LOS HECHOS 23

1Apquilanoc alhta Pablo apquilviscaa apquilpamejitsomap. Aptomjac alhta apquilanya:

—Elyipmaa. Actamilcasquic coo mataa evalhoc naysicsa sictiyascam napato Dios Ingyapam —alhta aptomjac.

2Apnec maa Ananías aptomja apquimja apmamyi sacerdote. Yejemoc alhta apquilanya Ananías apquillhalhmaa:

—Elticpam apatong Pablo —alhta aptomjac. 3Apcatingmavoc alhta Pablo:

—¡Dios Ingyapam sat eyamoncasiclha lhip (eticpam lhip)! ¡Apquilaycmascam nac lhip!#Mt 23.27. Apquiltamjo inyicje lhip eyitsic singanamaclha Dios, yoyam jeyicpilcojo. Aptovasqui nac lhip singanamaclha Dios Ingyapam. Ayinyemaclha apcanya nac lhip oticpongalhca —alhta aptomjac.

4Apquiltomjac alhta apnaycamo lhama apquilanya Pablo:

—¿Apyamnam ya lhquip apvisay sacerdote apyimtalhnamo napato Dios Ingyapam? —alhta apquiltomjac.

5Apcatingmavoc alhta Pablo:

—Elyipmaa. Am coo oyasamcoc apvisay sacerdote apyimtalhnamo. Yitnec vaycajac actalhesomalhca: “Noyamnam nasa apvisay apyimtalhnamo nipyesicsa enlhitaoc” —alhta aptomjac.#Ex 22.28.

6Apquilyicpilcangvocmec alhta Pablo apquilviscaa. Napocja apquiltomja saduceos najan napocja apquiltomja fariseos. Yejemoc alhta apyimnatesa appayvam Pablo:

—Elyipmaa. Fariseo nac coo,#Hch 26.5; Fil 3.5. sictomja fariseo apquitca. Apquililtamjo inyicje jelyicpilcojo quellhip ayinyemaclha moyasquiyam actemaclha apnalhaticjangviyam apquilmasquingvaycmo —alhta aptomjac.

7Lhama alhta aplhena as asoc. Yejemoc alhta apquilatingmacpo saduceos najan fariseos. Apquilatingmacpec alhta aplhamoclhojo enlhit apcaneyquiclhilha. 8Apquilanayquic mataa saduceos mepqui apnalhaticjangviyam apquilmasquingvaycmo.#Mt 22.23; Mr 12.18; Lc 20.27. Apquilanayquic najan mepqui ángeles Dios apquilasinancama najan mepqui somquic quilyicjamo. Eyca am elyascacmoc mataa fariseos aclhamoclhojo asoc. 9Apyinimcasquic alhta olhma aplhamoclhojo. Apquilaneclhec alhta netin napocja apquilyascamco apquiltemaclha apquilvisay fariseos. Apquilyimnatasquic alhta apquilpayvam:

—Am nincoo ongvitac apmapsom enlhit nac lha. Nasoc lhaja aplinga appayvam espíritu inlhoyqui laa appayvam ángel Dios apcasinancama. Am ongilinmelham Dios Ingyapam —alhta apquiltomjac.

10Avanjec alhta apquilatingmomap. Incacoc alhta apnenyic singilpilhtetemo apvisqui elyaptacpoc Pablo. Yejemoc alhta apquilapajasa singilpilhtetemo apquilanya elyinyovascaclhac nipyesicsa enlhitaoc, yoyam elyantimiclha Pablo singilpilhtetemo tingma pac.

11Moc alhtaa alhta intomjac. Apvitac alhta Pablo napaat Visqui ingac. Aptomjac alhta apcanya:

—Pablo, iyimnaticsojo apvalhoc. Aplingasquic lhip sicvisay tingma Jerusalén. Elngacsic sat najan sicvisay tingma Roma —alhta aptomjac.

Aclhanma apquilvalhoc yoyam elajic Pablo

12Moc acnim alhta intomjac. Inquillhenquic alhta apquilvalhoc napocja judíos, yoyam elajic Pablo. Nasoc anco alhta apquiltimescasac apquilpayvam. Am alhta elmayajamco eltovamcoc najan elyinamcoc amamyi yoyam elajic Pablo. 13Cuarenta tap alhta enlhitaoc, yoyam elpasmoc elajic Pablo. 14Apquilyoclhec alhta apnamcaclha apquilimja apmamyi sacerdotes najan judíos apquilyimtalhnamo. Apquiltomjac alhta apquilanya:

—Ningiltimescasquic nincoo nasoc anco ninpayvam. Montovejec sat nintom acvocmo ningajem Pablo —alhta apquiltomjac. 15Elyoclhojo sat singilpilhtetemo apvisqui quellhip najan apquilviscaa apquilpamejitsomap. Elane sat elyantamenta mocjam secaseclha Pablo napatavo quellhip. Malha yoyam elpeyvescasiclha sat eltimjic. Ongilpenacsojoc sat nincoo, yoyam ongajic Pablo yicpintama apvoy —alhta apquiltomjac.

