1 CORINTIOS 6

Actemaclha apquilatingmoctamo napatavo singyicpilquemo metnaja Jesucristo apmolhama

1Yitnec mocjam moc asoc nipyesicsa quellhip, actemaclha apquilatingmoctamo. Apquilatingmacpec sat ancoc apcanit ingilyalhinga. ¿Soctomja apquiltingya nac singyicpilquemo metnaja Jesucristo apmolhama yoyam epeyvescasiclha quellhip? ¿Soctomja meltimnasa nac Jesucristo apmolhama yoyam elpeyvescasiclha? 2Quellhip apquiltomja Dios apquilyacyescama. ¿Am ya elyasamcoc yoyam elyicpilcojoc sat quellhip enlhitaoc lhalhma anco? ¿Colapvanqueje ya quellhip elpeyvescasiclha asoc ayitcoc nipyesicsa quellhip? 3¿Am ya elyasamcoc quellhip yoyam ongiltimjic nincoo ningyicpilquemo ángeles Dios apquilasinancama? Incaymalhquic ongilyasamcojo mataa nincoo yoyam ongilpeyvescasiclha asoc ayitcoc ayinyema as nalhpop. 4Yitnec quellhip apquilatingmomap nipyesicsa. ¿Soctomja apquililtimnasa nac quellhip metnaja Jesucristo apmolhama yoyam elpeyvescasiclha quellhip? 5Eycaso actomja siclhanma yoyam elmancangvomoc sat quellhip. ¿Am ya elhnac lhama ingyalhing apmopvan epeyvescasiclha asoc nipyesicsa ingilyalhinga? 6Apquilatingmacpec inyicje quellhip napatavo singyicpilquemo metnaja Jesucristo apmolhama.

7Am coltamilo actemaclha apquilatingmomap nipyesicsa quellhip, actomja acmasom anco. ¿Colapvanqueje ya colhic acpejescaa mataa alhtoc quellhip? ¿Apquilmiyovqui ya quellhip yoyam colminyilhalhca asoc apancaoc? 8Yitnec apquilpejescay mataa quellhip. Yitnec apquilminyilhma quellhip nipyesicsa ingilyalhinga.

9-10¿Am ya elyasamcoc quellhip yoyam melpalhavomejec sat Dios apquilnancascama apquiltomja melpeyvomo? Noelyinimsap nasa quellhip. Melpalhavomejec sat Dios apquilnancascama apquiltomja apquilanatama najan apquiltomja apquilayo quilaycmasquiscama acyitsomalhca Dios najan apquiltomja apnatovascama alyimjapma najan apquiltomja moc actemaclha apquilpatjetaycaoc najan apquiltomja apquilminyilhma najan apquiltomja apquilmasma asoc najan apquiltomja ayajem anmin najan apquiltomja apquilvinéycam Dios najan apquiltomja ticyovam inyap. 11Eycaso apquiltemaclha quellhip nano. Quilhvo eyca almascosalhco melyascalhma quellhip, apquiltomja Dios apquilyacyescama. Innec altimesa apquilpeyvomo napato Dios. Eycaso ayinyema Jesucristo Visqui ingac najan ayinyema Espíritu apanco Dios.

Actemaclha acponquinomalhca ningyovoclhojo

12Yitnec apquillhanma napocja ingilyalhinga: Evanquic ollanac aclhamoclhojo siltamjoclha ollana —alhta apquiltomjac. Actomjac coo silanya quellhip: Naso, ingvanqui inyicje. Cotnaja aclhamoclhojo asoc altamila yoyam comoc ingvalhoc.#1 Co 10.23. Apquiltomjac mataa poc: Evanquic coo aclhamoclhojo asoc mepqui selyascamalhma —alhta apquiltomjac. Actomjac coo silanya quellhip: Naso, ingvanqui inyicje. Mongvanquejec ongilyejiclhojo aclhamoclhojo asoc yoyam ongilyiplovcasojo. 13Apquiltomjac mataa quellhip: Nintom actomja yoyam ongilyipcanmojo. Yitnec nincoo ingvocmo yoyam ontovamcoc nintom —alhta apquiltomjac. Actomjac coo silanya quellhip: Covac sat acnim yoyam etvacsic Dios actemaclha nintom najan ingvocmo. Yitnec nincoo ningyovoclhojo. Mongvanquejec eyca ongyiplovjo actemaclha ningilanatama. Yitnec nincoo ningyovoclhojo yoyam ongilanam Visqui ingac. Apquiltamjoc Visqui ingac etamilsic ningyovoclhojo nincoo. 14Najan moc: Dios aptomja alhta aplhaticjasquiyam Visqui ingac. Jingillhaticjascomoc sat nincoo lha ayinyema apmopvan actamongvomlha nelha acnim.

15¿Am ya elyasamcoc quellhip actemaclha ningyovoclhojo actomja acyipitcay Cristo apyovoclhojo, malha alyiptetaclha apanco? ¿Invanqui ya ongilyipitcojo inganco quilvana alanatama ningiltomja Cristo alyiptetaclha? Paj, mongvanquejec ongyipitcojo. 16Apquilyasamco inyicje quellhip. Apyipitcavoc sat ancoc enlhit quilvana alanatama, cotnejic sat malha lhama apyovoclhojo. Intomjac nic nat Dios appayvam actalhesomalhca: “Cotniclhac sat lhama apyovoclhojo enlhit najan quilvana” —nic nat intomjac.#Gn 2.24. 17Ningyipitcavoc sat ancoc Visqui ingac, ongiltimjic sat malha lhama ayinyema Espíritu apanco Cristo.

18Elvatsaoc sat actemaclha apquilanatama quellhip. Jave aclhamoclhojo mongilyascalhma actomja actovascama ningilyovoclhojo. Ningiltomjac sat ancoc ningilanatama, ongiltovacsic sat ningilyovoclhojo. 19¿Am ya elyasamcoc quellhip apquilyovoclhojo aptomja Espíritu Santo tingma pac aptomja apponquinomap? Apnec apquilvalhoc quellhip Espíritu Santo Dios apmescama.#1 Co 3.16; 2 Co 6.16. Colapvanquejec quellhip ellanac apquiltamjoclha ellana. 20Avanjec alhta apyanmonquiscama Dios acyanmongam quellhip. Elane sat comojoc apquilyovoclhojo apquiltimem apquilayo Dios.

Currently Selected:

1 CORINTIOS 6: ENHL

Highlight

Copy