1 CORINTIOS 9

Asoc apmopvan etingya apóstol aptomja soycam amyaa

1Naso, evanquic coo lha otingya asoc acno aptemaclha poc apóstol. Ayinyemaclha actomjac coo lha sicvitay Visqui ingac Jesús.#Hch 9.3-6; 1 Co 15.8; Gá 1.11-16. Quellhip apquiltomja malha acyanmongam sictamjaycam ayinyema Visqui ingac. 2Apquilyascacmec sat ancoc napocja enlhitaoc sicvisay apóstol. Nojelyasquim nasa coo, ayinyemaclha apquilyanmoncasquic alhta apquilvalhoc quellhip ayinyema sictamjaycam coo. Colhejec sat acyascacmo sictimem apóstol.

3Ayatingmavoc coo mataa yoyam mejelyascamejec apquiltomja selinmelhaycam. 4Evanquic coo ongvanic quellhip yoyam jelmesic sictom najan sicyam. 5Evanquic coo lha otnejic etava quilvana macyanmonquiscama avalhoc yoyam otnejic mataa siclhalhma. Acno apquiltemaclha mataa poc apóstoles najan Visqui ingac apquilyalhinga najan Pedro. 6¿Ningilvamlha ya nincoo ningilanyomalhca yoyam ongiltamjam coo najan Bernabé? ¿Mongvanqueje ya nincoo ongillhovac asoc naysicsa ningillhicmoscama tasic amyaa? Ingvanqui inyicje. 7Actomjac coo silanya quellhip: Paj lhama singilpilhtetemo epasmoc apquilnapomacpilha mepqui aplhoy acyanmongam. Apvanquic enlhit etovc acyilhna aptomja apquinayclha. Apvanquic mataa enlhit alyanca apnatoscama eynic neme ac apyingmenic. 8Jave acvamlha siclhanma sicpayvam ajanco nintemaclha mataa. Yitnec najan lha aclhanma Dios appayvam actalhesomalhca. 9Yitnec singanamaclha actalhesomalhca aplhanma ilhnic nat Moisés: “Nongyatquisquis nasa bozal ayajapquiscama avajic vayqui naysicsa ningyatemenma acyilhna” —nic nat intomjac appayvam.#Dt 25.4; 1 Ti 5.18. Am nic nat elhenac vayqui Dios. 10Aplhenqui inyicje ningiltemaclha nincoo. Naso, nincoo ningillhenomalhca singanamaclha actalhesomalhca. Yitnec mataa aljalhneycam apvalhoc enlhit aptomja apquilcacjam najan aptomja apnaclhama acyilhna yoyam elhquiclha nicja acyilhna. 11Ningillhicmosquic alhta Dios appayvam nipyesicsa quellhip, malha ninginayclha alhta actic. ¿Mongvanqueje ya nincoo ongillhovac asoc ayitcoc ayinyema quellhip, malha ningillhoy nicja acyilhna?#Ro 15.27. 12Apquillhocac mataa asoc poc soycam amyaa nipyesicsa quellhip. ¿Am cotneje ya ningillhoy ingmamyi nincoo?

Am alhta eyca ongiltamjoc mataa ongillhovac asoc ayinyema quellhip. Nintingyamquic nincoo mataa asoc inganco. Ningiltamjoc yoyam colngalhcac mataa tasic amyaa ayinyema Cristo. Am ongiltamjoc ongilyacsilhma. 13Apquilyasamcoc quellhip actemaclha apquiltamjaycam Dios apquilancam congne tingma apponquinomap. Apquiltovquic mataa nicja asoc acninquinomalhca tingma apponquinomap.#Dt 18.1. Apquiltovquic najan mataa apquilancam nicja asoc macmescama netin acvatnamalhquilha. 14Yitnec najan appayvam singanama Visqui ingac yoyam ongillhovac asoc ayaymalhca ningiltomja ningilpayescama tasic amyaa.#Mt 10.10; Lc 10.7. 15Am alhta oltamjoc mataa olhcac asoc ayinyema quellhip. Am otalhoscasac quellhip as vaycajac yoyam jelmesic asoc ayaymalhca coo. Actamila anco actemaclha sictingyey ajanco asoc ajac, malha sicyimtalhnesomalhco ajanco. Pac omyoc actemaclha sictingyey ajanco asoc ajac, malha yoyam olnapalhca.

