Waazukaa 3

Haya foo kul nda nga waatoo

1Haya foo kul nda nga waatoo, haya kul kaŋ goo beenaa cire goo nda nga waatoo:

2hayyan waati goo no, buuyan waati goo no,

dumayan waati goo no, haya kaŋ dumandi doguyanoo waati goo no,

3wiiyan waati goo no, safaryan waati goo no,

kayriyan waati goo no, cinayan waati goo no,

4hẽeniyan waati goo no, haaruyan waati goo no,

binehẽeni waati goo no, ganyan waati goo no,

5tondi warrayan waati goo no, tondi kurmayan waati goo no,

ka boro dii ni gandey ra waati goo no,

masi boro dii ni gandey ra waati goo no,

6ka haya ceeci waati goo no, haya ma dere waati goo no,

ka haya dii waati goo no, ka haya warra waati goo no,

7ka haya kottu waati goo no, ka haya taa waati goo no,

ka dangay waati goo no, ka šelaŋ waati goo no,

8baji waati goo no, konnaray waati goo no,

wongu waati goo no, alaafiya waati goo no.

9Macin ti nafaa kaŋ goykaw ga duu a nga taabiyanoo ra? 10Ay dii taabiyanoo kaŋ Irkoy gʼa daŋ adamizey ga kʼi farandi. 11Irkoy na haya kul tee ka boori nga waatoo ra. A na lakkal mo kaŋ gʼa hongandi kaŋ duumiyan ga bara daŋ adamize binoo ra#3.11 A na lakkal mo kaŋ gʼa hongandi kaŋ duumiyan ga bara daŋ adamize binoo ra, Ebere šenni ra, almaganaa faa ti A na haya bisantey nda wey kaŋ ga kaa ka kaa mo daŋ adamize binoo ra. , ka gar adamize si hin ka faham takaa se kaŋ nda Irkoy ga goy kʼa dii za šintinoo ga hala benantaa ga. 12Ay bay kaŋ haya kul mana baa adamize se kala a ma ɲaali ka huna gomni ra. 13De mo adamize foo kul se ka ŋaa, ka haŋ, ka dii gomni nga taabiyanoo kul ra manʼti kala Irkoy nooyan. 14Ay yadda kaŋ haya kul kaŋ Irkoy nʼa tee ga cindi abada. Boro si haya tonton a ga, boro si haya kaa a ra. Irkoy nka woo tee hala borey ma hunbur nga. 15Haya kaŋ ga bara, a bara ka bisa, haya kaŋ ga kaa ka bara, a bara ka bisa. Haya kaŋ koy, Irkoy gʼa ceeci.

Haya kul benantaa manʼti kala buuyan

16Hayaa ne kaŋ ay dii a koyne waynaa cire: taari huru ciiti dogoo ra, ifutu goo šerretaray dogoo ra. 17Ay nee ay boŋ se: «Irkoy ga boro šerrante nda ifutu ciiti, zama a na haya foo kul kayandi kʼa tee nga waatoo ra, teegoy foo kul nda nga ciitoo.»

18Adamizey here, ay nee ay boŋ se kaŋ Irkoy gʼi sii hala i ma dii kaŋ ngi nda adabbawey kul ga sawa. 19Zama adamizey koddoroo nda adabbawey koddoroo kul ti affoo, adamize ga buu, adabba ga buu, hundi follokaa bara i ra, adamize ma bisa adabba sii nda nafaw: woo kul sii nda addalil. 20I kul si koy kala nongu follokaa ra, i kul si hun kala laboo ra, i kul si yee kala laboo ra. 21May no ma bay wala adamize hundoo ga koy beene wala adabba hundoo ga zunbu ganda, laboo ra? 22Adiši ay dii kaŋ haya kul mana baa adamize se kala a ma ɲaali nda nga teegoyey, zama woo ti nga bagaa. May no mʼa willi katandi hala ma dii hayey kaŋ tee dumaa ga?

Currently Selected:

Waazukaa 3: ses

Highlight

Copy