Matie e lɛl 27

Wɛl oc Jesu im Pilat ecʼany af

Mark 15.1; Luk 23.1-2; Jan 18.28-32

1Eke lɛgŋ ɛny a, ibribr fafa, egb waw ɛsɛl ɛgbɛl a fɛŋ lele Jwifɛl ecʼagŋ ekpekp ab ab okr af ɛgŋ eb eke kʼibi Jesu. 2-Nʼↄŋ wɛl ↄny awŋʼn, -lʼoc -nʼim -nʼↄŋ ow Pilat, Rom iy ekʼel Jude ecʼes ɛw ɛs. #27.2 Rom eyŋ ↄↄm Jwifɛl abusu eke kʼibi ɛgŋ; na sosiɛm anake Jwifɛl a oc Jesu im Pilat ogŋ a.

Judas e luw owi

Ob Kok 1.18-19

3Judas a eke ↄl Jesu ij a, iri eke wɛl ↄb Jesu low. Ow e low ɛyʼr sos ɛm, ɛtŋ lʼɛwlm os likŋ lele lɛw ab ab a mɛny nʼim nʼↄŋ egb waw ɛsɛl ɛgbɛl a lele agŋ ekpekp ab ab. 4Li dad wɛl ninɛ: «Mʼɛy lↄbr, mʼↄl ɛgŋ ekʼɛknm low a mʼij luw eci!» Kↄ -li dad ow ninɛ: «Na ŋ e low ana, ɛy e low kaka anm ɛm!» 5Ɛtŋ Judas, ↄkm ɛy ɛm a, oc os a im ↄwl Nyamel gbɛl ab ɛm. Ɛtŋ nʼim lʼoc meb lʼɛdŋn ɛmn. 6Egb waw ɛsɛl ɛgbɛl a ot os a ɛtŋ dad ninɛ: «Ɛy ecʼol a ɛdŋn eke wɛl kʼoc os ikŋ na wuwlm Nyamel gbɛl a ecʼos ab ab, aŋke ow el mebl ecʼos.»

7Eke sica nɛny okr ɛl af a, -lʼoc os a -lʼↄl mijel kok ɛs a ecʼↄgm eke -li ki kok etu agŋ ecʼes oc usu. 8Na sosiɛm anake wɛl ɛsŋ ↄgm a “mebl ecʼↄgm” toŋ kʼow it yɛfɛnyna a. 9Ow ↄŋ kokoba ↄb ɛs Jeremi eci sodad amua eke dad a iy nɛny: -Lʼot os likŋ lele lɛw ab a, (an eke Israɛl eyŋ ɛw ana,) #27.9 Adu ecʼan eke bʼil. Ɛ̀kn Matie 26.15 ecʼakr otar a. 10-lʼↄↄl mijel kok ɛs a ecʼↄgm a, ɛsɛ elel eke Ɛs Kↄtↄkↄ dadrʼm ab af. #27.10 Matie oc Zakari e lɛl lele Jeremi e lɛl ab eci sodad a okr af. Zakari 11.12-13; Jeremi 18.2-3; 19.1-2; 32.6-15.

Pilat am ibrm Jesu low

Mark 15.2-5; Luk 23.3-5; Jan 18.33-38

11Jesu anŋ es ɛw ɛs Pilat ecʼany af ɛtŋ ow am ibrmʼn ɛsɛ: «Kↄ ŋ Jwifɛl ecʼɛb ebu ab ana ee?» Jesu dadʼr ninɛ: «Ŋ obi dad.»

12Ɛtŋ ɛmɛny eke egb waw ɛsɛl ɛgbɛl lele agŋ ekpekp ab ab am cicrʼr a, li dadm odad kaka. 13Ɛtŋ Pilat dadʼr ninɛ: «Kↄ ów amua eke -nʼam dad -lʼokʼŋ af a, am iri ee?» 14Kↄ Jesu ↄbm kpu low kaka af #27.14 Ɛ̀kn Esayi 53.7. toŋ es ɛw ɛs a low iti any afŋn es.

