GÉNESIS 35
35
Jacob apma tingma Betel
1Aptomjac nic nat Dios Apyimtalhnamo apcanya Jacob: —Ingyimpeclha sat mocjam. Iyas sat tingma Betel. Ilha sat maa. Ilana sat apvatnamaclha actemaclha ningmescama Dios. Eycaso aptomja Dios Apyimtalhnamo apvitay alhta lhip naysicsa apquinyem apcay lhip apipma Esaú— nic nat aptomjac.#Gn 28.11-17.
2Aptomjac nic nat Jacob apquilanya apmolhama najan aplhamoclhojo apnaymacoc: —Etlhaoc sat quellhip quilaycmasquiscama acyitsomalhca dios acnaycaoc nipyesicsa quellhip. Elyapasaoc sat yingmin. Elyanmongsiclha poc apquilantalhnama. 3Ongimpiclhac sat mocjam nincoo. Olanac sat coo sicvatnamaclha actemaclha ningmescama Dios. Eycaso actomja alhta siclingay appayvam Dios naysicsa silminay. Aptomja alhta siclhalhma nalhit amay naysicsa siclhingam— nic nat aptomjac.
4Apquilsantac nic nat apnaclha Jacob aclhamoclhojo quilaycmasquiscama acyitsomalhca dios. Apquilsantac nic nat aclhamoclhojo alatquiscama ajaycaoc. Apcatoynvocmec nic nat Jacob coning masit apquimja acpayjo tingma Siquem. 5Apquillhinquic nic nat Jacob najan apquitquic. Apquilacac nic nat apquiltomja apquilaoclha. Dios Apyimtalhnamo nic nat aptimesquiscama apquilay. Am nic nat elminlhinacpoc Jacob apquitquic.
6Apquilvoclhec nic nat tingma apvisay Luz, moc apvisay Betel. Yoclhilhma acvisay nic nat Canaán. 7Apquillanac nic nat Jacob apvatnamaclha actemaclha ningmescama Dios. Apquiltimec nic nat acvisay El-Betel. Ayinyema apvitay Jacob Dios naysicsa apquinyem apcay apipma Esaú. 8Inquitsepquic nic nat maa acvisay Débora. Rebeca ilhnic nat acvanimquiscama. Incatoynalhquic nic nat coning masit acpayjo tingma Betel. Apquiltimec nic nat Jacob acvisay “Yamit acyipcalhomalhquilha”.
9Aptipquic nic nat siclhoc anco Jacob tingma Padan-aram. Appasmec nic nat Dios siclhoc anco. Natamin appasmec nic nat mocjam Dios. 10Actamila ilhnic nat appayvam Dios apcanya Jacob:
Lhip apvisay Jacob,
inmasquec lhip apvisay Jacob.
Etnejic sat lhip apvisay Israel—
nic nat aptomjac Dios.
Aptingyascasquic nic nat Dios moc apvisay.#Gn 32.28. 11Aptomjac nic nat Dios apcanya Jacob:
Coo nac Dios sictomja Sicyimtalhnamo.
Elhamiclhac sat lhip apquitquic najan aptovana.
Eltimjic sat aplhamoclhojo apquilmolhama lhalhma anco.
Eltimjic sat apquilviscaa nipyesicsa aptovana.
12Acmasquic alhta siclhoc anco Abraham najan Isaac as yoclhilhma. Lhip sat najan omquecsic as yoclhilhma. Niptamin lhip omquecsic sat aptovana lhip as yoclhilhma— nic nat aptomjac Dios Apyimtalhnamo.#Gn 17.4-8.
13Aplhinquic nic nat Dios natamin appamejitquiscama Jacob. 14Apmec nic nat mataymong Jacob. Apquinimcasquic nic nat netin, yoyam cotnejic asoc monquinatquiscama appamejitquiscamaclha Dios. Apyanquincaac nic nat olivo yingmenic najan uva yingmenic nav'a mataymong. 15Apquiltimec nic nat acvisay Betel.#Gn 28.18-19.
Ayitsepma Raquel
16Apquilquimpaclhec nic nat tingma Betel. Yamningatoc nic nat tingma Efrata. Invocmec nic nat acnim yoyam cotimsic ayitca Raquel. Inyimtilhec nic nat naysicsa actimquiscama. 17Am nic nat etyacmoc ayitca.
Intomjac nic nat quilvana actomja actimquisquiscama ayitca ayanya Raquel: —Noncavojo nasa inquenyic. Etyamoc sat apquinavo ayitca— nic nat intomjac.
18Invocmec nic nat ayitsepma Raquel. Yicpintama ayitsepma inquiltimec nic nat apvisay ayitca Benoni, Acmayovsa ingvalhoc. Moc actemaclha apvisay nic nat apquiltimem apyap. Apquiltimec nic nat apvisay Benjamín, Apyimnatescama ingvalhoc.
19Inquitsepquic nic nat Raquel. Apquilatoynquic nic nat nalhit amay acyascama tingma Efrata, moc apvisay Belén. 20Apmec nic nat mataymong Jacob. Apquinimcasquic nic nat netin tacjalhop. Actomja asoc monquinatquiscama tacjalhop ac Raquel acvocmo acnim nac jay.
21Apquimpaclhec nic nat Jacob, moc apvisay Israel. Apnacmec nic nat maa, tap tingma apvinatem apvisay Edar. 22Nalhit acnim nic nat intomjac as yoclhilhma. Innec nic nat Jacob moc aptava acvisay Bilha. Appatjetamquic nic nat alhtaa Rubén. Aplovquic nic nat Jacob aplinga amyaa.
Jacob apquitquic
(1 Cr 2.1-2)
Doce ilhnic nat apquitquic Jacob. 23Aptava amamyi ilhnic nat acvisay Lea. Ayitquic nic nat apquilvisay Rubén apteyam apmamyi. Poc apvisay Simeón najan Leví najan Judá najan Isacar najan Zabulón. 24Moc aptava ilhnic nat acvisay Raquel. Ayitquic nic nat apquilvisay José najan Benjamín. 25Raquel alancam nic nat acvisay Bilha. Ayitquic nic nat apquilvisay Dan najan Neftalí. 26Lea alancam nic nat acvisay Zilpa. Ayitquic nic nat apquilvisay Gad najan Aser. Eycaso apquilvamlha Jacob apquitquic. Apquilaoclha ilhnic nat Padan-aram.
Apquitsepma Isaac
27Aplhinquic nic nat Jacob. Maycaa ilhnic nat aptomjac apyap tingma pac Isaac. Apvisay nic nat tingma Mamre, moc apvisay Arba, moc apvisay Hebrón. Siclhoc nic nat tingma pac Abraham najan Isaac.#Gn 13.18. 28Invocmec nic nat 180 años aptiyascam Isaac. Apquitsepquic nic nat. 29Apvanyam apanco ilhnic nat Isaac. Appalhavocmec nic nat apquilyeyjamcaa. Apquilatoynquic nic nat apquitquic apvisay Esaú najan Jacob.
Currently Selected:
GÉNESIS 35: ENHL
Highlight
Share
Copy
Want to have your highlights saved across all your devices? Sign up or sign in
