1 CORINTIOS 11

1Elvajanaoc quellhip sictemaclha coo.#1 Co 4.16; Fil 3.17. Acyiplovcasquic coo lha aptemaclha Cristo.

Actemaclha quilvana naysicsa ninpayvam

2Quellhip elyalhinga. Altamjoc coo otnejic siyayo quellhip, ayinyemaclha elmalhnescasquic mataa quellhip najan apquilyiplovcasquic mataa siyanamaclha eltimjic.#2 Ts 2.15. 3Altamjoc yoyam elyasamcojo quellhip: Cristo aptomja apvisqui moclhama ingilyalhinga, malha apquimja apmamyi yoyam ongilyejiclhojo. Quilvana atava aptomja apvisqui, malha apquimja apmamyi yoyam colyejiclhojo aptava. Dios aptomja apvisqui, malha apquimja apmamyi yoyam elyejiclhojo Cristo. 4Copvanquejec enlhit eyiplovjoc appocanma naysicsa apquilmalhnancama najan naysicsa apquillhicmoscama amyaa ayinyema Dios. Evinacpoc sat apquimja apmamyi apvisay Cristo. 5Covanquejec quilvana mepqui ayajapquiscama apcatic naysicsa almalhnancama najan naysicsa allhicmoscama amyaa ayinyema Dios. Evinacpoc sat atava aptomja apquimja apmamyi. Cotnejic sat malha mepqui ava, acyitsomalhca quilvana alanatama actomja macyesescama. 6Am sat ancoc coyacmoc quilvana cajapsic apcatic apava, incaymalhquic cotnejic acyisem, malha quilvana alanatama. Incaymalhquic cajapsic apcatic quilvana apava, ayinyemaclha am cotamilo cotnejic acyisem quilvana. 7Apvanquic enlhit mepqui appocanma, ayinyemaclha Dios aptomja apnesomacpo enlhit, malha ningvitangvoyacmo tap gloria aptemaclha apyimtalhnamo.#Gn 1.26-27. Quilvana eyca actomja malha ningvitangvoyacmo tap aptemaclha apyimtalhnamo enlhit. 8Apquillanac nic nat Dios enlhit. Am nic nat ingyinyemac quilvana enlhit. Quilvana ilhnic nat ayinyema enlhit. 9Apquillanesquic nic nat Dios quilvana yoyam coyipitcojo enlhit. Jave enlhit yoyam eyipitcojo quilvana.#Gn 2.18-23. 10Incaymalhquic quilvana coyipitsic asoc monquinatquiscama apcatic, ayinyemaclha atava aptomja apyimtalhnamo. Eycaso actomja asoc monquinatquiscama napatavo ángeles. 11Eycaso nintemaclha mataa najan nintemaclha Jesucristo apmolhama: Covanquejec mataa quilvana mepqui aclhalhma. Copvanquejec najan enlhit mepqui aplhalhma. 12Nasoc nic nat actomja quilvana ayinyema enlhit. Nasoc najan aptiyam enlhit apquinyema quilvana. Aclhamoclhojo actomja alinyema Dios.

13Apquilyasamcoc quellhip nintemaclha. ¿Avanqui ya colmalhnac Dios quilvana mepqui ayajapquiscama apcatic? 14Ningilyasingvocmec nintemaclha as nalhpop, am coyispalhcac mataa alvinatem apva enlhit. 15Inyispalhquic mataa alvinatem ava quilvana. Ava alvinatem actomja malha ayajapquiscama apcatic ayinyema Dios. 16Am sat ancoc colcac apquilvalhoc quellhip siclhanma coo, apvancaac jelatingmojo. Cotnaja nintemaclha yoyam colmalhna quilvana naysicsa ninpayvam mepqui ayajapquiscama apcatic. Am coyitnac moc actemaclha aplhamoclhojo Jesucristo apmolhama.

