Matiu 11

Itoon yan nan nyan Jɔnn Wan nan Fu Bininfob Uwonbɔr a Nyunfulin ban

(Lug 7:18-35)

1Yisa kaah nan wɔɔn u bɔɔnɔɔb piig nin bilee-n ki diɛ n-yonn man ni, le u nyan niin ki jon Galilii a timin un tan wɔɔn bininfob ki sin mɔɔn Uwonbɔr a bɔr.

2Jɔnn kaah nan be kuloondiigin, ki nan gbir Yisa Masiya a toon a bɔrin, le u nan tun u bɔɔnɔɔb Yisa ban, 3ke bin tan baan u ke, “Fin le ye wan yin dan ni bee, ti li guu u baa?”

4Le Yisa jiin ke, “Ni li jir ki tan wɔɔn u naah gbir man, ki kan man, 5ke ni kan bijɔɔm ligir, le nwɔbim a taai tann le bi choon, le nkɔm a gbanann ŋaŋ, le bitukpaab gbir, le bitakpiib fii nkumin, le tibɔŋann nin nan mɔɔn ki sei bilanjiim. 6Tikaar be wan kan limugil wee kaa ta n bɔr gab nan bu.”

7Tɔ, Jɔnn a bɔɔnɔɔbin kaah nan nyan nin yaan ki jir kun n-yonn man nin, le Yisa nan piin ki pag tenn kuninfogbaluŋin Jɔnn bu: “Naah nan jon Jɔnn ban lisagilin ni, ni nan tiɛr ke ni tan yin kan baa? Igbingbaan yan wee ntafaam daarin naa? 8Naa ye man ke, ni nan nyan jon ke ni tan kan baa? Uninfo wan yee tiwann yɔŋann bee? Aai, ban yee nnaam a wan yɔɔrin be ibɔrniin le. 9Ke ni lee nan jon ke ni tan kan baa? Ulinlenn naa? N bei ni le, u jon ulinlenn na. 10U yaa bɔr le Uwonbɔr a gbɔŋ pii nan sɔb ki wɔɔn ke,

‘N li tun n toom un liir a nintogil,

ki tan mann a dam a sam.’#Malaki 3:1

11N bei ni ibamɔn le: Baa laa nyi ma uba wee u daan jon Jɔnn Wan nan Fu Bininfob Uwonbɔr a Nyunfulin ni, amaa hali wan nan joor paab a naamin ni jon Jɔnn na. 12Naah nyan Jɔnn Wan nan Fu Bininfob Uwonbɔr a Nyunfulin a yonn ki nan kpaa daandaan nan, paab a naamin yabirig le nin ikɔn, le ban kɔnn nnaam nmɔn choo mi ki ŋmag. 13Nan bu-n Bilinlemin biɛn nin Nsiimin pii nan pag ilinlen leen na, le Jɔnn nin dan. 14Ni ye ni ban ni che tibɔr nmɔn ke, u ma ye Elaja wan nan yin dan ni. 15Wan jɔɔ itul ke, ni che un gbir.

16“Nim daandaan nan a ninfob, n yin ta ni ki bigin baa? Ni nann nbuwaab kaah ti ŋa ke bin lagin tab ki tan ka kinyaŋin ki yi tab ke:

17‘Ti pee iwol ki tenn ni,

le naa waa.

Le ti mɔr tikpemɔr ki tenn ni,

le naa fabin ni!’

18Nan bu-n Jɔnn nan dan le ki lolig bimɔb, kaa nyu ndaami, le bi ke, ‘U waar le.’ 19Le Uninfosaal a Big nan foon ki ji ki nyu, le bi ji ke, ‘Bin lig, u ye ujijir le nin udanyugbeer, ki ji ye bilanpogaab nin tibirdam a jɔ.’ Amaa nlangɔr kaam le wɔɔn mi bamɔn.”

Ban kaa ŋa yada nan a tim

(Lug 10:13-15)

20Le Yisa piin ki pag ki bii ntim man nan kan u garil a toon gbingbemi yan wee u tun ni, nan bu-n baah nan kpenn bi binbemin. 21“Woo Korazin yaab; woo Befisada yaab, ni ye ligaril a toon gbingbemi nan, nan bi tun Taya nin Sidonn a timin, ke naah nan tun man ni timin nan ke, naah bi nan bi jiɛn bi toonbir weem, ki pug bi ba nfatama. 22Amaa n bei ni le, lidaal lan wee Uwonbɔr na yin ji bininfob tibɔr nan, ni tudaril na li jo Taya nin Sidonn yaab yaal. 23Ke nim Kapeniɛm yaab, Uwonbɔr na li don ni papaab baa? Aai. Ni yin jiir kitakpiin tiŋ le, ni ye ligaril a toon gbingbemi nan, nan bi tun Sodom a tiŋ ke naah tun man ni tiŋ nan ke, Sodom a tiŋ la bi li be. 24Amaa n bei ni le, tibɔr a ji daal, ni tudaril na li jo Sodom yaab yaal.”

Dan n ban ki nan foor

(Lug 10:21-22)

25Iyaayoo nmɔn le Yisa len ke, “N Baa wan ye paab nin tum a Yudaau nan, n pooriŋ, nan bu-n a ta a bɔrin ki woon bilandam nin bibiɛndam, amaa le ki kpiir ti ki wɔɔn nbuwaab finfim; 26Nn, n Baa ŋaah ban nin tun man le yen.

27“Tɔ, n Baa le wɔɔm tibɔr nan biɛn. Uba kaa nyi min Bija-n kaah ye wan ni see n Baa-n; le uba mu kaa nyi n Baa-n ni, see min, wan ye u bija nan, ke maah kpiir ki wɔɔn ban wee n ban ni.

28“Ni dan n ban ni, nim ban biɛn tu itug yan kpiɛg ki bag nan, wee n sei ni lifooril. 29Ta n daagin ki paan a ba bu, wee ki tinn n ban, nan bu-n n ye jiininbadaan le ki jɔɔ jiininba n sufu ni, wee ni naam nkan lifooril. 30Nan bu-n N nɔɔm kaa pɔɔ le n tugil kaa kpiɛgi.”

Currently Selected:

Matiu 11: KUGL

Highlight

Copy