16Am eyca oyimtalhnesalhcoc ajanco naysicsa siclingascama tasic amyaa. Movanquejec coo molngacsic as amyaa ayinyemaclha siyanyomalhca otnejic. Coo sat layi actomja mepqui siclingascama tasic amyaa.#Jer 20.9; Am 3.8. 17Aclingasquic sat ancoc tasic amyaa mepqui siyanyomalhca, olhcac sat acyanmongam. Eyasinaquic alhta Dios yoyam olngacsic tasic amyaa. ¿Soc asoc sat coyanmong actemaclha siclingascama? 18Paj acyanmongam. Aclingasquic coo mataa tasic amyaa mepqui acyanmongam najan mepqui siclhanma yoyam jelmesic asoc ayaymomalhca.

19Jave coo silancam sicmomalhca. Evanquic otnejic siltamjoclha otnejic. Sictimem ajanco eyca silancam aplhamoclhojo enlhitaoc yoyam olhamasiclha Jesucristo apmolhama. 20Acnec sat ancoc nipyesicsa judíos, otniclhac sat judío apanco. Altamjoc olhamasiclha Jesucristo apmolhama nipyesicsa judíos. Paj coo siyanyomalhca oyiplovsic singanamaclha Moisés. Acnec sat ancoc nipyesicsa maa, oyiplovsic sat coo lha singanamaclha. Altamjoc coo olhamasiclha Jesucristo apmolhama nipyesicsa maa. 21Movanquejec coo mepqui singanamaclha Dios, ayinyemaclha acyiplovcasquic singanamaclha Cristo. Acnec sat ancoc nipyesicsa metnaja judíos mepqui singanamaclha, otniclhac sat metnaja judío. Altamjoc olhamasiclha Jesucristo apmolhama nipyesicsa metnaja judíos. 22Acnec sat ancoc nipyesicsa enlhitaoc coyimnaa mocjam apquilvalhoc apquiltomja melyasquiyam, olhnasojoc sat najan apquiltemaclha. Altamjoc olhamasiclha Jesucristo apmolhama nipyesicsa maa. Acnasoc alhta moclhama apquiltemaclha enlhitaoc yoyam elvomsacpoc tap apquiltomja melyasquiyam. 23Actimec coo aclhamoclhojo actemaclha, ayinyema aclhanma evalhoc tasic amyaa. Altamjoc coo lha opasmoc singaycaoc ayinyema tasic amyaa.

24Apquilyasamcoc quellhip actemaclha apquilyamasomap enlhit lhalhma anco apquillanay carrera. Apnateymaoclhec aplhamoclhojo, apvamlha eyca lhama aptomja apvoyam apmamyi elhcac sat acyanmongam. 25Apquilpenasoc mataa apquilhacjam aclhamoclhojo asoc, malha apquiltamilcasomacpo apanco. Apnateymaoclhec mataa yoyam ellhovac apquilatanma, malha catquin ava mepqui acmamnave. Nincoo eyca ongiltimjic sat malha carrera naysicsa ningyiplovquiscama Dios appayvam. Ongillhovac sat acyanmongam asoc acmamnave actomja comasquingvoyam, am colhno apquilatanma, malha catquin ava yoyam copalamoc. Elyimnac sat quellhip naysicsa apquilyiplovquiscama yoyam ellhovac acyanmongam. 26Acyiplovcasquic coo mataa, malha siyinyem carrera mepqui sicyitnocjamongvoyam. Acyiplovcasquic coo mataa, malha silnapomalhca emoc mepqui sicyitnocjamongvoyam. 27Actamilsalhcoc ajanco, altamasquic coo sicyovoclhojo ajanco malha asoc navjac ningiltamescama yoyam jingilyejiclhojo. Am oltamjoc otvasalhca napato Dios naysicsa siclingascama tasic amyaa nipyesicsa enlhitaoc.

Currently Selected:

1 CORINTIOS 9: ENHL

Highlight

Copy