Mateo 22

Ɔhene ba ayeforɔhyia

(Luka 14.16-24)

1Na Yesu kasa kyerɛɛ wɔn mmebuo mu bio sɛ: 2#Yoh 3.29 Ɔsoro ahennie te sɛ ɔhene bi a ɔtoo ayeforɔ pono maa ne ba. 3Na ɔsomaa ne nkoa sɛ wɔnkɔfrɛ wɔn a wɔato nsa afrɛ wɔn sɛ wɔmmra ayeforɔ no ase no, nanso wɔampɛ sɛ wɔba. 4#Mat 21.36 Bio ɔsomaa nkoa foforɔ sɛ: Monkɔka nkyerɛ wɔn a wɔahyia wɔn no sɛ: Hwɛ, masiesie m’aduane, wɔakum m’anantwie ne me nyɛmmoa, na wɔawie nnoɔma nyinaa; mommra ayeforɔ no ase! 5Na wɔn deɛ, wɔamfa anyɛ hwee, na wɔkokɔe. Obi kɔɔ n’afuo mu, na obi nso kɔdii ne dwa. 6Na wɔn a aka no kyekyeree ne nkoa no bɔɔ wɔn adapaa kunkumm wɔn. 7#Mat 24.2 Na ɔhene no teeɛ no, ne bo fuiɛ, na ɔsomaa ne dɔm maa wɔkɔkunkumm awudifoɔ no, na wɔhyee wɔn kuro. 8Ɛnna ɔsee ne nkoa no sɛ: Wɔasiesie ayeforɔhyia no deɛ, nanso wɔn a wɔhyiaa wɔn no, ansɛ wɔn. 9#Mat 13.47; 21.43 Enti monkɔ atempɔn nkwanta so, na dodoɔ a mobɛhu wɔn no, momfrɛ wɔn mmra ayeforɔ no ase. 10Na nkoa no firii adi kɔɔ akwan so, kɔboaboaa dodoɔ a wɔhunuu wɔn no ano, nnipa bɔne ne nnipa pa; na ahɔhoɔ bɛhyɛɛ ayeforɔhyia dan no ma.

11 Na ɔhene no baa mu bɛhwɛɛ ahɔhoɔ no, ɔbɛhunuu onipa bi a ɔnhyɛ ayeforɔhyia atadeɛ wɔ hɔ. 12Na ɔbisaa no sɛ: Awɛ, wobaa mu ha sɛn ni, na wonhyɛ ayeforɔhyia atadeɛ yi? Na ɔtɔree mum. 13#Mat 8.12 Ɛnna ɔhene no see asomfoɔ no sɛ: Monkyekyere ne nan ne ne nsa mfa no, nkɔto no ntwene akyirikyiri sum no mu; ɛhɔ na osu ne setwerɛ wɔ. 14Na wɔn a wɔafrɛ wɔn no dɔɔso, nanso wɔn a wɔyi wɔn no deɛ, wɔyɛ kakraa bi.

Ɛtoɔ ho asɛmmisa

(Marko 12.13-17; Luka 20.20-26)

15Ɛno na Farisifoɔ no kɔ kɔtuu agyina sɛdeɛ wɔbɛsum no fidie wɔ kasa mu. 16#Mar 3.6 Na wɔsomaa wɔn asuafoɔ kaa Herodefoɔ no ho baa ne nkyɛn sɛ: Kyerɛkyerɛfoɔ, yɛnim sɛ woyɛ ɔnokwafoɔ, na wokyerɛ Nyankopɔn kwan nokorɛ mu, nanso obiara asɛm mfa wo ho; na wonhwɛ nnipa anim. 17Enti kyerɛ yɛn deɛ wodwene. Ɛwɔ ho kwan sɛ wɔyi toɔ ma Kaesare anaasɛ wɔnnyi? 18Na Yesu hunuu wɔn amumuyɛ no, ɔkaa sɛ: Mo nyaatwomfoɔ, adɛn na moresɔ me ahwɛ? 19Momfa ɛtoɔ sika no bi mmɛkyerɛ me! Na wɔde denare brɛɛ no. 20Na ɔbisaa wɔn sɛ: Hwan mfonini ne n’atwerɛ nie? 21#Rom 13.7 Wɔse: Kaesare dea. Ɛnna ɔsee wɔn sɛ: Ɛnneɛ momfa Kaesare deɛ mma Kaesare ne Nyankopɔn deɛ mma Onyankopɔn! 22Na wɔteeɛ no, ɛyɛɛ wɔn nwanwa; na wɔgyaa no hɔ kɔeɛ.

