SAN LUCAS 5

Tingyey quilasma

(Mt 4.18-22; Mr 1.16-20)

1Lhama alhta apquiningvocmo Jesús niyava acyayengviyam Genesaret. Apquicjingvocmec alhta enlhit appintalhnama. Apquililtamjoc alhta elaylhojo Dios appayvam. 2Apvitac alhta Jesús anit barco ayitcoc acnamco nicja yingmin. Apquilantipquic alhta tingyey quilasma. Yamyamayin alhta apquilyimyesac. 3Apquinatvocmo alhta Jesús barco ayitcoc. Simón alhta barco pac. Apcanyacpec alhta Simón elhingsic nayingmin tap quitsic. Yejemoc alhta apnacmo Jesús barco ayitcoc. Apquillhicmosquic alhta enlhit.#Mt 13.1-2; Mr 3.9-10; 4.1. 4Lhama alhta apsovja appayvam apcanya:

—Simón, ilhinquis sat naysicsoc yingmin. Elquilhanta nayingmin yamyamayin. Colmoc sat quilasma —alhta aptomjac.

5Apcatingmavoc alhta Simón:

—Visqui, ningilinlhanacmec nintingyey quilasma alhtaa lhac. Am lhac ongilmac lhama.#Jn 21.3. Eyca pac olyejiclhojo lhip appayvam. Pac ongitlhantac sat yamyamayin —alhta aptomjac.

6Lhama alhta apquilquilhantamo yamyamayin. Lanoc alhta alantalhna quilasma.#Jn 21.6. Quitlhincasquic alhta incolyaptic yamyamayin quilasma. 7Yejemoc alhta apquilevamcaa tingyey quilasma lhama. Apquilanyacpec alhta moc barco, yoyam elpasingvota. Apquilyacmo alhta. Apquillhatmec alhta quilasma anit barco avalhoc. Lanoc anco, quitlhincasquic alhta colvayvamcoc. 8Lhama alhta apvita Simón Pedro. Apquilticlhicvocmo alhta aptapnaoc apnaclha Jesús, appamejitsa:

—Visqui, jeyinyov sat coo. Esomqui nac coo —alhta aptomjac.#Job 7.19-20; Sal 39.13.

9Pilapcasquic alhta anco Simón najan apquillhalhmaa alma quilasma yamyamayin. 10Pilapcasquic alhta Jacobo najan Juan, Zebedeo apquitquic. Tingyey quilasma lhama Simón. Aptomjac alhta apcanya Jesús:

—Simón, nojeya nasa. Itne sat lhip mataa aptingyey enlhit —alhta aptomjac.

11Lhama alhta apquilnincanveclho nicja yingmin barco. Apquilhaquic alhta aclhamoclhojo asoc. Apquilyiplaclhec alhta Jesús.

Jesús aptamilquisquiyam lepra ningmasquem ningilyitapaycam

(Mt 8.1-4; Mr 1.40-45)

12Lhama alhta apna Jesús lhama tingma. Apvitacpec alhta lhama enlhit, actimem ningmasquem ningilyitapaycam lepra. Lhama alhta apvita Jesús, apquilpolintamo apticlhiquic napaat lhapop apquinmamcaclha. Aptomjac alhta apcanya:

—Visqui, apquiltamjoc sat ancoc jetamilquiscomoc, apvanquic lhip —alhta aptomjac.

13Yejemoc alhta apyasa apmic appatningvocmo:

—Altamjoc coo, itniclha apjalhnancoc —alhta aptomjac.

Yejemoc alhta acmasca lepra ningmasquem ningilyitapaycam. 14Apmiyovquic alhta eltimnacsic apnaymacoc:

—Ilhing maa, ilhicmosacpojo sat sacerdote. Imques sat apmescama acyanmongam ayalhnayclha apyimpejic. Itne sat actemaclha singanama ilhnic nat Moisés, yoyam ongmesic.#Lv 14.1-32. Apmesquic sat ancoc, melquinatsejec sat enlhitaoc aptomja aptamalviyam —alhta aptomjac.

15Inlingalhquic alhta mataa apvisay natingma lhalhma anco. Apquicjingvaac alhta mataa enlhit apnaclha Jesús. Apquililtamjoc alhta elaylhojo appayvam. Apquililtamjoc alhta najan eltamalvomoc ningmasquemataoc. 16Apmiyaclhec alhta mepqui lha tingma, yoyam elmalhna Ingyapam.

Jesús aptamilquisquiyam enlhit apquilyelcomap

(Mt 9.1-8; Mr 2.1-12)

17Lhama acnim alhta intomjac apquillhicmosa amyaa Jesús. Apnam alhta lhama fariseos najan apquilyascamco apquiltemaclha. Apquilinyemac alhta lhalhma anco yoclhilhma Galilea, najan yoclhilhma Judea najan tingma Jerusalén. Apmopvan innac Jesús ayinyema Dios Ingyapam. Apvanquic alhta eltamilquiscomoc enlhit. 18Apquilvaac alhta napocja enlhit. Apquilpatmeyam alhta enlhit apquilyelcomap apyitnama netin aptajanma. Apquililtamjoc alhta elantalhningvomoc, yoyam elpicanvomoc apnaclha Jesús. 19Am alhta elvocmoc congne. Enlhit apmojosomap alhta apquilyasalhma. Apquilquinamtec alhta tingma apquiljalhyovasa yatipjaymacaoc. Apquilyiplovcasoc alhta aptajanma apquilvayvesantamo apnaclha Jesús. 20Lhama alhta apvita actemaclha melyasquiyam enlhitaoc. Aptomjac alhta apcanya Jesús:

—Enlhit, inquilmascosalhquic melyascalhma lhip —alhta aptomjac.

