ningyitnamaclha netin. Ninquilhanmec netin lha.#Mt 5.15; Lc 11.33. Ongilvitangvotac sat ayitsayolhma ningilantalhningvoycta tingma. 17Cotasalhcac sat asoc ayapomalhca. Colngasalhcac sat asoc acyilhamalhca. Ayalhnaclhojo sat cotniclhac.#Mt 10.26; Lc 12.2.

18“Collhenam sat ingilvalhoc amyaa ninlingay nincoo. Yitnec sat ancoc asoc, ongillhoveclhac sat mocjam. Yitnec sat ancoc lhama asoc, colhic sat sintapilhquiscaso asoc ingac —alhta aptomjac Jesús.#Mt 25.29; Lc 19.26.

Jesús inquin najan apquilyalhinga

(Mt 12.46-50; Mr 3.31-35)

19Natamin alvactamo alhta inquin najan apquilyalhinga. Am alhta cotatescaclha apnaclha Jesús. Enlhit apmojosomap alhta ayinyemaclha. 20Apquiltimnasacpec alhta Jesús:

—Invaac lhac inquin najan apquilyalhinga. Lhip lhac inquiltamjoc colvita —alhta intomjac amyaa.

21Apcatingmavoc alhta Jesús:

—Aplhamoclhojo enlhit apquiltomja apquilyajayquiclho apmayjayoclha Dios, eyca as enlhit najan quilvana actomja elyalhinga najan meme —alhta aptomjac.

Jesús apmascoscama piyam najan alyayajayam

(Mt 8.23-27; Mr 4.35-41)

22Lhama acnim alhta aptalhningveclho barco Jesús. Apquillhalhmaa alhta apquiltamsoycaoc. Aptomjac alhta apquilanya:

—Noc, ongiltamiclha tap acyayengviyam —alhta aptomjac.

Yejemoc alhta apquillhinga. 23Aptinquic alhta Jesús naysicsa apquillhingam. Yejemoc alhta apquilhcajacmo piyam apyimnatem. Lanoc alhta yingmin barco. Quitlhincasquic alhta covayvamcoc. 24Yejemoc alhta apquillhaticjasa Jesús:

—Visqui, Visqui, pac ongilvayvamcoc nincoo —alhta apquiltomjac.

Yejemoc alhta aplhaticja Jesús. Apquilyasquic alhta ilhma piyam najan alyayajayam. 25Yejemoc alhta apquinmantamo piyam najan alyayajayam.

—¿Jalhco actema quellhip melyasquiyam? —alhta aptomjac Jesús.

Apquilacac alhta apquiltamsoycaoc. Pilapcasquic alhta anco. Apquilpamejitsacpec alhta:

—¿Soc enlhit aso? Apcanayquic sat ancoc emascoc piyam najan yingmin, yejemoc alyajaclho —alhta apquiltomjac apquilpamesma.

Enlhit co Gerasa

(Mt 8.28-34; Mr 5.1-20)

26Apquilvocmec alhta tap acyayengviyam yoclhilhma Gerasa. Yoclhilhma Galilea alhta apquilquimpac. 27Aptiyapvocmo alhta Jesús netin lhop. Aptajanyavoc alhta lhama enlhit apquinyema natingma. Acvoncaclho alhta actovascama somquic quilyicjamo. Aptiyascam alhta mataa mepqui apquilantalhnama. Am alhta elhnac congne tingma. Apnacmec alhta mataa naysicsa tacjalhpopayc. 28Lhama alhta apvita apquilhyacmo Jesús. Apquilpolintamo alhta apmamyi. Aptomjac alhta apquilpalhamamcaa:

—Jesús, Dios Ingyapam netin apquitca. ¿Soc pa jetnesquisic coo? Pac olmalhnac lhip, yoyam mejetvacseje —alhta aptomjac.

29Ayinyemaclha aptomjac alhta apcanya Jesús:

—Somquic quilyicjamo cotyip as enlhit —alhta aptomjac.

Inmamquic alhta mataa somquic quilyicjamo. Apquilpilhtetquic alhta enlhitaoc cadenas apmeoc najan apmancoc. Quilhvoc alhta elyitipsic cadenas. Inyantimquic alhta somquic quilyicjamo yoclhilhma actamopeycaoc.

30—¿Jalhco apvisay lhip? —alhta aptomjac Jesús.

Apcatingmavoc alhta enlhit:

—Coo sicvisay Legión —alhta aptomjac.

Ayinyemaclha inlhamoc alhta somquic quilyicjamo alantalhnama apvalhoc. 31Inquilinlhanacmec alhta almalhnaycam somquic quilyicjamo:

—Nojingilapajas nasa nincoo ayaptovnilha malhic —alhta inquiltomjac.

32Aplhamoc alhta yatepomap apquilyanca inquilhe acvinatem. Aptovcamquic alhta. Inquililmalhnaquic alhta somquic quilyicjamo, yoyam colantilhic apquilvalhoc yatepomap. Apcavoc alhta Jesús. 33Natamin alantepa alhta apvalhoc as enlhit. Alantalhningvocmo alhta apquilvalhoc yatepomap. Apnateymaoclhec alhta apquilantalhningvocmo congne yingmin acyayengviyam. Apquilmasquingvocmec alhta nayingmin.