Wɛl ↄb Jesu low luw eci

Mark 15.6-15; Luk 23.13-25; Jan 18.39–19.6

15Sakp sakp fɛŋ eke Pak ecʼes gbɛgbl e lɛgŋ bʼow a, es ɛw ɛs a bʼɛlu sobel ɛm ɛs nyam es, in a eke dedeku a bʼerur a. 16Ke lɛgŋ ab ɛm, ɛb any ↄbr ɛs ligbɛl nyam eke wɛl bʼɛsŋ Barabas #27.16 Barabas: Mark 15.7. Matie eci silɛl esig oglog ɛm a, Jesu Barabas. anŋ sobel ɛm. 17Pilat am ibrm dedeku a ekʼas luku a ɛsɛ: «Kↄ bwo ecʼɛgŋ am erurir eke mi kʼɛlu es mʼↄŋ ↄny ee? Barabas kↄ Jesu a eke wɛl bʼɛsŋ Krist ab ee?» 18Tasi ɛm a, lʼuw any sɛnyn sɛnyn eke nyamn ɛyr ɛm wɛl oc Jesu isʼr.

19Eke Pilat sig es jɛj ok usu a, in e yↄw a ↄŋ wɛl isʼr amani na: «Kʼɛ̀y ɛgŋ na eke ɛknm low kaka a e low na ɛm, aŋke tasi ɛm a, ncok na, mɛmn ɛm mʼij gbre nↄnↄ in sosiɛm.» 20Kpɛkŋ egb waw ɛsɛl ɛgbɛl a lele agŋ ekpekp ab ab am itr dedeku a eke kʼibrm Barabas ecʼes ɛlu lele Jesu ecʼibi ab e low. 21Es ɛw ɛs a ɛmɛny ↄdu odad eb ɛtŋ am ibrm ɛl ɛsɛ: «Agŋ yony a, bogŋ eci am erurir eke mi kʼɛlu es mʼↄŋ ↄny ee?» -Li dad ow ninɛ: «Barabas!» 22Pilat ibrm ɛl ninɛ: «Ke sica Jesu a eke wɛl bʼɛsŋ Krist a ecʼa, ayaf mi ki kokrʼr ab ee?» Ɛl fɛŋ -lʼokr lebl af -li dad ninɛ: «Ɛ̀wʼr olikŋ af!» 23Pilat ibrm ɛl ninɛ: «Kↄ bla low ↄbr iy li kok ee?» Kↄ -nʼam ↄg lebl tuↄtuↄ ɛm -lʼɛsɛ: «Ɛ̀wʼr olikŋ af cɛ!» 24Eke sica Pilat ɛkn ekʼow akplm ij, ke ɛmɛny itarir a lele sↄg ab ab am bobn a, lʼoc mij li yↄg sabu dedeku a ecʼany af ɛtŋ li dad ninɛ: «Na ↄny e low ana! Mʼanm ɛgŋ na e luw owi ɛm!» 25Dedeku a fɛŋ ↄdu eb dad ninɛ: «Ke in e luw a e ligbↄw ánŋ ɛy lele ɛy ecʼalaw ab ab e nuŋ af!» 26Pilat ɛlu Barabas es ɛtŋ nʼↄŋ wɛl ↄr Jesu say ɛm gbuŋ ɛtŋ lʼɛlu abusu es eke wɛl kʼoc im ɛw ow olikŋ af.

