GÉNESIS 9
9
Asoc monquinatquiscama apmayjayoclha Dios apnaclha Noé
1Intasic nic nat appayvam Dios Apyimtalhnamo apquilpamejitsa Noé najan apquitquic.
Aptomjac nic nat apquilanya: —Ellhamasiclha sat apquitquic quellhip najan aptovana. Elleyoc sat lhalhma anco.#Gn 1.28. 2Almaymintacaa sat cotnajamcoc aclhamoclhojo asoc aleyvam lhalhma anco. Incolaoc sat mataa alvita quellhip. Eltime sat quellhip avisqui ac aclhamoclhojo nata najan aclhamoclhojo asoc aleyvam nalhpop najan asoc aleyvam nayingmin. 3Eltovaoc sat mataa aclhamoclhojo asoc aleyvam lhalhma anco najan asoc ayimja lhalhma anco. Coo sictomja sicmescama. 4Acmiyovquic coo lhama asoc. Noeltovaoc nasa asoc acyovoclhojo acyiplomo ema ac, ayinyemaclha cotnaja ayitsepma acyovoclhojo.#Lv 7.26-27; 17.10-14; 19.26; Dt 12.16,23; 15.23. 5Apmatnec sat ancoc lhama nipyesicsa quellhip, oyanmongsiclhac sat aptomja apcajem. Oyanmongsiclhac sat najan actemaclha ayajem moc asoc aclom. Apmatnec sat ancoc poc enlhit, oyanmongsiclhac sat najan aptomja apcajem.
6Apmatnec sat ancoc enlhit,#Ex 20.13.
coyanmongiclhac sat najan aptomja apcajem. Ayinyemaclha apquilanacpec alhta enlhit, apnoc alhta aptemaclha Dios.#Gn 1.26.
7Ellhamasiclha sat apquitquic quellhip najan aptovana.
Eleyoc sat lhalhma anco—
nic nat aptomjac Dios Apyimtalhnamo.#Gn 1.28.
8Aptomjac nic nat Dios Apyimtalhnamo apcanya Noé najan apquitquic: 9—Quip elanojo. Pac olanac sat asoc monquinatquiscama actemaclha sicmayjayoclha ajanco. Melquinatsejec sat mataa quellhip najan aptovana niptamin. 10Colquinatsejec sat najan aclhamoclhojo asoc apnaycamo lhama quellhip, alantiyapma alhta barca yamit aysicsic: aclhamoclhojo nata najan ninatoscama najan asoc navjac najan aclhamoclhojo asoc aleyvam lhalhma anco. 11Comasquejec sat mataa actemaclha sicmayjayoclha napatavo quellhip. Motvacsejec sat mataa enlhitaoc najan asoc aleyvam lhalhma anco. Motnesquisic sat mocjam yingmin acvanyam. Cotvacsejec sat mataa as nalhpop. 12Eycaso actomja asoc monquinatquiscama actemaclha sicmayjayoclha. Melquinatsejec sat mataa quellhip najan aclhamoclhojo asoc aleyvam lhalhma anco: 13Acpiquinquic coo netin pimjit, actomja asoc monquinatquiscama actemaclha sicmayjayoclha. Colquinatsejec sat aclhamoclhojo asoc aleyvam as nalhpop. 14Ayapajasquic sat ancoc yipjopay, etacpoc sat netin pimjit. 15Colhenam sat mataa evalhoc actemaclha sicmayjayoclha, yoyam melquinatsejec sat quellhip najan aclhamoclhojo asoc aleyvam lhalhma anco. Covotayc sat mataa yingmin acvanyam yoyam cotvacsic. 16Acvitac sat ancoc netin pimjit, colhenam sat evalhoc actemaclha sicmayjayoclha. Melquinatsejec sat mataa aplhamoclhojo enlhit najan aclhamoclhojo asoc aleyvam lhalhma anco. 17Eycaso actomja asoc monquinatquiscama actemaclha sicmayjayoclha, yoyam melquinatsejec aplhamoclhojo enlhitaoc najan aclhamoclhojo asoc aleyvam lhalhma anco— nic nat aptomjac Dios apcanya Noé.
Noé najan apquitquic
18Noé apquitquic nic nat apvisay: Sem najan apyalhing Cam najan apyalhing Jafet. Apquilantipquic nic nat barca yamit aysicsic. Cam apquitca ilhnic nat apvisay Canaán. 19Apnatqui ilhnic nat apquitquic Noé. Aplhameclhec nic nat aptovana lhalhma anco.
20Apquilcacjam amyip nic nat Noé. Apmamyi ilhnic nat apquinayclha uva yamit. 21Apyinquic nic nat uva ayingmenic. Incajac nic nat uva ayingmenic. Apnec nic nat coning carpa appaclhanma. Mepqui aptalhnama ilhnic nat apyitnac. 22Apvitangvoctac nic nat apquitca apyitnama mepqui apava apyap. Cam nic nat apvitay. Canaán apyap nic nat Cam. Apquiltimnasquiclhec nic nat apipma najan apyalhing actemaclha apvitay. 23Apmec nic nat apcalomap Sem najan apyalhing Jafet. Apquilpasmec nic nat apcalacpo apquilsaclho. Apquilalhingamcaclhec nic nat aptalaoc apquilyoclho apquilyap. Apcapaoc nic nat apquilajaclha apcalasa apquilyap. Am nic nat eltamjoc elanojo apquilyap apyitnama mepqui apava.
24Aplhaticjac nic nat Noé. Inmasquec nic nat ayajem uva ayingmenic. Apyasingvocmec nic nat aptomjaclha apquitca. 25Aptomjac nic nat apcanya:
¡Apmapsom sat mataa etnejic Canaán!
Apvennamap sat etnejic mataa nipyesicsa apmolhama—
nic nat aptomjac Noé.
26Aptomjac nic nat mocjam Noé:
Dios Apyimtalhnamo epasmoc sat mataa Sem (najan aptovana).
Apquilancam apvennamap sat etnejic mataa Canaán (najan aptovana).
27Elhamascasiclhac sat Dios lhalhma anco Jafet (najan aptovana).
Epalhavomoc sat apmolhama Sem.
Apquilancam apvennamap etnejic sat mataa Canaán (najan aptovana)—
nic nat aptomjac Noé.
28Aptiyasam nic nat mocjam Noé 350 años natamin yingmin acvanyam. 29Invocmec nic nat 950 años aptiyascam Noé. Apquitsepquic nic nat.
Currently Selected:
GÉNESIS 9: ENHL
Highlight
Share
Copy
Want to have your highlights saved across all your devices? Sign up or sign in
