Mag 5

Yisa kaah nan nyan Nnaanbiim uja uba ni man

(Matiu 8:28-34; Lug 8:26-39)

1Yisa nin u bɔɔnɔɔb nan lɔŋ Galilii a mɔgil n-yaa dool, Gereza yaab a tiŋin. 2Yisa kaah nan nyan kuŋaluŋin n-yonn man nin, libol nmɔn le uja uba nan nyan tikarin ki kenn u. Kinaanbiig le nan be uja nmɔn ni, 3le u dɔɔ tikarin. Uba kaa nan be ki li fir ki baan u libaali, kaa ji li fir lol u tikulori. 4Ni ye bi baan u nɔɔi nin u taai ke, see ke u gen kubaandaagin, ki sin chii tikulor tan be u nɔɔi yin ni. U nan jɔɔ npɔɔn pam, ke uba kaa li fir gɔɔ wi. 5Kunyiɛg nin nween biɛn ke u be tikar a gungonlin a paab le ki choon jin ki ŋmag itangbag ki jiil u ba.

6U la nan be nan fɔg le ki kan Yisa, le ki guun ki nan gbaan Yisa a nintogil, 7le ki yigin nkukɔpɔɔn ki ke, “Yisa Uwonbɔr wan be paab nan a Bija, min nin fin babu? Poo Uwonbɔr bu ke, ŋaa li mugirimi!” 8Yisa pii chinn ki fuun kinaanbiig nbu le ke, “Fin kinaanbiig nan, nyau ki sin jiɛn uja-n na.”

9Le Yisa baan u ke, “A yinl laa?” Le u jiin Yisa ke, “N yinl ye Bitɔtob, nan bu-n ti yaba.” 10Le uja-n nan balin Yisa ke u laa nyan bi kitiŋ nmɔn yaan ni.

11Kidoogbaluŋ mu nan si ligungonl n-yaa paab ki ji. 12Le nnaanbiim nan balin Yisa ke, “Jaa ti wee ti tan kɔɔ idool nan yaan.” 13Le Yisa nan jaa bi nsan, le bi nan nyan uja nmɔn ni, ki tan kɔɔ idoolin. Le idoolin biɛn nan guun burburbur ki jiir limɔgilin, le nnyum jin bi. Idoolin a kanl nan foo turilee paama.

14Le ban nan guu idool nmɔn nan fii ki guun jon ntimin nin tikpaann nin ki tan mɔɔn tibɔr nmɔn. Le bininfob nan dan ke bin nan kan niwann nan biɛn tun nmɔn. 15Baah nan nan foon Yisa ban ki kan uja wan wee nnaanbiim nan be u ni nan pɔɔg ki ka niin yaan, u potiɛl biɛn nan ŋan, le u nin yee tiwann yɔɔr, le bijawaam choo bi. 16Le ban nan be niin ki kan nin, ni nan pag ki wɔɔn bi tab Yisa kaah ŋa man, nin waah ŋa idoolin mu man. 17Le bininfobin ni nan balin Yisa ke, un nya bi tiŋin na.

18Yisa kaah nan ŋa sili ke un kɔɔ kuŋaluŋin n-yonn man nin, le uja wan wee Yisa nan nyan nnaanbiim u niin ke, “N baliŋ le, che min nin fin n nɔɔ ki jo.” 19Amaa Yisa kaa nan chee, le ki bei u ke, “Li jir kun a ninfob ban ki tan bei bi Uwonbɔr kaah saŋ kunyunyunbaag wee ki tun litoonl gbingbemil ki seiŋ man.” 20Le uja nmɔn ni nan labir ki nɔɔ kitiŋ kan wee bi yi ki ke ntim piig nan yaan ki mɔɔn nan biɛn wee Yisa tun ki sei u, le ni nan gar bininfob n biɛn.

