Jɔnn 7

Yisa nin U Nabum

1Ni bɔɔn bu, le Yisa nan choon gɔnn Galilii a timin, kaa nan ban u li be Judiya, nan bu-n Juu yaab ban nan be niin ni nan si guu le ke bin ku u. 2Amaa Juu yaab a Nanbonn a Chiig a jim kaah nan nan malin, 3le Yisa a watiib nan bei u ke, “Ni ye a nya doo le ki jo Judiya, wee a bɔɔnɔɔbin fir kan ligaril a siɛram yan wee a ŋaan. 4Wan ban bininfobin biɛ waah ye wan kaa woog waah ŋaan nan ni. Ni ye a ŋaan man ke, ta a ba ki wɔɔn dulinyau.” 5Nan bu-n u baantɔɔl a watiib kaa nan ŋaa u yada.

6Mambu le Yisa nan bei bi ke, “N-yonn man wee ni ye n ŋa-n kaa laa fo; nim bu ke n-yonn biɛn ŋan le. 7Dulinya nan a ninfob kaa li fir nan ni, amaa bi nan min le, nan bu-n n ji siɛra ke bi toon ye titoonbir le. 8Nim li chaa kuchiigin na. Min kaa laa ye n jo kuchiig nmɔn yaan ni, nan bu-n min bu ke, n yaa yonni kaa laa fo.” 9Waah nan len man nin, le u nan paar ki be Galilii.

Yisa kaah nan be Tinanbonn a Chiigin man

10Amaa, u nabumin kaah nan jon kuchiigin a bɔɔn, le u mu nan woon ki jon, kaa ban bininfobin kan wi. 11Tɔ kuchiig nmɔn yaan le Juu yaab nan choon ki ban u le ki baan ke, “Uja nmɔn be laa?”

12Yisa a bɔr nan ŋuulin le kuninfogbaluŋ nmɔn yaan. Le biba ke, “U ye uninfoŋan le.”

Le biba jiin ke, “Aai, u lar bininfob le.” 13Amaa uba kaa nan pag wee bininfob gbiri, nan bu-n bi nan san Juu yaabin le.

14Kuchiig nmɔn a jim nan nan por sisiigin le Yisa nin nan jon tan kɔɔ iwonjiɛn niin a loob ki be wɔɔn bininfob. 15Ni nan gar Juu yaabin le bi baan ke, “Uja nan ŋa niin ki kan nbiɛm nan wee kaa sin ye wan tinn aa?”

16Le Yisa jiin ke, “N yaa wɔɔmin kaa ye n yaan ni. Mi nya uma wan nan tunimin ban le. 17Ni ye wan gann ke un tun Uwonbɔr a bam ke, u li biɛ ke n wɔɔnimin nya Uwonbɔr ban le bee ni ye n tɔɔl a biɛm lee. 18Wan pag u tɔɔl a bɔr ke u pag man un kan u tɔɔl a jilima le, amaa wan tun ki ban Uwonbɔr wan nan tun win kan jilima ke u ye ubamɔndaan le; waa jɔɔ igalin iba. 19Moziz kaa nan sei ni nsiimin naa? Amaa ni ni uba kaa nɔɔ nsiim nmɔn kaah len man ni. Ba ŋa ni ban ni ku maa?”

20Le kubabugin jiin ke, “Kinaanbiig le jɔɔŋ. Ŋma gbaar un ku ŋaa?”

21Le Yisa nan bei bi ke, “N nan ŋa ligaril a siɛra liba le, le ni biɛn jee. 22Ni ma biɛn yɔli, Moziz kaah nan sei ni lipunjiil a siimin (ibamɔn bu ke naa nan nyan Moziz ban ni, amaa ni yaajam ban), le ni jiil kibig a punl likpakɔɔl daal. 23Tɔ ni ye ke ni li fir jii kibig a punl likpakɔɔl daal wee Moziz a siimin laa bii ke, babu wee ni ŋuui fii n bu maah teb uninfomun likpakɔɔl daalin naa? 24Ni jiɛn kununaŋ a bɔjila, wee ki li jɔɔ ibamɔn a bɔjil.”

U ma ye Masiya-n naa?

25Libol nmɔn yaan le Jerusalam a ninfob biba nan piin ki baan ke, “Naa ye uja nan le bi gbaar ke bin ku naa? 26U ma sɔ, ki si pag bininfobin npaan nin, le baa pag u niba. Ban jɔɔ tininkper a pɔɔmin chee ke u ma sin ye Masiya waa? 27Amaa ti nyi uja nan kaah nyan kitiŋ kan; Masiya-n nan foon ke, uba kaa yin nyi waah nyan kitiŋ kan ni.”

