Matiu 6
6
Yisa kaah pag taah li pu ipiin nin tibuchinn man
1“Ni choom niba ki laa ŋaan tibuchinn bininfob bu, ni ŋa man wee bin kan ki pag ni. Ni tun man ke naa yin kan niba a yɔr ni Baa wan be paab ban ni.
2“Ni ye a yin pu bilanjiim ipiin ke, a laa mɔɔn ke bilinlarib kaah ŋaan man tiwonjiɛndirin, nin isanjal bu ke bininfob n kan bi toon ŋan wee ki pag bin ni. Ibamɔn le n bei ni nan, bi pii ga bi yɔra. 3Amaa ni ye a pu ulanjiin ke, laa che a nɔɔgam li nyi a nɔɔjiim kaah tun nan ni. 4Le a piin nmɔn li ye liwoolin. Wee a Baa wan ga nan ŋaan liwoolin nan, na li yɔŋ.
Nwɔɔnim ki ta jiin Liwonmiɛl paam
(Lug 11:2-4)
5“Ni ye a miɛ Uwonbɔr ke, a laa miɛ ke bilinlarib kaah tun man nin ni, nan bu-n bi ban bi li si tiwonjiɛndirin le, nin kitiŋ poolin a sanjali bu, ke bininfobin kan bi. N bei ni ibamɔn le, bi ma gaa bi yɔr ki gbeeu. 6Amaa ni ye a miɛ Uwonbɔr ke, a kɔɔm a diigin ki loon linaanganl, wee ki miɛ a Baa Uwonbɔr wan gbir tibɔr woon kaarin, wee un yɔŋ.
7“Le ni ye a miɛ Uwonbɔr ke, a laa jabin ke ban kaa jɔɔ Nween ni kaah ŋaan man ni ni, bi tiɛr ke bi miɛm takpem nmɔn le yin che Uwonbɔr ngbir. 8Ni laa be ke baah be man nmɔn ni, nan bu-n ni Baa Uwonbɔr pii nyi nan wee ni ban, ke naa la miɛ wi.
9“Naah li miɛ Uwonbɔr man sɔ:
‘Ti Baa wan be paab,
che a yinl li be kasi,
10che a naamin foon,
che a bam nŋa
dulinya nan yaan, ke naah ŋaan paab man ni.
11Sei ti dinan a jiir.
12Jiɛn ti bir ki per ta.
Ke ti mu kaah jiɛn per ti pɔndam man ni.
13Ki laa liin ti ki kɔɔn libiginlin ni,
amaa wee ki nyan ti titoonbirdaan a nɔɔn.’
14Nan bu-n ni ye ni jiɛn ni tab a bir ki per bi ke, ni Baa Uwonbɔr wan be paab nan mu li jiɛn per ni. 15Amaa naa jiɛn per ni tab bi bir ke, ni Baa Uwonbɔr mu kaa yin jiɛn ni bir ki per ni.
Nwɔɔnim ki jiin Limɔlol paam
16“Ni ye ni lol imɔɔŋ ke, ni laa bii ni num paam ke bilinlarib kaah ŋaan man nin ni, nan bu-n bi ti bii bi num paam le, ke bininfob biɛn n kan ki biɛ ke bi lol bi mɔɔŋi le. N bei ni ibamɔn le, bi pii gaa bi yɔra.” 17Amaa ni ye a lol bimɔb ke, a ŋunn a num paama ki ta nkpam ki ŋa a yul; 18wee ni laa che bininfobin biɛ ke a lol bimɔbi, amaa a Baa wan wee baa ga win a binba, nin a Baa wan ga liwoolin ni, le li yɔŋ.
Uwonbɔr a niin a jɔɔm
(Lug 12:33-34)
19“Laa jɔɔ a jɔɔm ki woog dulinya nan yaan ni, nan yaan wee ikootug nin gamlali nin ndundum li mɔɔ ki bii mi; bee binaayigib na li kɔɔ ki su. 20Amaa ta a jɔɔm ki woon paab, nan yaan wee ikootug nin gamlali kaa li fir bii, bee binaayigib kaa li fir kɔɔ su. 21Nan bu-n, nan yaan wee a jɔɔm be-n a potiɛl mu be niin le.
Tigbanann a Wonweem a bɔr
(Lug 11:34-36)
22“Linunbil le ye tigbanann a fila. Ni ye a numbili ŋan ke, a gbanann biɛn yin ye nwonween le. 23Amaa ni ye a numbil kaa ŋan ke, a gbanann biɛn yin be libunbɔnlin le. Mambu ni ye nwonween man be a ni-n nan bɔŋ ke, ni yin ye libunbɔnl takpenl le!
Uwonbɔr nin Njɔɔm
(Lug 16:13; 12:22-31)
24“Uba kaa li fir ki tun ki tenn biyudam bilee. U yin nan uba le ki sin jiɛ uba; bee u baga yin be uba ni le kaa sin gar uba paami. Naa li fir jiɛn Uwonbɔr nin iligi.
25“Mambu n bei ni le, ni laa che ni mugir ni limiɛfol bu, nin naah li ji nan bee naah li nyu nan bu; bee ni gbanann ni, naah li yee nan bu. Limiɛfol kaa ŋan jon tijiiraa, le tigbanann kaa ŋan jon tiwann yeewann naa? 26Lig nnɔɔm man laan paab nan; baa bu; bi mu kaa ji chiɛ ki ŋaan tinaapɔrin ni, amaa le ni Baa wan be paab nan jin bi. Naa jɔɔ tinyɔɔr ki jon nnɔɔm maa? 27Ni ŋma a binbem mug u wee u li fir fɔbig u miɛfolaa?
28“Babu wee ni mugir ni ba tiwann yeekaar buu? Lig tikpentunn tan be nkpenn nan a puum, taa tun ni, ki mu kaa loo tiwann yeekaar ki tenn tiba. 29Amaa n bei ni le ke, ubɔr Solomɔnn kaah le nan jɔɔ u wan yɔɔ ŋan tan biɛn ni, waa nan nyi ki yee u wan yeeg wee ki ŋan ke tikpentunn a puumi. 30Ke ni ye Uwonbɔr li ŋaŋir tikpentunn tan be dinan, wee bin won nyɔɔ ti nŋmi nan, le kaa li fir yeen nim maa? Nim ban a yada par nan!
31“Mambu, ni laa che ni mugir ni wee ni tiɛr ke, ‘N yin ji baa,’ bee ‘N yin nyu baa,’ bee ‘N yin yee baa ni?’ 32Ban kaa ye Juu yaab n ti mugir bi potiɛl ni niɛ nan biɛn bu le; amaa ni Baa Uwonbɔr wan be paab nan pii nyi ke ni ban ni niɛ biɛn. 33Amaa ni chinn ban U naamin nin U buchinn binbemin na, le u li ta ni niɛ biɛn ki sei ni. 34Mambu, ni laa che ke won a bɔr mugir ni, lidaal biɛn jɔɔ libɔmug kaar lan kpaan li le.
Currently Selected:
Matiu 6: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