Yisa kaah nan teb upii ki sin ji fiin kibisiɛg nkumin man

(Matiu 9:18-26; Lug 8:40-56)

21Ni bɔɔn bu le Yisa ji nan jir don limɔgilin a dool lan gurin. Waah nan tan foo limɔgilin a dool, le kuninfogbaluŋ nan lagin ki gɔɔn u. 22Le uja uba dan nin yaan, le u yinl ye Jairu; u nan ye kuwonjiɛndiig a ninkpelu le. Uja-n kaah nan kan Yisa n-yonn man nin, le ki gbaan u nintogil. 23Le ki balin u nin u sufu biɛn ke, “N bisa le bu ki yin kpo. Ŋaa li dan ki nan ta a nɔɔ ki paan u bu wee un kan kutebug ki foo?” 24Le u ma nin Yisa ni nan nɔɔ ki jon u niin.

Le kuninfogbaluŋin mu ji nan nɔɔ ki mug ki tir Yisa. 25Le upii wan nan kan tipiir ibin piig nin ilee wee taa diɛr nan, mu nan be nin yaan. 26U nan chonn binyɔgdam ban takpem ke un teb uba, ki nan diɛ u faal, ke iwiɛn le mann kpiɛg. 27Le u nan gbir Yisa bu; le ki dan kuninfogbaluŋin yaan, ki nɔɔ Yisa a bɔɔn, le ki sin tiɛr u sufu ni ke, 28“N le bi maa u daala nan a binba ke gbaa, n bi li kan kutebug,” 29le ki sin tan maa u daala. Libol nmɔn, le u pɔɔg, ki biɛ u gbanann nin ke iwiɛn nmɔn diɛu. 30Iyaayoo le Yisa biɛ u sufu ni ke npɔɔn nyan u ban na. Le u baan bininfob n ke, “Ŋma maa n daalaa?”

31Le u bɔɔnɔɔb n mu baan ke, “Fin kan bininfob nan mug nan, le a baan ke ŋma maa ŋaa?”

32Le u ji mann lig ke un kan uninfo wan maa u. 33Upii-n kaah nan biɛ ke niba tun u gbanann nin bu, le bijawaam nan choo u, le u gbanann jegil le u dan ki nan gbaan Yisa a nintogil, ki bei u ibamɔn biɛn. 34Le Yisa bei u ke, “N ninsa, ŋaah ŋa min yada-n bu le a pɔɔg. Li chaa nin nposɔɔn na. A wiɛn biɛn diɛu.”

35Yisa kaah nan be pag man nmɔn le bininfob biba nyan Jairu wan ye kuwonjiɛndiig a ninkpelu n-yaa niin ki dan u ban ki nan bei u ke “A bisa-n pii kpou. Ke ba ŋa wee a ji mugir wan wɔɔnn man naa?”

36Le u mu ŋa ke waa gbiri, le ki bei Jairu wan ye kuwonjiɛndiig a ninkpelu nmɔn ke, “Laa san bijawaami. Ŋaa yadau.” 37Mambu le Yisa kaa nan ban uba n nɔɔ u ki jo iniin nmɔn yaan ni, see Piita nin Jemisi nin u waal Jɔnn. 38Baah nan tan foo kuwonjiɛndiig a ninkpelu a niin n-yonn man nin, le Yisa gbir kufuug nin tikpemɔr. 39Le u kɔɔ ki baan bi ke “Ba a fur ye naa? Ba ŋa ni fabin naa? Kibig nan kaa kpo, u jiɛn le.”

40Baah gbir u bɔr nmɔn le bi laa u. Le u ŋɔɔr bi ki nyan, le ki ta kibigin a na nin ki baa ki kpiɛ u bɔɔnɔɔb bita-n bu, le bi kɔɔ kudiig kan yaan wee kibigin dɔ-n. 41Baah kɔɔ n-yonn man nin, le u choo kibigin a nɔɔ le ki bei ke “Talita kum!” (Juu yaab a leen yin li taai li ye “Kibisiɛbig, n bei fin le, fiim!”) 42Libol nmɔn le kibisiɛg n nan fii ki sir ki choon gɔnn. Le ni gar bi takpem. U nan ye ibin piig ni ilee a big le. 43Le Yisa kpaan bi ke bi li nyi bin bei uba, le ki ji bei bi ke bin sei kibigin tijiir wee un ji.

Currently Selected:

Mag 5: KUGL

Highlight

Copy