21Yejemoc alhta alquitama apquilvalhoc apquilyascamco apquiltemaclha najan fariseos: “¿Soc enlhit aso? Aptovasqui nac Dios Ingyapam apvisay. Paj lhama enlhit apcopvanco emascocsic mongilyascalhma. Dios apvamlha apanco” —alhta inquiltomjac apquilvalhoc.

22Apyasamcoc alhta Jesús alquitamsama apquilvalhoc, apquilpamejitsa:

—¿Soctomja alquitama nac apquilvalhoc as asoc? —alhta aptomjac. 23Evanquic ongvanic enlhit apquilyelcomap: “Inquilmascosalhquic melyascalhma lhip”. Evanquic najan ongvanic: “Itnimiclha netin, ilhing maa”. ¿Soc ayilhyevamo am colhno moc? 24Coo nac Sictiyam Sictomja Enlhit. Elyasingvomoc sat quellhip sicmovan omascocsic mongilyascalhma as nalhpop —alhta aptomjac.

Natamin aptomjac apcanya enlhit apquilyelcomap:

—Actomjac coo siyanya lhip: Itnimiclha netin, ima aptajanma, itajiclha tingma pac —alhta aptomjac.

25Yejemoc alhta apquinmaclho netin napatavo enlhitaoc. Apmec alhta aptajanma aptajaclho tingma pac. Apcacoc alhta Dios Ingyapam apmiyaclhilha. 26Pilapcasquic alhta apvitacpo. Apquilacoc alhta Dios Ingyapam. Apquilangvocmec alhta as enlhitaoc:

—Ningvitac lhac asoc mongvitayac incotnejic actema nac lha —alhta apquiltomjac.

Jesús apquevoycam Leví

(Mt 9.9-13; Mr 2.13-17)

27Natamin alhta aptepa tingma Jesús. Apvitangvocmec alhta enlhit apmam solyayem apvisay Leví. Apnacmec alhta almomalhquilha solyayem. Aptomjac alhta apcanya:

—Itne sat siclhalhma —alhta aptomjac.

28Yejemoc alhta apquinmaclho netin. Apquilhaquic alhta aclhamoclhojo asoc. Apyiplaclhec alhta Leví.

29Caya apvanyam alhta apquiltomjac tingma pac Leví. Apquiltasacmec alhta aplhamoclhojo apquilmam solyayem najan apnaymacoc. 30Apquilmalyevam alhta fariseos najan apquilyascamco apquiltemaclha. Apquiltomjac alhta apquilanya apquiltamsoycaoc:

—¿Soctomja apquilpasma nac quellhip aptoycaoc najan apyinaycaoc apquilmam solyayem najan enlhit melyascalhma? —alhta apquiltomjac.#Lc 15.1-2.

31Apcatingmavoc alhta Jesús, apquilpamejitsa:

—Apvancaac enlhit apjalhnancaoc mepqui panatem inyap. Colapvancaac eyca enlhit melyimnatem. 32Am ongvanam enlhit apquilpeyvomo, enlhit melyascalhma eyca pac ongvanam, yoyam elyanmongsic apquilvalhoc —alhta aptomjac.

Apquilmalhnacpec Jesús actemaclha mongmajay ontoc

(Mt 9.14-17; Mr 2.18-22)

33Apquiltimnasacpec alhta Jesús:

—¿Soctomja melmajay aptoycaoc Juan apquiltamsoycaoc apquilinlhanyam apquililmalhnancama? Apquilnesacpoc fariseos apquiltamsoycaoc. Am elhnoc lhip apquiltamsoycaoc. Aptovcamquic najan apyinamquic mataa —alhta apquiltomjac.

34Apcatingmavoc alhta Jesús:

—¿Ingvanqui ya montovamcoc ningilanyomalhca alyimjapmaato mevonquepeclha quilhva alyimjapma? 35Comoc sat acnim, yoyam colyinyovsic apmaclha quilhva alyimjapma. Natamin mongmajayc sat ontoc —alhta aptomjac.

36Apquiltimnasquic alhta actemaclha apyitquiscama:

—Mongyapteje napocja nintalhnama apjalhnancoc, yoyam ongilyipitsic nintalhnama apjapac. Ningyipitcasquic sat ancoc, nintovasquic nintalhnama apjalhnancoc. Melhoyc sat nipva apjalhnancoc apyipitsomap nintalhnama apjapac. 37Mongilyatmamquejec moyayit uva yingmenic alhnancoc avalhoc asoyimpeoc apaoc. Ningilyatmamquic sat ancoc, colpalhic sat asoyimpeoc. Colyanquinalhcac sat moyayit uva yingmenic. Colmalhquejec sat najan asoyimpeoc. 38Incaymalhquic ongilyatmoc moyayit uva yingmenic alhnancoc avalhoc asoyimpeoc alhnancaoc. Colyanquinalhquejec sat moyayit uva yingmenic. Colpalhejec sat asoyimpeoc.

39Ningyinquic sat ancoc moyayit uva yingmenic nano acyitnamaclha, mongmajayc sat alhnancoc. “Atsic ongyinic maa nanoc acyitnamaclha, colhnoc alhnancoc, sat ontimjic” —alhta aptomjac Jesús.

Currently Selected:

SAN LUCAS 5: ENHL

Highlight

Copy