Yaasawey 13
13
1Izʼaru lakkalkoyni mma haŋajer nga baaba hoyraa se,
ɲooɲokaw si maa tejeyan.
2Boro ga huna nda nga meešennoo nafaa,
zanbantey mma jaw ifutu se.
3Boro kaŋ ga hin nga miɲoo ga hin nga boŋ,
boro kaŋ ga hanse ka nga miɲoo feeri ga nga boŋ halaci.
4Fuyyante ga haya boobo boonay, amma a si duu ey,
borey kaŋ ga gaabandi goy ra ga huna daame ra.
5Boro šerrante si baa taari šenni,
boro futu ga borey kaynandi ka nga boŋ haawandi.
6Šerretaray ga boro laadirante dira takaa hawgay,
goy futu no ma zunubante derandi.
7Boro ga nga boŋ tee almankoyni,
ka gar a sii nda baffoo.
Boro tana ga nga boŋ tee talka
ka gar almankoyni no.
8Cee fooyaŋ almankoyni, hala a ma hallasi,
kala a ma hundi hay bana,
alfukaaru sii farratoo woo ra.
9Boro šerrantey gaayoo ga ɲaalandi,
boro futawey fitillaa ga buu.
10Bolsay si kate haya kul kala yenje,
lakkal sii kala borey bande kaŋ ga maa hoyray.
11Alman kaŋ duwandi taka šiira ra ga dere nda cahãyan,
alman kaŋ margandi kayna-kayna ga gooru.
12Tammahã kaŋ gay a si tee ga bine maray,
amma nda nga sakoo tee, tuuri no kaŋ ga hunayan noo.
13Boro kaŋ na hoyray yebebe gʼa bana,
boro kaŋ ga yaamarey beerandi ga duu nga albarkaa.
14Lakkalkoyni hoyraa manʼti kala haya kaŋ ga hunayan noo
ka boro moorandi buuyan kumsawey.
15Lakkal henna ga kate borey ma baa ni,
amma kokoray sii zanbante fondaa ra.
16Boro carma mma goy nda bayray,
lakkal jaŋante mma saamataray kaataray.
17Dontokaw futu mma kaŋ bone ra,
dontokaw naanayante ga kate baani.
18Talkataray nda kayna ti boro kaŋ si baa hoyray bagaa,
boro kaŋ ga yadda tejeyan ga, ga duu beeray.
19Boro kaŋ duu haya kaŋ a gʼa boonay, a ga kan a se,
ka fay nda ifutu manʼti kala almuhal lakkal jaŋante se.
20Boro kaŋ ga dira lakkalkoyney bande ga duu lakkal,
boro kaŋ ga dira lakkal jaŋantey bande ga fara.
21Bone ga hanga zunubantey,
gomni ti šerrantey banaa.
22Boro henna mma tubu naŋ nga haamawey se,
zunubante kabehayaa si jisandi kala šerrante se.
23Faaroo kaŋ talkey nʼa beeri ga duuray boobo tee,
amma šerretaray jaŋay ga hasaraw tee a ra.
24Boro kaŋ si aladabu gobu zaa nga izoo se, boraa si baa nga izoo,
boro kaŋ ga baa nga izoo si bine-bine kʼa daŋ fondaa ra.
25Šerrante ga ŋaa hala boonoo ma hun,
boro futawey gundey ga heray.
Currently Selected:
Yaasawey 13: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