Owusɔreɛ ho asɛmmisa

(Marko 12.18-27; Luka 20.27-40)

23 # Aso 23.6; 23.8 Da no ara na Sadukifoɔ a wɔka sɛ owusɔreɛ nni hɔ no baa ne nkyɛn bɛbisaa no 24#Deut 25.5-6 sɛ: Kyerɛkyerɛfoɔ, Mose kaa sɛ: Sɛ obi wu na ɔnni mma a, ne nua nware ne yere no na ɔnwo mma mma ne nua no. 25Na anuanom baason bi tenaa yɛn nkyɛn ha. Deɛ ɔdi kan no waree, na ɔwui; wannya mma, na ɔgyaa ne yere maa ne nua. 26Saa ara nso na deɛ ɔtɔ so mmienu ne mmiɛnsa no yɛeɛ de kɔduruu nson no soɔ. 27Na wɔn nyinaa akyiri no, ɔbaa no nso wui. 28Enti owusɔreɛ mu no, nnipa nson no mu hwan na ɔbɛyɛ ne yerɛ? Ɛfiri sɛ wɔn nyinaa aware no. 29Na Yesu bua see wɔn sɛ: Mofom, na monnim twerɛ nsɛm ne Nyankopɔn tumi. 30Owusɔreɛ mu no, wɔnware na wɔmma awadeɛ na wɔte sɛ abɔfoɔ wɔ soro. 31Na ɛfa awufoɔ sɔreɛ ho deɛ, monkenkann deɛ Onyankopɔn kaeɛ no pɛn 32#Eks 3.6 sɛ: Mene Abraham Nyankopɔn ne Isak Nyankopɔn ne Yakob Nyankopɔn? Onyankopɔn nyɛ awufoɔ Nyankopɔn na mmom ateasefoɔ Nyankopɔn. 33Na nkurɔfoɔ akuakuo no teeɛ no, ne nkyerɛkyerɛ no yɛɛ wɔn ahodwiri.

Ɔdɔ ne mmara a ɛdi kan

(Marko 12.28-31; Luka 10.25-28)

34Na Farisifoɔ no tee sɛ wamua Sadukifoɔ no ano no, wɔkɔhyiaa faako. 35Na wɔn mu baako a ɔyɛ mmaranimfoɔ bisaa no de sɔɔ no hwɛɛ sɛ: 36Kyerɛkyerɛfoɔ, mmara no mu kɛseɛ ne deɛ ɛwɔ he? 37#Deut 6.5 Na ɔsee no sɛ: Dɔ Awurade wo Nyankopɔn w’akoma nyinaa mu ne wo kra nyinaa mu ne w’adwene nyinaa mu! 38Yei ne mmara no mu kɛseɛ ne deɛ ɛdi kan. 39#Lew 19.18 Na deɛ ɛtɔ so mmienu te sɛ ɛno: Dɔ wo yɔnko sɛ wo ho! 40#Mat 7.12; Rom 13.10; Gal 5.14 Mmara nsɛm mmienu yi so na mmara ne adiyifoɔ no nyinaa gyina.

Dawid ba ho asɛmmisa

(Marko 12.35-37; Luka 20.41-44)

41Na Farisifoɔ no hyiaeɛ no, Yesu bisaa wɔn 42sɛ: Modwene Kristo no ho sɛn? Hwan ba ne no? Wɔsee no sɛ: Dawid. 43Ɔbisaa wɔn sɛ: Na afei adɛn na Dawid nam honhom mu frɛ no owura ka sɛ:

44 # Dwom 110.1; Mat 26.64 Awurade see me wura sɛ:

Tena me nifa

kɔsi sɛ mede w’atamfoɔ bɛgu wo nan ase?

45 Sɛ Dawid frɛ no owura a, na ɛyɛɛ dɛn na ɔyɛ ne ba? 46Na obiara antumi ammua no asɛm biara, nanso ɛfiri da no, obiara antumi ammisa no asɛm biara bio.

Currently Selected:

Mateo 22: ASWDC

Highlight

Copy