Zaburey 33
33
Saabu ma bara Takakaa nda Hallasikaa se
1Boro šerrantey, wa kaati nda ɲaali
Abadantaa sabbu se,
zama boro bine šerrantey ga hima nda nga saabuyanoo.
2Wa Abadantaa saabu nda kuntiji,
wa hooray a se nda kurbu linji woykoyni (10)!
3Wa dooni taaga don a se,
wa war hooray jinawey kar ka boori ka kobi a se!
4Zama Abadantaa šennoo ga šerre,
nga goyey kul ga tee nda cimi.
5Šerretaray nda cimi ga kan a se,
Abadantaa borohennataraa ga laboo too.
6Beenaa mana teendi nda kala Abadantaa šennoo,
nga meehewoo ka beenaa hayey kul tee.
7A ga teekoo harey marga kʼi tee affoo,
a ga hari guusu beerey marga nongu foo.
8Yala laboo kul ma hunbur Abadantaa!
Yala aduɲɲa borey kul ma jijiri a jine!
9Zama nga, a mma šelaŋ, de woo kaŋ a nʼa har ga tee,
a ga yaamar, yaamaroo ga teendi.
10Abadantaa ga gandawey dabarey hasara,
a ga jamawey lakkaley ganji.
11Dabarey kaŋ Abadantaa nʼi kayandi ga cindi hala abada,
nga binoo miilewey ga cindi zaman ka kaa zaman.
12Gandaa duu gomni kaŋ se Abadantaa ga tee Koy,
jamaa kaŋ a nʼa suuba sanda nga wanoo.
13Abadantaa goo beenaa ra, a ga guna,
a ga dii adamizey kul.
14Nga gorodogoo ra, a ga guna,
a ga dii laboo borey kul.
15Nga no ka borey kul binoo tee,
a ga lakkal tee borey teegoyey kul se.
16Kokoy sii no kaŋ wongu-ize boobo gʼa hallasi,
Wongaari gaabi beeroo sʼa kaa.
17Bari ma boro hallasi, taari no,
nga nda nga gaabi beeroo kul a si boro kaa kabe ra.
18Nga ne, Abadantaa moɲey sii kala borey ga kaŋ ga hunbur a,
i ga kabu nga borohennataraa ga.
19A gʼi feeri kʼi kaa buuyan ra,
a gʼi noo hunay heraa waati.
20Ir hundoo ga Abadantaa batu,
nga ti ir faabakaa, nga ti ir koraa.
21Ir biney ga ɲaali nga maaganda se,
zama ir nʼir naanaa daŋ nga maa henanantaa ra.
22Abadantaa, yala ni borohennataraa ma bara ir ga,
sanda takaa kaŋ nda ir ga ni batu!
Currently Selected:
Zaburey 33: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
