Matiu 4
4
Yisa a biginim
(Mag 1:12-13; Lug 4:1-13)
1Le Kinaaŋ che Yisa don kukunkɔɔg bu ke ulinlaril ntan bigin u. 2Waah nan lol bimɔb iweehn pina nin tinyiɛr pina-n a bɔɔn bu, le nkom nan choo u. 3Le ulinlaril dan u ban ki nan bei u ke, “Ni ye ke a sin ye Uwonbɔr a Bija ke, a bei itangbag nan wee i kpann tijiir.”
4Le Yisa jiin ke, “Ni sɔb ke: ‘Uninfosaal kaa be tijiir a binba bu, amaa imɔleen yan biɛn nyann Uwonbɔr a mɔnn ni.’#Ikaal 8:3”
5Le ulinlaril ta u ki jon Jerusalam, kan a yinl ji ye kasi a tiŋin, le ki ta u don iwonjiɛn niin a mɔɔ pin yul#4:5 Iwonjiɛn niin a paab nan, nan jɔɔ nan yaan wee kumanug a yudaau nan ti tɔɔg ki pee kunaatuŋ ki mɔɔn likpakɔɔl daal a piinim nin li diɛm. bu. 6Le ki bei u ke “Ni ye a sin ye Uwonbɔr a Bija ke, a yug ki lu tuma. Nan bu-n ni sɔb Uwonbɔr a gbɔŋin ke:
‘U li che u malakam nguuriŋ,
wee ki keŋ nin bi nɔɔi,
le a taal kaa li gbiɛr litangbagili.’#Ilan 91:11-12”
7Le Yisa jiin u ke, “Ni ji sɔb Uwonbɔr a gbɔŋin ke: ‘Laa mag Uyudaan a Wonbɔr wi.’#Ikaal 6:16”
8Le ulinlaril ji ta u ki don lijɔɔl lan kper a paab, ki wɔɔn u kutingbɔŋ nan a yagi nin i ŋam biɛn. 9Le ki ke, “A bi li gbaan ki jiɛm ke, n bi li ta ni biɛn ki seiŋ.”
10Le Yisa bei u ke, “Fɔr n ban na, Sintani! Nan bu-n ni sɔb Uwonbɔr a gbɔŋin ke: ‘Li jiɛn Uyudaan wan ye a Wonbɔr win, ki li tun tenn u binba.’#Ikaal 6:13”
11Le ulinlaril fɔr ki sin jiɛn u, le malakam dan ki nan ter u.
Yisa kaah piin u toon Galilii man
(Mag 1:14-15; Lug 4:14-15)
12Yisa kaah nan nan gbir ke bi loon Jɔnn kuloondiigin ni, le u nan jir Galilii. 13U nan nyan Nazarif le, ki tan be Kapeniɛm kan be Zebulun nin Nafitali a mɔgil a gbaamin. 14Ni niɛ nan nan tun ki gbeen ulinlenn Azaya kaah nan pag nan ke:
15“Zebulun a tiŋin nin Nafitali a tiŋin,
man be limɔgil a sam bu-n, ki yeg Jɔdann ni,
ban kaa ye Juu yaab a Galilii;
16bininfob ban be libunbɔnlin nan
ni kan nwonween takpen na;
le ban ka nkum a jinjiimin a tingbɔŋin ni
kan nween nin kaah won ki pii ba.”#Azaya 9:1-2
17Iyaayoo nmɔn le Yisa piin ki mɔɔn ke, “Ni jiɛn ni toonbirin na ke paab a naamin malin na.”
Yisa kaah yin bijanchoob bina man
(Mag 1:16-20; Lug 5:1-11)
18Yisa kaah nan chonn Galilii a mɔgil a gbaamin, le u nan kan nnabum milee, bi ma nan ye Simɔnn wan wee bi nan yi u ke Piita, nin u waal Anduru. Bi nan ye bijanchoob le ki be jaar kujanlaaŋ limɔgilin. 19Le Yisa bei bi ke, “Ni dan, ki na li nɔɔm ni, wee n che ni li chor bininfob ke naah chor ijan man ni.” 20Le bi nan jiɛn bi janlann weem ki nɔɔ u.
21Waah nan nyan niin ki chaa-n, le u kan Zebedi a naachim bilee, Jemisi nin u waal Jɔnn. Bi ma nin bi baa li nan be kuŋaluŋin ki mann bi janlann. Le Yisa yin bi, 22libol nmɔn, le bi jiɛn bi ŋaluŋ nmɔn weem, le ki nɔɔ u.
Yisa kaah wɔɔn ki mɔɔn ki sin teb bibaarib man
23Yisa nan chonn jin Galilii a tim biɛn ni le, ki wɔɔn tiwonjiɛndirin, ki mɔɔn Uwonbɔr a naam a bɔŋann ni, ki che ban bu iwiɛn a booli biɛn kan kutebug. 24Le u yinl nan mɔɔn Siriya a tiŋin. Le bi nan ŋmagin bibaarib a booli biɛn, ki dan u ban: Tigbanann wiɛn, ban gbee nin nnaanbiim, ban nan lur likpikpiil, nin tigbanann kpiindam, le u teb bi biɛn. 25Le kuninfogbaluŋ nan nyan Galilii, nin Ntim Piigin nin Jerusalam nin Judiya, nin Jɔdann a kpenn dool yaab biɛn nan nɔɔ u.
Currently Selected:
Matiu 4: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.