GÉNESIS 7
7
Yingmin acvanyam
1Aptomjac nic nat Dios Apyimtalhnamo apcanya Noé: —Itilh sat barca yamit aysicsic lhip najan apmolhama. Acvitac coo aptemaclha mataa appeyvomo lhip nipyesicsa enlhitaoc lhalhma anco. 2Ilantalhnes sat actemaclha asoc mepqui singascama ontoc: moclhama siete inquilinava, moclhama siete inquilvanaa. Ilantalhnes sat actemaclha asoc singascama ontoc: lhama sat mataa inquinavo najan lhama inquilvana. 3Ilantalhnes sat aclhamoclhojo actemaclha nata: moclhama siete inquilinava najan moclhama siete inquilvanaa. Comasquingvomejec sat mataa aleyvam as nalhpop moclhama actemaclha nata. 4Natamin siete acnim sat ongvapajacsic acmamay acvanyam. Comamac sat acvaycmo 40 acnim najan 40 alhtaa. Pac sat osavojo otvacsic aclhamoclhojo aleyvam asoc silantipquiscama alhta— nic nat aptomjac Dios Apyimtalhnamo.
5Apquilyajaclhoc nic nat Noé actemaclha appayvam apcanama Dios Apyimtalhnamo. 6Invocmec nic nat 600 años aptiyascam Noé, acvaa ilhnic nat yingmin acvanyam ayapma as nalhpop. 7Aptalhnec nic nat barca yamit aysicsic#Mt 24.38-39; Lc 17.27. Noé najan aptava najan apquitquic najan apnatamcaa. Elmiyovacpoc sat maa. 8-9Inquilantalhnec nic nat aclhamoclhojo asoc actomja mepqui singascama ontoc najan asoc singascama ontoc. Inquilantalhnec nic nat aclhamoclhojo nata najan asoc alpilhyevaycam nalhpop. Inquilantalhnec nic nat mataa mocanit'a: lhama mataa inquinavo najan lhama inquilvana. Apquilantalhnec nic nat lhama Noé. Acno actemaclha ilhnic nat apcanama Dios. 10Invocmec nic nat 7 acnim. Inmamecac nic nat. Incapquic nic nat yingmin as nalhpop. 11Invocmec nic nat 600 años aptiyascam Noé. 17 acnim poc piltin nic nat ingvocmoc. Invaac nic nat acyeniyam yingmin. Inpayvacmec nic nat ayimpejic yingmin ayinyema netin.#1 P 3.6.
12Inmamecac nic nat lhalhma anco 40 acnim najan 40 alhtaa. 13Aptalhnec nic nat siclho barca yamit aysicsic Noé najan aptava najan apquitquic apquilvisay: Sem najan apyalhing Cam najan apyalhing Jafet najan apnatamcaa. 14Inquilantalhnec nic nat lhama aclhamoclhojo actemaclha asoc navjac najan ninatoscama najan asoc alpilhyevaycam nalhpop najan aclhamoclhojo actemaclha nata. 15Apquilantalhnec nic nat lhama Noé barca yamit aysicsic aclhamoclhojo actemaclha asoc: mocanit'a ilhnic nat mataa. 16Lhama mataa inquinavo najan lhama inquilvana, moclhama actemaclha asoc. Acno ilhnic nat actemaclha apcanama Dios. Apcapeclhec nic nat Dios Apyimtalhnamo atong barca yamit aysicsic. 17Inmamecac nic nat 40 acnim. Inyov'ac nic nat yingmin. Insovcam nic nat tacja yingmin barca yamit aysicsic. 18Inyov'ac nic nat mocjam tap yingmin. Insovcam nic nat tacja yingmin barca yamit aysicsic. 19Inyov'ac nic nat mocjam tap yingmin. Invocmec nic nat ayitsicsaoc inquilhe alvinatem. Incapquic nic nat yingmin. 20Incapquic nic nat yingmin acyovoclhojo inquilhe alvinatem. Invocmec nic nat 7 metros tap netin inquilhe. 21Apsovjacpoc nic nat apquilitsepma enlhitaoc lhalhma anco. Inquilitsepquic nic nat nata najan asoc navjac najan ninatoscama najan asoc alpilhyevaycam nalhpop. 22Apsovjacpoc nic nat apquilitsepma aplhamoclhojo apquilyimnatem najan aclhamoclhojo asoc aleyvam lhalhma anco. 23Apquilvocmec nic nat tap apquilvamlha apmolhama Noé najan asoc alyinatem congne barca yamit aysicsic. Apsovjacpoc nic nat apquilitsepma aplhamoclhojo enlhitaoc najan aclhamoclhojo ninatoscama najan aclhamoclhojo nata najan asoc alpilhyevaycam nalhpop. 24Am nic nat covayventac mocjam yingmin acvaycmo 150 acnim.
Currently Selected:
GÉNESIS 7: ENHL
Highlight
Share
Copy
Want to have your highlights saved across all your devices? Sign up or sign in