Zaburey 31
31
Abadantaa ga nga ganakey kaa ngi iberey kabey ra
1Donkey boŋkoynoo ka woo don. Woo ti Dawda zabur foo.
2Abadantaa, ni ga ay gʼay boŋ talfi,
yala ya si haw abada!
Ni šerretaraa ra, ay feeri!
3Ni haŋaa gaaru ya ne,
cahã kʼay feeri!
Tee ya ne tondi kaŋ ra ay gʼay boŋ talfi,
tee ya ne hugu gaabante,
hala ya duu ka hallasi!
4Zama ni ti ay Tondoo, ni ti ay nongu gaabantaa,
ni maaɲoo sabbu se ma huru ay jine, mʼay gongu.
5Mʼay kaa kumsaa ra kaŋ i nʼa hirri ya ne,
zama ni ti nongoo kaŋ ra ay ga tugu.
6Ay gʼay hundoo daŋ ni kaboo ra kʼa talfi ni ga.
Nʼnʼay feeri, Abadantaa, cimi Koyoo.
7Ay ga konna borey kaŋ ga felle tooru yaada ga,
agay, ay gʼay naanaa daŋ Abadantaa ra.
8Ay ga yafarhã, ay ga ɲaali nda ni borohennataraa,
zama ni dii ay binemaraa,
nʼnʼay hundoo binehẽeney bay.
9Manʼay daŋ agay iberoo kaboo ra,
nʼnʼay kayandi ay cewey ga, nʼnʼay feeri.
10Alhormo tee ya ne, Abadantaa, zama ay goo binemarayyan ra.
Dooray se, ay moɲey nda ay hundoo, nda ay gundoo albarkaa ben.
11Binehẽenoo goo mʼay hundoo kaa,
ay jiirey goo ma ben gurzugay ra,
ay laybey nʼay gaaboo benandi,
ay birey ŋandi.
12Ay torrokey maaganda
ay taalammey gʼay tee haarayhaya,
borey kaŋ gʼay bay ga hunbur agay,
borey kaŋ ga dii agay taraa ra ga zuru ka mooru agay.
13Borey dirɲa agay, ay hun lakkaley ra sanda boro kaŋ buu,
ay ga hima nda sanda jinay kaŋ dere.
14Ay maa boro boobo šenni laaley,
hunburay goo ya ne nongoo kul here.
I ga marga ka dii cere ay ga,
i ga kayandi ngi mʼay hundoo kaa.
15Agay, ay nʼay naanaa daŋ ni, Abadantaa ra!
Ay nee: «Ni ti ay Koyoo!»
16Ay hunaroo kul sii kala ni kaboo ra,
ay kaa agay iberey nda borey kaŋ gʼay gaaray kabey ra!
17Suuri, ma ni ndumoo annuuraa daŋ ni tamoo ga,
ay hallasi ni borohennataraa ra!
18Abadantaa, yala ya si haw, ka gar ay na ni cee!
Yala boro laaley ma haw,
yala i ma zunbu ka koy alaahara bila šenni!
19Yala taariharkey ma benbaw,
i ga šelaŋ ka boro šerrantaa kaynandi,
nda meebeeray nda kaynandiyan!
20Abadantaa, ni gomnoo ga beeri
kaŋ nʼgʼa jisi borey se kaŋ ga hunbur ni,
kaŋ nʼgʼa tee borey se kaŋ ga ngi boŋ talfi ni ga,
adamizey jine.
21Nʼgʼi tugu nongu ra kaŋ nʼgʼa lakkal, borey dabarey ra,
nʼgʼi kaa adamizey deeney ra kʼi lanba.
22Albarka ma bara Abadantaa se,
zama a na borohennataray kayfante cebe ya ne
koyra gaabantaa ra!
23Ay nee ay lakkaltunaa ra:
«I nʼay gaaray kʼay kaa ni moɲey cire!»
Amma ni maa ay suurandiyaney
waatoo kaŋ ay ga kaati ka faaba ceeci ni ga.
24Wa baa Abadantaa, war kul kaŋ ti nga ganakey!
Abadantaa ga borey hawgay kaŋ ga naanay a,
amma a ga boro bine beerey zukandi gumo-gumo.
25Wa albarka daŋ war boŋ ra, war ma bine tee,
war kul kaŋ ga Abadantaa batu.
Currently Selected:
Zaburey 31: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