Nintovascama nintom actemaclha ayinyema Visqui ingac

17Pac otalhosquisic quellhip moc amyaa. Am oltamjoc otnejic siyayo quellhip, ayinyemaclha inyangvocmec acmasom apcaneyquiclhilha quellhip. 18Aclingac coo amyaa acyitna colhno moc apquilvalhoc quellhip naysicsa apcaneyquiclha. Nasoc lhaja as amyaa. 19Incaymalhquic inyicje am colhoyc moc apquilvalhoc apcaneyquiclha quellhip, yoyam colhic alyicpilco apquiltomja apquiltamilcasomacpo apanco. 20Inmasquec actomja acvisay nintom actamalma naysicsa apcaneyquiclha quellhip. 21Ayinyemaclha am colhnoc moc aptoycaoc amamyi nintom actamalma. Apquilyipcanacmec mataa aptomja apsayquinta aptom. Uva yingmenic inquilnapac napocja. Mayc inquilnapac mataa poc. 22Tingma apancaoc inyicje innac quellhip. ¿Soctomja meltovcamco najan melyinamco nac siclhoc tingma apancaoc? Quellhip apquiltomja apquilvinéycam Dios apmolhama. Quellhip apquiltomja apquilmanquiscama ingilyalhinga mepqui asoc. ¿Jalhco sat otnejic ongvanic quellhip? ¿Pa ya oyispac apquiltemaclha quellhip? Paj. Actanovquic coo as asoc.

Ninpasmom actamalma

(Mt 26.26-29; Mr 14.22-25; Lc 22.14-20)

23Elhicmosquic alhta coo Visqui ingac, acno actemaclha sillhicmoscama quellhip: Alhtaa alhta intomjac yicpintama apmomap Visqui ingac Jesús. Apmec alhta quilpasmongam Jesús. 24Apquilmalhnescasquic alhta siclho. Apyaptec alhta quilpasmongam. Aptomjac alhta apquilanya: “Eltovaoc quellhip. Eycaso actomja malha sicyovoclhojo apquilmesomap quellhip. Eltime sat mataa yoyam coytic apatic quellhip sictemaclha coo” —alhta aptomjac Jesús. 25Apmec alhta najan ingjaycoc uva yingmenic natamin aptoycaoc. Aptomjac alhta apquilanya: “Eycaso ingjaycoc uva yingmenic actomja asoc monquinatquiscama apmayjayoclha Dios aplhanma alhnancoc,#Ex 24.8; Jer 31.31-34. ayinyema ema ajac acyinquinomalhca.#Ex 24.6-8. Eltime sat mataa naysicsa apyinaycaoc yoyam coytic apatic quellhip sictemaclha coo” —alhta aptomjac. 26Naysicsa aptoycaoc mataa as quilpasmongam najan naysicsa apyinaycaoc as uva yingmenic inlhenalhquic actemaclha apquitsepma Visqui ingac, acvocmo acnim apvoyctamlha sat.

Actemaclha ingvalhoc naysicsa ninpasmom actamalma

27Aptovquic sat ancoc ingyalhing quilpasmongam. Apyinquic sat ancoc uva yingmenic naysicsa mepqui apquilanayclha apvalhoc apanco. Eyca as aptomja aptovascama apyovoclhojo Visqui ingac najan em pac. 28Elyasamcojo siclho actemaclha apquilvalhoc amamyi aptoycaoc quilpasmongam najan amamyi apyinaycaoc uva yingmenic. 29Enlhit aptomja aptom apanco najan apyam apanco naysicsa mepqui aclhanma apvalhoc apyovoclhojo Visqui ingac, covac sat acyanmongayclha. 30Eycaso ayinyema acmasca mataa apyimpejic nipyesicsa quellhip najan melyimnatem najan apquilmasquingvaycmo alhta napocja. 31Ningiltamilsalhcoc sat ancoc inganco, meyanmongsiclhejec sat nintemaclha Visqui ingac. 32Am sat ancoc ongiltamilsalhcoc inganco eyanmongsiclhac sat Visqui ingac nintemaclha inganco yoyam ongillaniclhac ingvalhoc. Yoyam mongiltovasalhquejec lhama enlhitaoc metnaja Jesucristo apmolhama.#Dt 8.5; He 12.5-11.

33Quellhip elyalhinga. Ellalh sat mataa poc yoyam elpasmoc aplhamoclhojo ninpasmom actamalma. 34Incajac sat ancoc mayc ingyalhing, itov siclho tingma pac. Yoyam meyanmongsiclhejec sat Dios apquiltemaclha quellhip. Altamjoc ollaniclhac moc asoc sicvoclho sat nipyesicsa quellhip.

Currently Selected:

1 CORINTIOS 11: ENHL

Highlight

Copy