34Apquilinyec alhta apquilancam yatepomap. Apquiltimnascaclhec alhta natingma najan lhalhma anco amyaa apquilinquita yatepomap. 35Yejemoc alhta apquilpecjamcaa enlhit. Apquililtamjoc alhta elvita asoc apquillhanma. Apquilmiyaclhec alhta apnaclha Jesús. Apvitacpec alhta enlhit alantiyapma apvalhoc somquic quilyicjamo. Apnacmec alhta nalhpop apnangvocmo aptalhnama. Intamalvocmec alhta aptemaclha. Apquilacac alhta enlhitaoc. 36Apquiltimnamcaa alhta enlhit aptomja apquilvitaycamco. Aplhenacpec alhta aptomja aptamilquisquiyam enlhit quilyicjamo actovascama. 37Apquilacac alhta aplhamoclhojo enlhit yoclhilhma Gerasa. Apquilpamejitsa alhta Jesús apcanyacpo etyapoc as yoclhilhma. Apquinamtec alhta barco Jesús aptajaclho mocjam. 38Apquilmalhningvactamo alhta enlhit quilhva aptamilviyam, yoyam etnejic aplhalhma. Apmiyovquic alhta Jesús aptomja apcanya: 39—Itajiclha tingma pac. Iltimnas sat apnaymacoc amyaa aptamalvocmo. Actemaclha Dios Ingyapam aptamilquisquiyam lhip —alhta aptomjac.

Yejemoc alhta aptajaclho as enlhit. Apquiltimnasam amyaa aptomja aptamilquisquiyam Jesús.

Jairo apquitca najan quilvana acmongvaycmo aptalhnama Jesús

(Mt 9.18-26; Mr 5.21-43)

40Aptajavoc alhta Jesús moc nicja acyayengviyam. Inquilpayjeclhec alhta apquilvalhoc enlhitaoc apvoclho maa. Ayinyemaclha apquililjalhnec alhta. 41Yejemoc alhta aplhingacmo lhama enlhit apvisay Jairo. Apquimja apmamyi alhta tingma apcaneyclhilha. Apquilpolingvaac alhta apquinmamcaclha Jesús. Apcanayquic alhta etyaningvomjoc tingma pac. 42Lhama alhta apquitca as enlhit. Quilvana ayitcoc alhta. Invocmec alhta doce años. Pac alhta incotsapoc apquitca. Apyiplaclhec alhta Jesús najan appintalhnama enlhit. Apquilyingamquic alhta naysicsa aplhingam.

43Inyiplaclhec alhta lhama quilvana. Acvocmo alhta doce años actimem acyiviy em ac. Ayovsec alhta quilvana apcasquiscama ayimpejic panatem inyapmayc. Insovjalhquic alhta solyayem acyanmongam apquilanay. Am alhta cotamalvocmoc. 44Apcapoc alhta inquiningvocmoc acyipitcangvocmo. Acmongvocmo alhta napocja aptalhnama Jesús. Yejemoc alhta acmasca actiyapma em ac.

45Aptomjac alhta apcanya Jesús:

—¿Soc laa semongvavo nac qui? —alhta aptomjac. Am alhta eltimnasac.

Apcatingmavoc alhta Pedro najan apquillhalhmaa:

—Visqui, apvitac lhip enlhitaoc apquilyingacpo nac. ¿Soctomja aptomja nac lhip, —“Soc enlhit semongvavo nac qui?” —alhta apquiltomjac. 46Aptomjac alhta apquilanya Jesús:

—Lhama lhac semongvavo. Aclingamcoc lhac aplicvaa enlhit sicmovan sictamilquiscacmo —alhta aptomjac.

47Incacac alhta quilvana, inpilhyinimquic anco. Inyasamcoc alhta, am alhta coyilhalhco. Inquilpolingvoclhec alhta apquinmamcaclha Jesús. Inquiltimnasa alhta napatavo aplhamoclhojo enlhit ayinyema acpatningvaycmo aptalhnama. Najan actemaclha actamalviyam quilhvoc anco. 48Aptomjac alhta apcanya Jesús:

—Sictimem emoc, intamalvocmec lhiya ayinyema coyasquiyam. Colhing maa, cotamilsojo sat avalhoc lhiya —alhta aptomjac.

49Naysicsa appamejitquiscama alhta Jesús acvaa amyaa. Ayinyema alhta tingma pac Jairo apquimja apmamyi apcanayclhilha. Apquiltimnasacpec alhta Jairo:

—Inquitsepquic lhac apquitca. Noyampos nasa apvisqui —alhta intomjac amyaa apcanyacpo.

50Aplingac alhta amyaa Jesús. Aptomjac alhta apcanya:

—Jairo, noncavojo nasa apnenyic, noyasquim nasa. Comoc sat tap apquitca —alhta aptomjac.

51Apquilvoclhec alhta tingma pac Jairo. Apmiyovquic alhta Jesús elantilhic congne tingma. Apquilvamlha alhta Pedro, najan Juan, najan Jacobo, najan inyap najan inquin quilvana ayitcoc. 52Inyapcalhalhquic alhta. Inquilinlhacmec alhta. Aptomjac alhta apcanya Jesús:

—Noncolinlhama nasa. Am cotsepac quilvana ayitcoc, intinquic anco —alhta aptomjac.

53Apcasmesacpec alhta Jesús. Ayinyemaclha apquilyasamcoc alhta ayitsepa quilvana ayitcoc. 54Yejemoc alhta apma amic, aptomja apcanya:

—Sacoc, colhaticja —alhta aptomjac apyimnatesa appayvam.

55Inyimnavocmec alhta mocjam quilvana ayitcoc. Yejemoc alhta ayinmaclho netin. Aptomjac alhta apcanya Jesús, yoyam colhic acmesa actom. 56Pilapcasquic alhta inyap najan inquin. Apcasquic alhta Jesús colngalhcac amyaa nipyesicsa apnaymacoc.

Currently Selected:

SAN LUCAS 8: ENHL

Highlight

Copy