Srↄda eyŋ a am kokr Jesu miyɛr

Mark 15.16-20; Jan 19.2-3

27 Pilat eci srↄda eyŋ a ↄny Jesu ɛlu lakp lokm a ekʼel Pilat e gbugŋ a, ɛtŋ ɛl a fɛŋ -lʼiwr -li did -lʼɛlul ow ɛm. 28Wɛl ↄny in e mob a otʼr es sos ɛtŋ wɛl susʼr mob af ɛw ebl. 29-Li kok mirŋ ɛm tufɛ, -lʼoc -lʼus ow ɛtŋ -lʼɛlu ow anany in e lidr abu ab ɛm. #27.29 -Li sus ow mob ɛsɛ ɛb ebu af eke -li ki kokr ow miyɛr. Mob af ɛw ebl a ɛw ɛsɛ ɛb ebu e gbad af. Mirŋ ɛm tufɛ a ɛw ɛsɛ eb ebu eci tufɛ af. Anany a ɛw ɛsɛ ɛb ebu eci kpama af. -Lʼok ↄwrↄkp wus ow ecʼany af ɛtŋ -nʼam kokr ow miyɛr -li dad -lʼɛsɛ: «Sʼam ɛsŋnʼŋ o, Jwifɛl ecʼɛb ebu!» 30-Nʼam fafl ow sar any ɛtŋ -lʼoc anany a -nʼam nɛnŋn ow nuŋ. 31Eke -li kokar ow miyɛr sɛnyn sɛnyn bake ow uwr a, -nʼↄny mob af ɛw a -lʼoc ow es, -lʼɛwl -li sus ow ow e mob a ɛtŋ -lʼoc -nʼim ow eke -li kʼɛw ow olikŋ af.

Wɛl ɛw Jesu olikŋ af

Mark 15.21-32; Luk 22.26-43; Jan 19.17-27

32Eke -nʼanŋn baŋn a -nʼam ok ↄkm a, -lʼↄbr Sirɛn iy nyam eke wɛl bʼɛsŋ Simↄ; srↄda eyŋ a ↄnyʼn lɛc ɛm eke li kʼabu Jesu ecʼolikŋ a. #27.32 Ɛ̀kn Matie 5.41 ecʼakr otar a. 33-Nʼim -lʼok usu nyam eke wɛl bʼɛsŋ Gↄlgota ekʼel nyandrɛ ɛm “Nuŋ kpↄk ecʼusu.” 34Yogŋ, -nʼↄŋ Jesu mar eke wɛl wuwlm ob lolo ab eke kʼɛgŋ; #27.34 Selu 69.22. eke li tat anm a, lʼerurm eke li kʼɛgŋ.

35-Lʼɛw ow olikŋ af ɛtŋ -li cɛc ow eci mob sus ɛm a sↄsum oc kok ɛm. #27.35 Selu 22.19. 36Ɛtŋ -lʼok es yogŋ -nʼam ↄsu ow. 37In e nuŋ af a, -ni nↄn lɛl ekʼam yɛgm low a sosiɛm eke wɛl ↄbʼr low a. Ow eke wɛl nↄn a el: “Ɛgŋ na Jesu, Jwifɛl ecʼɛb ebu.” 38In e saw saw a, wɛl ok elu yony olikŋ af; nyam anŋʼn lidr abu af ɛtŋ nyam anŋʼn nɛmn abu af. #27.38 Ɛ̀kn Esayi 53.12.

39Agŋ ekʼam ɛc a am ɛgŋn nuŋ ɛm wɛwrʼr, #27.39 Selu 22.7-8; 109.25. 40ɛtŋ am dadʼr ɛsɛ: «Ŋ ekʼam erur eke kʼufŋ Nyamel gbɛl ab es ke sɛgŋ nyahan kpɛŋ ús ɛjecʼa, #27.40 Ɛ̀kn Matie 26.61; Jan 2.19. eke el Nyam ecʼIy tasi,#27.40 Eke el Nyam ecʼIy tasi: Bɛ̀bmn Matie 4.3-6 ab. èbr ŋ sosi, ànŋ olikŋ af yogŋ us es!» 41Ɛtŋ egb waw ɛsɛl ɛgbɛl a, ol e low yɛgm ɛsɛl a lele agŋ ekpekp ab ab yɛji am kokrʼr miyɛr dad ɛsɛ: 42«Lʼeb agŋ ɛjeci lʼɛlu es, ɛtŋ lʼↄtum eke li kʼebʼr in sosi! Kↄ Israɛl ecʼɛb ebu tasi ee? Sica nʼánŋ olikŋ af yogŋ lʼus es, ke sʼúbʼr nawrɛ. 43Lʼoc in ecʼↄmn a lʼɛlu Nyam ɛm li dad ninɛ: “Mʼel Nyam ecʼIy.” Ɛɛ! Eke Nyam ↄny in ecʼerur tasi, ke lʼéb lʼɛlu ow es gↄŋ!» #27.43 Selu 22.9. 44Ɛtŋ ów eŋuŋ kok ɛsɛl eke wɛl ɛw olikŋ af in ab a yɛji am wɛwrʼr dad ɛbɛn.