16Aplingac alhta amyaa Pablo apipjenim. Yejemoc alhta apquiltimnasquiclho amyaa Pablo singilpilhtetemo tingma pac. 17Apquevamcaa alhta Pablo lhama capitán. Aptomjac alhta apcanya:

—Iyantimiclha sat as enlhit apquitcoc apnaclha singilpilhtetemo apvisqui. Yitnec amyaa, yoyam eltimnacsic —alhta aptomjac Pablo.

18Yejemoc alhta apyantamacpo enlhit apquitcoc apnaclha singilpilhtetemo apvisqui. Aptomjac alhta capitán:

—Apnec maa Pablo singilpilhtetomaclha. Apquiltomjac lhac oyantamenta asi enlhit apquitcoc. Yitnec amyaa, yoyam eltimnacsic lhip —alhta aptomjac.

19Apmec alhta apmic singilpilhtetemo apvisqui enlhit apquitcoc apyantama lhapco. Apquilmalhnam alhta:

—¿Soc amyaa pa jeltimnacsic qui? —alhta aptomjac.

20Apcatingmavoc alhta enlhit apquitcoc:

—Apquilpamejitsacpec judíos quip aja. Apquililtamjoc elmalhnac lhip, yoyam eyantimiclha secaseclha Pablo apnamcaclha apquilviscaa apquilpamejitsomap. Malha yoyam elpeyvescasiclha sat eltimjic. 21Nolyejiclhojo nasa lhip. Ayinyemaclha cuarenta tap enlhitaoc apquiljalhanma, yoyam elajic Pablo. Nasoc anco apquiltimescasac apquilpayvam. Am elmayajamco aptoycaoc najan elyinamcoc acvocmo apquilajem Pablo. Apquilpenaso inyicje, lhip lhac apquiljalhnac appayvam —alhta aptomjac.

22Yejemoc alhta apcapajasa singilpilhtetemo apvisqui enlhit apquitcoc. Aptomjac alhta apcanya:

—Noltimnas nasa actomjaclha seltimnascaycta lhip —alhta aptomjac.

Apcapajasomap Pablo apnaclha yatapvisqui Félix

23Yejemoc alhta apquilevamcaa singilpilhtetemo apvisqui apcanit capitán. Aptomjac alhta apquilanya:

—Elpenacsojo sat doscientos singilpilhtetemo apquillhinga nalhpop. Najan lha setenta singilpilhtetemo nolhing apcapaoc. Najan doscientos singilpilhtetemo apquilmaycam sovjeva. Elyacsic sat tingma Cesarea a las nueve alhtaa. 24Eltingyasquis sat najan apquilquinamtem Pablo. Eltamilsojo sat elyantimiclha apnaclha yatapvisqui Félix —alhta aptomjac. 25Aptalhoscasquic alhta vaycajac singilpilhtetemo apvisqui:

26“Coo nac sicvisay Claudio Lisias. Inlhenquic evalhoc lhip Félix yatapvisqui aptamila. 27Apmacpec alhta as enlhit. Co Judea alhta apquilmam. Apquililtamjoc alhta inyicje elajic. Lhama alhta siclinga aptomja co Roma. Yejemoc alhta sicnalaclho singilpilhtetemo sicmiyova as enlhit. 28Altamjoc alhta oyasamcojo actemaclha apquilantipquiscama apvisay as enlhit. Acyantamaclhec alhta apnamcaclha apquilviscaa apquilpamejitsomap. 29Acyasingvocmec alhta apquiltemaclha apancaoc judíos ayinyema aptipquiscascam apvisay. Paj inyicje aptemaclha as enlhit, yoyam ematong najan yoyam colhic acnescacmo singilpilhtetomaclha. 30Yejemoc alhta siclinga amyaa apquilyilhanimquiscama judíos, yoyam elajic as enlhit. Yejemoc siyapajasa as enlhit apnaclha lhip. Alanayquic lhac judíos apquiltomja apquilantipquiscama apvisay, yoyam ellhenic napato lhip. Vamlha sictalhescama” —alhta intomjac vaycajac.

31Yejemoc alhta apquilyajaclho singilpilhtetemo. Apquilyantamaclhec alhta Pablo alhtaa. Apquilvoclhec alhta tingma Antípatris. 32Moc acnim alhta intomjac. Apquiltajavoc alhta tingma apancaoc singilpilhtetemo apquillhingam nalhpop. Apquilyantamaclhec alhta mocjam Pablo singilpilhtetemo nolhing apcapaoc. 33Apquilvoclhec alhta tingma Cesarea. Yejemoc alhta apquilmesa vaycajac yatapvisqui (Félix). Apyantimcaseclhec alhta Pablo apnaclha yatapvisqui. 34Natamin apquilyipsatem vaycajac yatapvisqui apquilmalhnamcaa alhta Pablo:

—¿Jalhco acpayjo lhip apcaoclha? —alhta aptomjac.

Apcatingmavoc alhta Pablo:

—Yoclhilhma Cilicia —alhta aptomjac.

35Aptomjac alhta apcanya yatapvisqui:

—Apquilvoctac sat ancoc aptomja apquiltipquiscascam lhip apvisay, ongvaylhojoc sat aptemaclha lhip —alhta aptomjac. Yejemoc alhta apquilanyacpo singilpilhtetemo eltamilsic Pablo Herodes tingma pac.

Currently Selected:

LOS HECHOS 23: ENHL

Highlight

Copy