1 CORINTIOS 3
3
Apquiltamjaycamo lhama apquiltomja Dios apquilancam
1Quellhip elyalhinga. Am alhta ovanac yoyam olhicmocsic inyicje quellhip. Ayinyemaclha am colhenac apquilvalhoc asoc ayinyema Espíritu Santo. Inlhenquic apquilvalhoc quellhip acvamlha asoc apancaoc, malha sicaa ayitcoc colyasquiyam Cristo. 2Allhicmosquic alhta quellhip amyaa, malha sicaa ningmescama neme.#He 5.12-13. Ayinyemaclha am alhta elyasamcoc quellhip amyaa acyitsomalhca nintom acyimnatem. Am najan elyasamcoc quilhvo nac jay. 3Ayinyemaclha apquilvajanamquic mocjam quellhip apquiltemaclha enlhitaoc lhalhma anco. Yitnec mocjam nipyesicsa quellhip apquilyasipquiscama najan apquilatingmoctamo. Inlhenquic acvamlha apquilvalhoc quellhip asoc apancaoc, acno apquiltemaclha enlhitaoc lhalhma anco. 4Ayinyemaclha apquiltomjac mataa poc: “Poc oyiplovcasojo aptemaclha Pablo”. Poc apquiltomjac mataa: “Pac oyiplovcasojo aptemaclha Apolos”#1 Co 1.12. —alhta apquiltomjac quellhip. Apnoc quellhip enlhitaoc lhalhma anco.
5¿Co lha aptema Pablo yi? ¿Co lha aptema Apolos? Nincoo ningiltomja acvamlha ningilancam Dios. Nincoo alhta ayinyema apquilyanmonquiscama apquilvalhoc quellhip. Moclhama alhta ningyiplovquiscama nincoo actemaclha singanama Visqui ingac. 6Coo alhta siyanayclha yamit.#Hch 18.4-11. Apolos aptomja apyesquisaycaoc.#Hch 18.24-28. Dios eyca aptomja apquictinquiscama ayenomalhca. 7Jave sicmovan ajanco sictomja siyanayclha. Jave najan apmopvan aptomja apyesquisaycaoc. Apvamlha Dios aptomja apquictinquiscama apvanquic aclhamoclhojo asoc. 8Acno coo najan sictamjaycamo lhama. Dios sat eyanmongsic actemaclha sictamjaycam coo najan actemaclha aptamjaycam sictamjaycamo lhama. 9Acvamlha nincoo ningiltomja ningiltamjaycamo lhama Dios. Quellhip apquiltomja malha Dios amyip apác yoyam ecniclhac appayvam apquilvalhoc.
Quellhip apquiltomja malha tingma Dios apquillanay. 10Eyasinaquic alhta Dios yoyam ollanac tingma apvojac, sictomja tingma apvisqui sictomja sicyascamco. Eycaso ayinyema seyaycaoc Dios. Poc eyca aptomja apquillaneycaoc tap. Incaymalhquic eltamilsojoc sat apquillaneycaoc. 11Acvamlha lhama acpiquenomalhca tingma apvojac apvisay Jesucristo. Paj lhama enlhit apmopvan ellanac moc. 12Apvanquic enlhit eninquinamcoc yoyam eviscomoc netin. Apvanquic emoc yoyam eyipitsic oro najan plata asoc alyinmomo najan asoc acmamnave. Najan moc asoc mepqui acmamnave acvisay yamit najan avaoc najan papiyov. 13Coyicpilcalhcac sat moclhama actemaclha apquiltamjaycam acvocmo sat acnim ningyicpilcomalhquilha. Coyicpilcalhcac sat nintamjaycam malha naysicsa talha. 14Am sat ancoc comyetac actemaclha aptamjaycam enlhit, elhcac sat acyanmongam. 15Metquic sat ancoc actemaclha aptamjaycam enlhit, cosovjalhcojoc sat comyetic asoc apanco. Evomsacpoc sat tap, malha ayinquitma talha sat cotnejic.
16¿Am ya elyasamcoc quellhip apquiltomja malha tingma pac Dios? ¿Am ya elyasamcoc apna Espíritu apanco Dios apquilvalhoc quellhip?#1 Co 6.19; 2 Co 6.16. 17Nintovasquic sat ancoc Dios tingma pac, jintovacsic sat nincoo lha Dios. Ayinyemaclha Dios tingma pac aptomja apponquinomap. Quellhip apquiltomja malha Dios tingma pac apponquinomap.
18Noelyinimsap nasa quellhip. Ninganayquic sat ancoc coyitnac ningilyascamco inganco ayinyema lhalhma anco, incaymalhquic onlhojoc aptomja meyascamco. Ongiltimjic sat ningilyascamco actemaclha ayinyema Dios. 19Aptanovquic mataa Dios actemaclha ningyascamco inganco ayinyema lhalhma anco. Yitnec nic nat Dios appayvam actalhesomalhca: “Dios sat elmoc apquilyascamco apanco ayinyema lhalhma anco naysicsa apquiltemaclha apancaoc. Malha quiljanma acmam asoc sat cotnejic”.#Job 5.13. 20Nic nat intomjac moc: “Apyasamcoc Visqui ingac actomja alhtoc aclhanma apquilvalhoc apquilyascamco apanco ayinyema lhalhma anco” —nic nat intomjac.#Sal 94.11. 21Noeltime nasa apquilayo poc naysicsa apquilyiplovquiscama aptemaclha poc. Ayinyemaclha aplhamoclhojo apquiltomja quellhip apancaoc: 22najan Pablo najan Apolos najan Pedro najan asoc lhalhma anco najan acyimnatem ingnenyic najan actemaclha ningitsepma najan asoc acnaycaoc quilhvo nac jay najan acnaycaoc nanoc sat. Quellhip apancaoc aclhamoclhojo asoc. 23Quellhip apquiltomja Cristo apmolhama. Cristo eyca aptomja Dios Apquitca.
Currently Selected:
1 CORINTIOS 3: ENHL
Highlight
Share
Copy
Want to have your highlights saved across all your devices? Sign up or sign in
