Yaasawey 21
21
1Kokoy bine ga hima nda gooruyaŋ Abadantaa kaboo ra,
a gʼa bere ka koy nongu kaŋ kan a se here.
2Adamize ga hongu kaŋ nga fondawey kul ga šerre,
amma Abadantaa no ma haya bay kaŋ goo bine ra.
3Ka goy nda šerretaray nda cimi
ti haya kaŋ ga kan Abadantaa se ka bisa sargari.
4Fooma nda binebeeray no ma boro futu zunuboo cebe.
5Boro kaŋ ga goy nda dabari henna ga koy jine nga goyoo ra,
amma boro kaŋ ga cahã ka futu ga koy talkataray here.
6Alman kaŋ duwandi taari ra ga hima nda
hew kaŋ ga bisa kaŋ ga boro ka koy buuyan here.
7Boro futawey laalaroo no mʼi ka koy,
zama i ga wanji ka goy nda cimi.
8Boro futu fondaa ga golbi,
boro henanante teegoyey ga šerre.
9Boro ma bara sooro batuma kanje ra
baa boro ma bara hugu ra woy yenjekaari bande.
10Boro laala ga baa ifutu,
nga cinaa si duu a do alhormo.
11Nda i na ɲooɲokaw zukandi,
saamaa ga duu lakkal,
nda i na lakkalkoyni cawandi, a ga duu bayray.
12Irkoy šerrantaa ga boro futu hugoo laasaabu,
a gʼa kaŋandi bone ra.
13Boro kaŋ na nga haŋaa daabu alfukaaru kaatiroo se,
nga hunday ga kaa ka kaati a si duu zaabi.
14Gomni kaŋ nondi sutura ra ga futay benandi,
bine-daymi kaŋ huru boro darbaa ziibaa ra ga binetunay kanandi.
15Boro šerrante se ka goy nda cimi, ɲaali no,
amma goy futu teekey se halaciyan no.
16Boro kaŋ na fondo hennaa naŋ
ga koy kani bukawey jamaa ra.
17Boro kaŋ ga baa daame ga jaŋay,
boro kaŋ ga baa alaneb hari mooro nda jii si tee almankoyni.
18Boro futu ga tee hayaa kaŋ ga banandi ka šerrante feeri,
zanbante ga huru šerrante dogoo ra.
19Boro ma bara ganda ra kaŋ ti saaji
baa boro ma bara woy yenjekaari tooɲante bande.
20Alman cere-cerante nda jii goo lakkalkoyni hugoo ra,
amma lakkal jaŋante gʼi hasara.
21Boro kaŋ ga hanga šerretaray nda borohennataray
ga duu hunayan, nda šerretaray, nda beeray.
22Lakkalkoyni ga huru wongaarey koyraa ra,
a ga hayaa kaŋandi kaŋ ga i ga naata.
23Boro kaŋ ga hin nga miɲoo nda nga deenoo,
boraa na nga boŋ hawgay binemarayyan ga.
24Boro foomante binebeeri maaɲoo ti ɲooɲokaw,
binebeeray goy no a gʼa tee.
25Hayey kaŋ fuyyante ga boona ey no mʼa wii,
zama kabey ga wanji ka goy.
26Zaaroo kul a ga hayey boonay,
boro šerrante ga noo bila kabuyan.
27Boro futu sargaroo manʼti kala almuhal,
soko nda a nʼa noo nda bine laala.
28Seedezooru ga halaci,
boro kaŋ ga haŋajer ga hin ka šelaŋ waati kul.
29Boro futu ga nga ndumoo daŋ cere ra,
boro šerrante ga nga fondaa tabatandi.
30Lakkal sii no, fahamay sii no,
hoyray sii no kaŋ ga hin ka kay Abadantaa jine.
31Bari ga soolandi wongu zaari se,
hinyan manʼti kala Abadantaa wane.
Currently Selected:
Yaasawey 21: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
