Yaasawey 10
10
Kokoyoo Sulaymaana yaasayyaŋ
1Sulaymaana yaasayyaŋ ti wey.
Izʼaru lakkalkoyni ga baaboo binoo ɲaalandi,
izʼaru lakkal jaŋante ga ɲaŋoo binoo hẽenandi.
2Alman kaŋ duwandi ifutu ra si nafa,
šerretaray no ma boro hallasi buuyan ra.
3Abadantaa si boro šerrantaa naŋ heray ra,
a ga boro futawey ganji i ma duu woo kaŋ i gʼa boonay.
4Boro kaŋ kaboo si cahã goy ra ga kate nga boŋ ga talkataray,
boro kaŋ kaboo ga cahã goy ra ga duu alman.
5Boro kaŋ ga nga hegaa marga jiyaw waati,
boraa manʼti kala izʼaru lakkalkoyni,
boro kaŋ ga jirbi hegaa waati manʼti kala
izʼaru kaŋ ga boro haawandi.
6Albarka goo boro šerrante boŋoo ga,
ifutu no ma boro laala miɲoo too.
7Ka hongu boro šerrante manʼti kala albarka,
boro laaley maaɲey ga kaa ka funbu.
8Bine lakkalkoyni ga yaamarey dii,
saamataray šenni harkaw ga halaci.
9Boro kaŋ ga dira laadirtaray fondaa ra,
koyoo ga dira nda binekanay,
boro kaŋ na fondo šiira zaa, moo ga kay koyoo ga.
10Boro kaŋ ga nga moɲoo kar mma dabarifutay,
saamataray šenni harkaw ga halaci.
11Boro šerrante miɲoo ra hunayan ga hun,
ifutu no ma boro laala miɲoo too.
12Konnay ga yenje tunandi,
baji ga laybu kul daabu.
13Boro kaŋ ga faham miɲoo ra lakkal goo,
gobu jisandi lakkal jaŋante dumaa se.
14Lakkalkoyney ga bayray dii ka boori,
saamaa miɲoo ga kate a ga halaciyan.
15Almankoyni almanoo mma tee a se koyra gaabante,
alfukaarey talkataraa mma tee i se halaciyan.
16Boro šerrante banaa manʼti kala hunayan,
boro futu duuraa manʼti kala zunubu.
17Boro kaŋ ga hoyray dii ga hunayan fondaa zaa,
boro kaŋ ga dirɲa šenni kaŋ nda i nʼa teje, ga dere.
18Boro kaŋ ga konnaray tugu, miɲoo ga taari har.
Miimandakaw manʼti kala lakkal jaŋante.
19Boro kaŋ šennoo ga boobo si fay nda zunubu,
boro kaŋ ga hin nga miɲoo ti lakkalkoyni.
20Boro šerrante deenoo manʼti kala nzorfu kaaray suubante,
boro futu binoo sii nda alkadar beeri.
21Boro šerrante miɲoo ga boro boobo nafa,
lakkal jaŋay ga saamey wii.
22Abadantaa albarkaa no ma boro tee almankoyni,
a si torro daŋ a bande#10.22 a si torro daŋ a bande, Ebere šenni ra, almaganaa faa ti boro gaaboo si tonton a ga..
23Goyfutu teeyan manʼti kala hooray lakkal jaŋante se,
takaa din da no lakkal ga ti a fahamaykoyni se.
24Woo kaŋ boro futu ga hunbur a, nga no ma duu a,
amma woo kaŋ boro šerrante ga bagʼa ga nondi a se.
25Hew beeri bisayanoo banda ga, boro futu ga dere,
boro šerrante asaasoo ga cindi abada.
26Sanda takaa kaŋ binegar gʼa tee hiɲe se nda dullu moo se,
takaa din da ti fuyyante boro kaŋ gʼa donto se.
27Ka hunbur Abadantaa ga aloomur kukandi,
boro futu jiirey ga dungurandi.
28Boro šerrantey naata kokoroo manʼti kala ɲaali,
boro futawey jitoo ga dere.
29Abadantaa fondaa manʼti kala nongu gaabante boro laadirante se,
amma goy futu teekey se halaciyan no.
30Boro šerrante si hun nga dogoo ra hala abada,
boro futawey si cindi laboo ga.
31Lakkal ga duwandi boro šerrante miɲoo ra,
boro kaŋ ga šenni šiirandi deenoo ga dunbandi.
32Boro šerrante miɲoo ga wan ka haya henna har,
haya šiirante no ma hun boro futu miɲoo ra.
Currently Selected:
Yaasawey 10: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
