GÉNESIS 39
39
José najan Potifar aptava
1Innec nic nat acyantamaclho José yoclhilhma Egipto. Apquilyantamaclhec nic nat enlhitaoc ismaelitas. Apyinyovacpec nic nat José. Solyayem nic nat inyanmongac. Potifar nic nat apmam. Capitán yatapvisqui ilhnic nat Potifar nipyesicsa singilpilhtetemo. Apquiltamilcasquic nic nat mataa apvisqui faraón yoclhilhma Egipto. 2Aplhalhma ilhnic nat aptomjac mataa José Dios Apyimtalhnamo. Intasic nic nat aptiyascam José tingma pac yatapvisqui yoclhilhma Egipto.#Hch 7.9. 3Apyasamcoc nic nat yatapvisqui aptomja aplhalhma José Dios Apyimtalhnamo. Eycaso ayinyema ilhnic nat actamila aptiyascam José. 4Inlicavoc nic nat apvalhoc yatapvisqui. Apquiltamjaycamo lhama ilhnic nat aptomjac José. Aptimesacpec nic nat mayordomo najan apquimja apmamyi yatapvisqui tingma pac. 5Apvitac nic nat Dios Apyimtalhnamo actemaclha aptimesomap José mayordomo najan apquimja apmamyi yatapvisqui tingma pac. Aplhamaseclhec nic nat Dios apquilnatam yatapvisqui najan apnatoscama. José ilhnic nat ayinyemaclha. 6Apquillanac nic nat aclhamoclhojo asoc José, mepqui apquiltimnascama yatapvisqui yoyam elana. Acvamlha ilhnic nat aclhanma apvalhoc yatapvisqui yoyam etoc aptom.
Aptamila ilhnic nat José, intasic najan aptemaclha. 7Nalhit acnim nic nat intomjac. Inquilanoc nic nat mataa José yatapvisqui aptava.
Intomjac nic nat ayanya: —Jepatjetaoc sat coo— nic nat intomjac.
8Am nic nat eltamjoc José. Aptomjac nic nat apcanya quilvana: —Ca incolanojo lhiya. Siyimja emamyi jetnescasac visqui ajac. Alanac coo mataa asoc mepqui seltimnascama yoyam olana. 9Paj poc enlhit aptomja apyimtalhnamo, sicvamlha coo. Am emyavac mataa lhama asoc visqui ajac. Acvamlha apmasma mataa lhiya aptomja aptava. Movanquejec coo otnejic sicmasom napato Dios— nic nat aptomjac José.
10Inquilinlhanacmec nic nat quilvana acpamejitquiscama José aclhamoclhojo acnim. Am nic nat coyacmoc José epatjetamcoc. 11Nalhit acnim nic nat intomjac. Aptalhningvoclhec nic nat tingma José yoyam etnajam. Paj nic nat lhama enlhit congne.
12Yejemoc nic nat acmamco aptalhnama. Intomjac nic nat quilvana ayanya: —Jepatjetaoc sat coo— nic nat intomjac.
Apyinyovquic nic nat aptalhnama José. Apquinyec nic nat. 13Pilapcasquic nic nat quilvana acvita apquinyem apyinyova aptalhnama.
14Yejemoc nic nat ayevamcaa enlhit apquiltimesaycam. Intomjac nic nat alanya: —Quip elanojo. Etava alhta aptomja apyantingvoyam as enlhit hebreo, aptomja yoyam jintovacsic nincoo. Eyav'ac lhac coo. Apquiltamjoc jepatjetamcoc coo. Inpayjam lhac ajatong coo. 15Aplingac lhac José acpayjeycam ajatong. Yejemoc lhac apquinyaja. Apyinyovquic lhac aptalhnama sicnaclha— nic nat intomjac.
16Inpiquinquic nic nat aptalhnama José acyitnamaclha. Apvoctac nic nat mocjam atava.
17Inyinimcasam nic nat atava aclhena José. Intomjac nic nat ayanya: —Lhip alhta apyantingvoyam as enlhit hebreo lhip apquilancam. Aptalhningvoctac lhac tingma ajac yoyam jetvacsic. 18Inpayjam lhac ajatong. Apyinyovquic lhac aptalhnama sicyitnamaclha coo. Apquinyec lhac. 19Eycaso aptomjaclha lhcac lhip apquilancam— nic nat intomjac quilvana.
Aplingac nic nat yatapvisqui actemaclha aclhanma aptava. Aplovquic nic nat. 20Apcanayquic nic nat yatapvisqui yoyam emacpoc José. Apcalhimsacpec nic nat singilpilhtetomaclha apnamcaclha apquilmomap, apvisqui faraón nic nat apquilmam. Apnec nic nat singilpilhtetomaclha José. 21Appasmec nic nat mataa José Dios Apyimtalhnamo. Apquimlacmoc nic nat. Dios Apyimtalhnamo nic nat inquinyemac yoyam ingyasicjacpojo José apnaclha singilpilhtetomaclha apvisqui.#Hch 7.9. 22Aptimescasquic nic nat apquimja apmamyi nipyesicsa apquilmomap. Apquillanac nic nat José aclhamoclhojo asoc mepqui apquiltimnascama singilpilhtetomaclha apvisqui. 23Am nic nat eltimnasac mataa lhama asoc yoyam elana José. Ayinyemaclha appasmec nic nat mataa Dios Apyimtalhnamo. Intasic nic nat mataa aclhamoclhojo asoc ayinyema aptimesquiscama Dios.
Currently Selected:
GÉNESIS 39: ENHL
Highlight
Share
Copy
Want to have your highlights saved across all your devices? Sign up or sign in
