1 CORINTIOS 5
5
Aclhenomalhca actemaclha ningilanatama
1Inlingalhquic nipyesicsa quellhip actemaclha apquilanatama. Aplhenacpec ingyalhing apmayclha apanco moc inquin.#Dt 22.30. Eycaso actomja acmasom anco nintemaclha, am colhno apquiltemaclha enlhitaoc lhalhma anco. 2Yitnec mocjam quellhip apquilyimtalhnesomacpo apanco. Incaymalhquic elmancangvomoc quellhip actemaclha yoyam colyitnocjojoc apquilvalhoc. Incaymalhquic elantipsic Jesucristo apmolhama ingyalhing aptomja apquilanatama. 3Am olhnac coo quilhvo nipyesicsa quellhip. Innec eyca acvamlha sicvanmoncama nipyesicsa quellhip. Inyicpilcoc lhac sicvanmoncama aptemaclha ingyalhing apquilanatama, malha sicna sicyovoclhojo nipyesicsa quellhip. 4Elaniclha sat quellhip naysicsa apquillhanma apvisay Jesucristo Visqui ingac. Colhic sat coo lha sicvanmoncama nipyesicsa quellhip. Colhic sat nipyesicsa quellhip apmopvan Jesucristo Visqui ingac. 5Pac ongilanic yavey Satanás yoyam comoc as ingyalhing. Yoyam etvasacpoc apyovoclhojo, eyca comoc sat tap apjangaoc acvocmo sat acnim apvoyctamlha Visqui ingac Jesús.
6Am coltamiloc eltimjic mataa quellhip apquilyimtalhnesomacpo apanco. Apquilyasamco inyicje quellhip actemaclha ninlhanma: Ningincaac sat ancoc ayimpascaoc ayitcoc, eyaveclhac sat apyovoclhojo sepo yompac actomja acyelaquiscama.#Gá 5.9. Ayimpascaoc actomja malha mongilyascalhma. 7Etlhaoc sat quellhip apquiltemaclha acmasom, malha ningillhacjam ayimpascaoc ápaoc. Eltime sat quellhip malha sepo yompac mepqui mayincajay ayimpascaoc. Aptovcacpec mataa quilpasmongam aptema nac jay nipyesicsa pascua caya apquilyeycajaycaoc.#Ex 12.5. Quellhip apquiltomja malha sepo yompac mepqui mayincajay ayimpascaoc. Ayinyemaclha Cristo aptomja malha nipquesic apquitcoc apmatnam actemaclha macmescama Dios. Apquitsepquic alhta singyanmongam nincoo. 8Mongillanejec mocjam pascua caya apquilyeycajaycaoc naysicsa cotamilaycam ingvalhoc najan naysicsa ningillanay acmasom. Mongiltimjic sat malha sepo yompac mayincajay ayimpascaoc.#Ex 13.7; Dt 16.3. Ingilane sat ongillanac pascua caya apquilyeycajaycaoc actemaclha actamila ingvalhoc najan actemaclha actomja nasoc anco. Ongiltimjic sat malha quilpasmongam mepqui mayincajay ayimpascaoc.
9Actalhescasquic alhta quellhip moc vaycajac. Actomjac alhta silanya quellhip: Noelpasmiclha nasa apquiltomja apquilanatama. 10Am otnajac ongvanic quellhip yoyam melpasmiclha enlhitaoc lhalhma anco apquiltomja apquilanatama najan apquiltomja apquilmasma asoc najan apquiltomja apquilminyilhma najan apquiltomja apquilayo quilaycmasquiscama acyitsomalhca Dios. Apquilyamyiclhec sat ancoc quellhip enlhitaoc lhalhma anco, incaymalhquic najan elyinyoc quellhip as nalhpop. 11Actomjac coo silanya yoyam elyasamcojo quellhip: Noelpasmiclha nasa ingilyalhing aptomja apquilanatama najan aptomja apmasma asoc najan aptomja apcayo quilaycmasquiscama acyitsomalhca Dios najan aptomja apvinéycam Dios najan aptomja apyam mataa anmin najan aptomja apminyilhma. Noelpasmiclha nasa aptoycaoc as ingyalhing. 12-13Am oltamjoc olyicpilcojoc metnaja Jesucristo apmolhama. Dios sat elyicpilcojoc as enlhitaoc. Elyicpilcojo sat quellhip aptomja Jesucristo apmolhama. Elantipquis sat quellhip ingyalhing aptomja apmapsom.#Dt 13.5; 17.7.
Currently Selected:
1 CORINTIOS 5: ENHL
Highlight
Share
Copy
Want to have your highlights saved across all your devices? Sign up or sign in