Jesu eci luw a

Mark 15.33-41; Luk 23.44-49; Jan 19.28-30

45Sica lɛgŋ uyu nuŋ ɛm a, ncebn ɛy wus a nimum af toŋ ok ncebles eci wanci nyahan ɛm. 46Ekʼow am titm ncebles eci wanci nyahan a, Jesu barm lebl tuↄtuↄ ɛm ninɛ: «Eli, Eli, lema sabaktani?» (ekʼel nyandrɛ ɛm: “Ɛm e Nyam, ɛm e Nyam, kↄ bla ɛtŋ digŋ ɛluʼm es ee?”) #27.46 Selu 22.2. 47Agŋ nyam nyam ekʼanŋ yogŋ a iri odad na ɛtŋ dad ninɛ: «Nʼam ɛsŋ Eli!» #27.47 Eke agŋ a iri Jesu am ɛsŋ “Eli” a (ow e nyandrɛ el “Ɛm e Nyam”), -li tutr eke kokoba ↄb ɛs Eli ecʼodad Jesu am dad. Eke Eli uwm ke lʼigb nʼim afr a (2 Ɛ́b Ebu 2.1-12), Jwifɛl e tutr ɛm a, eke low nɛnyɛmbri nyam ɛs anŋ gbre ɛm, Eli bʼow eb ɛluʼl es. 48Kpɛkŋ ɛl ɛm ecʼɛgŋ nyam uru es im oc mbra usm ɛl eci mar ab ɛm ɛtŋ oc ucur anany ↄkŋ Jesu eke kʼɛgŋ. #27.48 Bɛ̀bmn Selu 69.22 ab. 49Gbɛkↄ agŋ ɛjecʼa am dad ɛsɛ: «Èku yɛ, si bʼow sʼɛkn eke Eli bʼow eb ɛluʼl es!»

50Ɛmɛny Jesu barm lebl ligbɛl nyam ɛtŋ ok sel es. 51Kpɛkŋ, Nyamel ab ɛm eci gbad gbɛl gbada a eke wɛl ɛw ɛdŋn usu lala ab any a, #27.51 Ɛ̀kn Ɔkm Ok 26.31-33. igŋ afr ɛm a ɛtŋ agbr ɛm araŋn didi toŋ ok esr ɛm a. Wus umu, mób gbagbrm ɛm, 52-53suwↄmu fifig. Eke Jesu igb luw ɛm a, ↄmn ɛsɛl nↄnↄ a ekʼuw a igb luw ɛm; -nʼanŋ suwↄmu ab ɛm -lʼok ↄkm. -Lʼok Jerusalɛm, ɛb lala ab ɛm; yogŋ agŋ nↄnↄ ɛkn ɛl.

54Eke srↄda eyŋ a eci anym ɛs a lele srↄda eyŋ ab ab ekʼam ↄsu Jesu a ɛkn wus umu a lele ów a ekʼam ɛy ow ab ab a, erŋn ↄny ɛl afŋn es. -Nʼam dad -lʼɛsɛ: «Njɛ, tasi ɛgŋ na Nyam ecʼIy!» 55Ɔyↄw nↄnↄ ekʼus Jesu jam Galile ɛtŋ eke ki kok in e lís e low a #27.55 Ɔyↄw a: ɛ̀kn Luk 8.2-3. Akpoj ɛm: bɛ̀bmn Selu 38.12. anŋ yogŋ am ɛkn low a akpoj ɛm. 56Ɛl ɛm a, Mari, Magdala baŋn yↄwi a, Mari Jak lele Josɛf ab e lis a, lele Sebede ecʼey a ecʼɛl lis ab yɛji anŋ.

