Lewitikɔs 9

Asɔfoɔ no hyɛ wɔn adwuma ase

1 # Lew 8.33 Na da a ɛtɔ so nwɔtwe no Mose frɛɛ Aaron ne ne mma no ne Israel mpanimfoɔ, 2na ɔka kyerɛɛ Aaron sɛ: Fa nantwie ba a wode bɛyɛ bɔne ho afɔdeɛ ne odwennini a wode bɛyɛ ɔhyeɛ afɔdeɛ, wɔnni mu, na fa bra AWURADE anim. 3Na Israelfoɔ no nso, kasa kyerɛ wɔn sɛ: Momfa ɔpapo mmɛyɛ bɔne ho afɔdeɛ ne nantwie ba ne odwanten ba a wɔadi afe afe a wɔdi mu mmɛyɛ ɔhyeɛ afɔdeɛ, 4ne nantwinini ne odwennini mmɛyɛ asomdwoeɛ afɔdeɛ, na wɔmfa mmɔ afɔdeɛ AWURADE anim ne aduane afɔdeɛ a wɔagu so ngo, ɛfiri sɛ ɛnnɛ na AWURADE bɛyi ne ho akyerɛ mo. 5Na wɔde deɛ Mose hyɛeɛ no baa ahyiaeɛ ntomadan no anim, na asafo no nyinaa twe bae bɛgyinaa AWURADE anim. 6Na Mose kaa sɛ: Yei ne asɛm a AWURADE hyɛeɛ no, monyɛ, na AWURADE animuonyam nyi ne ho nkyerɛ mo. 7#Lew 16.6; 11.15; Heb 5.3; 7.27 Na Mose ka kyerɛɛ Aaron sɛ: Twe pini afɔrebukyia no ho, na bɔ wo hyeɛ afɔdeɛ ne wo bɔne ho afɔdeɛ, na pata ma wo ho ne ɔman no; na fa ɔman no ayɛyɛdeɛ bra, na pata ma wɔn, sɛdeɛ AWURADE hyɛeɛ no.

8Na Aaron twe pinii afɔrebukyia no ho, na ɔkum ne bɔne ho afɔdeɛ nantwie ba no. 9Na ne mma no de mogya no kɔmaa no, na ɔde ne nsateaa bɔɔ mogya no mu de kekaa afɔrebukyia no mmɛn ho, na ɔhwiee mogya no petee afɔrebukyia no ase. 10#Lew 4.8-12 Na bɔne ho afɔdeɛ no mu sradeɛ ne sawa ne mmerɛboɔ so ntentan no, ɔtoo mu gya, afɔrebukyia no so, sɛdeɛ AWURADE hyɛɛ Mose no. 11Na ɛnam no ne nwoma no deɛ, ɔde ogya hyee no nsraban no akyi.

12 # Lew 1.10-13 Na ɔkumm ɔhyeɛ aboa afɔdeɛ no nso, na Aaron mma no de mogya no brɛɛ no, na ɔhwie petee afɔrebukyia no so hyiae. 13Na wɔde ɔhyeɛ afɔdeɛ no asinasini ne ne tiri no brɛɛ no, na ɔhyee no afɔrebukyia no so. 14Na ɔhohoroo ayamdeɛ ne nnyawa no ho, na ɔhyee no ɔhyeɛ afɔdeɛ a ɛwɔ afɔrebukyia no soɔ no so.

15Ɛnna ɔde ɔman no afɔdeɛ no baeɛ, na ɔfaa bɔne ho afɔdeɛ papo a ɔyɛ ɔman no deɛ no kumm no de bɔɔ bɔne ho afɔdeɛ sɛ kane deɛ no. 16Na ɔde ɔhyeɛ afɔdeɛ no bae, na ɔbɛyɛɛ no sɛdeɛ ne yɛbea teɛ no. 17Na ɔde aduane afɔdeɛ no bae, na ɔfaa emu nsa ma hyee no afɔrebukyia no so kaa anɔpa ɔhyeɛ afɔdeɛ no ho. 18Ɛnna ɔkumm nantwinini ne odwennini a ɛyɛ ɔman no asomdwoeɛ afɔdeɛ no, na Aaron mma no de mogya no brɛɛ no, na ɔhwie petee afɔrebukyia no so hyiae. 19Na nantwinini ne odwennini no sradeɛ no, sradedua no ne deɛ ɛkata sawa ho no ne mmerɛboɔ so ntentan no, 20wɔde sradeɛ no nyinaa guu ɔyan no so, na wɔhyee sradeɛ no afɔrebukyia no so. 21#Lew 7.30-34 Na ɔyan no ne srɛ nifa no, Aaron him de yɛɛ ohim afɔdeɛ, AWURADE anim, sɛdeɛ Mose hyɛeɛ no. 22#Num 6.22-27 Ɛnna Aaron maa ne nsa so kyerɛɛ ɔman no, na ɔhyiraa wɔn. Na ɔbɔɔ bɔne ho afɔdeɛ, ne ɔhyeɛ afɔdeɛ ne asomdwoeɛ afɔdeɛ wieeɛ no, ɔsianee.

23 # Eks 40.34 Na Mose ne Aaron hyɛnee ahyiaeɛ ntomadan no mu; na wɔfirii adie no, wɔhyiraa ɔman no. Ɛnna AWURADE animuonyam yii ne ho kyerɛɛ ɔman no nyinaa.

24 # 2 Be 7.1 Na ogya firii AWURADE anim bɛhyee afɔrebukyia no so ɔhyeɛ afɔdeɛ ne sradeɛ no. Na ɔman no nyinaa hunui, na wɔde anigyeɛ huroe, na wɔde wɔn anim butubutuu fam.

Currently Selected:

Lewitikɔs 9: ASWDC

Highlight

Copy