Waazukaa 2

Daameyan sii nda addalil

1Ay nee ay boŋ se:

«Koy, ay ga ni sii ɲaali here,

nʼga dii haya kaŋ ti gomni.

He, woo mo sii nda addalil.»

2Haaray here ay nee: «Saamataray no!»

Ɲaali here ay nee: «Macin no a gʼa hanse?»

3Ay kayandi ay binoo ra yʼay boŋ noo alaneb hari moora se ka dira nda lakkal ka hawa aduɲɲa hayey ga, ka dii haya kaŋ ti ihenna, kaŋ boro ga duu a waynaa cire nga aloomuroo ra.

4Ay na haya beeriyaŋ tee.

Ay na huguyaŋ cin ay maaɲoo ga,

ay na alaneb faariyaŋ tee ay maaɲoo ga.

5Ay na saddiɲayaŋ nda tuuri faariyaŋ tee ay maaɲoo ga,

ay na tuuri kaŋ izey ga ŋandi dumi boobo duma.

6Ay na hari guusuyaŋ kaa ay maaɲoo ga

ka tuuri kaccey fangaley haŋandi.

7Ay na baɲɲayaŋ nda koŋŋayaŋ day,

ngi izey hayandi ay hugoo ra,

ay na adabba buuna nda ibeeri booboyaŋ mayray

ka bisa borey kul kaŋ nʼay jin Žerizalem ra.

8Ay na nzorfu kaaray nda wura marga ay maaɲoo ga,

i mana hun kala kokoyey nda gandawey alman jisidogey ra.

Ay na donkaw aruyaŋ nda donkaw woyyaŋ zaa ay maaɲoo ga,

ay na haya kaŋ ga aru daamandi tee ka woy booboyaŋ zaa.

9Ay duu maa beeri ka bisa borey kul kaŋ tee ay jine Žerizalem ra.

Amma ay lakkaloo cindi ay ga.

10Haya kul kaŋ ay moɲoo bagʼa, ya nʼa wanji a se,

ya na kaani kul wanji ay binoo se,

zama ay binoo ɲaali ay goyoo kul ra,

woo ti fara bagaa kaŋ ay duu a ay goyoo kul ra.

11Woo banda ga, ay kuubi ka bere hayey kul kaŋ ay kabey nʼi tee here,

nda taabiyanoo kaŋ ay duu a ngi teeyanoo ra,

ay gar kaŋ woo kul sii nda addalil sanda hew gaarandiyan,

nafa kul sii i ra waynaa cire.

Haya beeri sii lakkal nda lakkal jaŋay game

12Woo banda ga, ay bere lakkal,

nda saamataray, nda hollokomtaray here kʼi laasaabu.

Macin no boro kaŋ huru kokoyoo dogoo ra

gʼa tee kaŋ mana bay ka tee?

13Agay, ay dii haya foo: lakkal baa hollay,

sanda takaa kaŋ nda gaay baa kubay.

14Lakkalkoyni goo nda moo ka dii,

amma boro lakkal jaŋante mma dira kubay ra.

Amma ay na haya foo laasaabu

kaŋ ti koddor follokaa bara ihinkaa kul se.

15Ay nee ay boŋ se:

koddor follokaa kaŋ ga hima ka duu lakkal jaŋante ga agay da batu,

adiši macin no a gʼa hanse ya bisa a lakkal?

Ay nee ay boŋ se: «Woo mo sii nda addalil.»

16Lakkalkoyni nda lakkal jaŋante kul cindi lakkaley ra hala abada,

zaarey waatey kaŋ ga kaa ra borey ga dirɲa ihinkaa kul.

Lakkalkoyni ga buu sanda lakkal jaŋante.

17Ay konna hunayan, zama agay se hayaa kaŋ ga tee waynaa cire si boori, zama haya kul sii nda addalil sanda hew gaarandiyan.

18Ay konna goyoo kul kaŋ nda ay taabi waynaa cire, zama ay ga hima kʼa naŋ boraa se kaŋ ga huru ay dogoo ra. 19May no ma bay wala a ga dira nda lakkalkoynitaray wala hollokomtaray? Ka gar hayaa kul kaŋ ay duu a goyoo ra kaŋ ay nʼa tee nda lakkal waynaa cire, nga no ma kaa ka duu a. Woo mo sii nda addalil. 20Woo ka kate ay binoo hun goyoo kul se kaŋ nda ay taabi waynaa cire.

21Boro goo no kaŋ goy nda lakkal, nda bayray, nda gaabandiyan, amma boro tana kaŋ mana goy no ma duu nga fara bagaa. Woo mo sii nda addalil, ifutu beeri no. 22Macin no boro ga duu a goyoo nda almušakkawey ra kaŋ a gʼi tee waynaa cire? 23Nga zaarey kul manʼti kala farayan, a si duu nafa kul nga goyoo ra nda manʼti dooray. Ba cijin here binoo si kani. Woo mo sii nda addalil.

Gomni si hun kala Irkoy do

24Haya kul si baa adamize se kala ŋaayan, nda haŋyan, nda a ma dii nga goyoo gomnoo. Ay dii kaŋ woo kul mo Irkoy no mʼa tee boro se.

25May no ma hin ka ŋaa ka ɲaali

nda a mana hun a se Irkoy do?

26Zama boro kaŋ ga kan a se, a gʼa noo lakkal, nda bayray, nda ɲaali, amma zunubante, a gʼa hugandi a ma goy ka marga, kʼa jisi boraa se kaŋ ga kan Irkoy se. Woo mo sii nda addalil sanda hew gaarandiyan.

Currently Selected:

Waazukaa 2: ses

Highlight

Copy