Jesu ecʼes oc owi

Mark 15.42-47; Luk 23.50-56; Jan 19.38-42

57-58Eke lɛgŋ ew es a, Arimate baŋn eci gbreŋgbi nyam, eke wɛl bʼɛsŋ Josɛf, ke in yɛji el Jesu eci jam us ɛs a im ɛŋn Pilat ɛtŋ ibrm ekʼow kʼoc Jesu eci sos megl a ↄŋʼn; #27.58 Jwifɛl ecʼol a ɛdŋn eke sos megl kʼanŋ olikŋ af lɛgŋ ukr. Ow bʼis abu ɛyr ɛb ab ɛm (Ol Ɔkn 21.22-23). Rom ecʼagŋ a gbɛ bʼɛw es olikŋ af ow ugŋ es. Eke wɛl erur eke kʼoc ɛgŋ eke wɛl ibi olikŋ af a es a, ow it eke wɛl kʼibrm Rom ecʼɛgŋ a ekʼɛw wus ogog ab es a abusu. Eke ɛgŋ a ow el ɛb lʼɛlu wus a, abusu ɛ́rum es lɛgŋ kaka. Kↄ Jesu ecʼa gbɛ Pilat ↄŋ abusu. ɛtŋ Pilat ↄŋ abusu. 59Josɛf oc sos megl a wiwrm gbad ufu owr ab 60ɛtŋ lʼoc nʼim lʼoc ow es in obi eci uwↄmu lob owr eke nʼↄŋ wɛl ur ab ɛm. #27.60 Jwifɛl ogŋ a, wɛl bʼot agŋ eŋuŋ a eke bʼuw a es uwↄmu nyam coco ɛm. Li wuwl lob nyam lʼabl uwↄmu a ecʼɛm ɛy usu ab es ɛtŋ nʼim. 61Mari Magdala yↄwi a lele Mari yecʼab ab anŋ yogŋ, -lʼok es -lʼↄbr uwↄmu ab any.

Uwↄmu a ecʼↄsu

62 Nɛnɛgŋ e sos bɛbm e lɛgŋ ɛc; sica lɛgŋ bɛny a, egb waw ɛsɛl ɛgbɛl a lele Farisiɛl ab ab okr af im Pilat ogŋ a 63ɛtŋ dadʼr ninɛ: «Ɛgŋ gbɛl, low nyam ow ɛy nuŋ ɛm: yadŋu na, in ecʼowr anŋ ɛm a, li dad eke, ekʼin uw ba owʼn bi kok sɛgŋ nyahan a, in bʼow in igb luw ɛm. 64Ɛ̀gŋ ↄŋ abusu ke wɛl ↄ́su uwↄmu a toŋ ow kok sɛgŋ nyahan, yecʼɛtŋ ke in e jam ɛsɛl a kʼíym sos megl a bake -li dadmn dedeku a eke lʼigb luw ɛm. Sica eci, yadŋ ikŋ na bʼow agb akm krɛkrɛ ecʼa.» 65Pilat dad ɛl ninɛ: «Ɔnyn usu ↄsu ɛsɛl. Ìmn ke ↄ́ŋn ɛl -lʼↄsu uwↄmu a ɛsɛ elel eke am erurir ab af.» 66-Nʼim -nʼam bɛbm uwↄmu a ecʼelel eke wɛl kʼↄsur a. -Lʼↄkr lob a ekʼanŋ uwↄmu nɛny a wɛl kↄkr saw saw ab es sɛnyn sɛnyn ɛtŋ -lʼok usu ↄsu ɛsɛl.

Currently Selected:

Matie e lɛl 27: adj

Highlight

Copy