28Yisa kaah la nan be iwonjiɛn niin nin, le u tiɛn paab npɔɔn bu ki ke, “Nn, ni nyim, le ki nyi ma nyan nan yaan. Maa dan do n baantɔɔl a pɔɔm bu, amaa wan nan tunimin le ye ubamɔndaan. Nim kaa nyi wi, 29amaa min nyi u, nan bu-n uma nan tum le n nyan u ban le ki dan.”

30Ni nan bu le bininfob ban nan be niin ni nan gbaar ban bin choo u, amaa uba kaa nan taa u nɔɔ paan u bu, nan bu-n u yonni kaa laa nan foo. 31Ni man biɛn nan, bininfob takpem ban nan be kulaguŋin yaan nan ŋa u yada. Le ki ke, “Masiya-n nan foon ke, u li ŋa ligaril a siɛram wee nin jo uja nan kaah ŋa man naa?”

Bi nan tun iwonjiɛn niin a guguubin ke bi tan choo Yisa

32Farasiim nan gbir kuninfogbaluŋin kaah ŋulin Yisa nin u garil a siɛra bu-n, le biminmanib a yudaau nin Farasiim nan tun iwonjiɛn niin a guguubin ke bin tan choo u. 33Le Yisa len ke, “N yin be ni ban n-yonn man kaa fɔg le, ki nin jo wan nan tunimin ban. 34Ni na li ban n bol, amaa naa na li kami; maah nan yin be nan yaan nin, naa na li fir foon niin ni.”

35Le Juu yaabin nin baan tab ke, “Uja nan yin jo laa wee taa li fir ban kan waa? U li jo nan yaan wee ti yaa ninfob yaal ki be Girig yaabin ni, ki tan li wɔɔn Girig yaabaa? 36Waah nan len ke, ‘Ni na li ban n bol, amaa naa na li kami, maah nan yin be nan yaan nin naa na li fir foon niin ni’ a taai yaa?”

Ikpen yan jɔɔ Nnyum man Tenn Limiɛfol

37Kuchiig nmɔn a joor daal lan ye lidaal takpenlin, le Yisa nan fii sir paab ki tiɛn npɔɔn bu ke, “Ni ye nnyunyum jɔɔ wan ke, ni che un dan n ban ki nan nyu. 38Wan biɛn ŋaam yada ke Uwonbɔr a mɔleen yin kaah nan len ke, ikpen yan jɔɔ limiɛfol a nyum li puu ki nyann u sufu ni.” 39Yisa kaah nan pag man nin, u nan len Uwonbɔr a Kasi a Naaŋ kan wee ban ŋa u yada-n na yin ga-n le. Ki nan nan kpaa n-yonn nmɔn nin, Uwonbɔr kaa la nan ta Kinaaŋin ki sei ban ŋa u yada-n ni, nan bu-n Yisa kaa la nan kan kupagi.

Bininfobin kaah nan bɔgir man

40Baah nan gbir u mɔleen yin, le bininfobin biba ke, “Ibamɔn uja nan sin ye ulinlenn nin le.”

41Le biba ke, “U ye Masiya-n le.”

Amaa le biba ji nan baan ke, “Masiya-n yin ŋa niin ki nyann Galilii? 42Uwonbɔr a mɔleen yin kaa ke Masiya-n na li nya ti baa Defid a niin yaabin nin Betiliham, kitiŋ kan wee Defid nan be-n naa?” 43Mambu bininfobin a potiɛm nan bɔgir le Yisa bu. 44Biba nan ban bin choo u le, amaa uba kaa nan ta u nɔɔ ki maa wi.

Juu yaab a Ninkper a Pɔɔm kaah kaa Ŋa Yisa Yada man

45Le iwonjiɛn niin a guguubin nan jir biminmanib a ninkpeeb nin Farasiimin ban, le bi baan bi ke, “Ba ŋaa wee naa ta u kɔɔn naa?”

46Le iwonjiɛn niin a guguubin pag npaan nin ke, “Uba kaa la nyi pag ke uja nan ni.”

47Le Farasiimin jiin ke, “Ni ban ni ke u ji lar ni mu le bee? 48Biyudamin a ni uba bee Farasiim ŋa u yada waa? 49Aai! Amaa kuninfogbaluŋ ban kaa nyi nsiimin a niba-n, limɔpool be bi bu.”

50Le Nikodimosi, wan nan chinn jon Yisa ban nin wee ki nan ye bi ni a uba-n baan ke, 51“Ti siim laa nyi ku wan wee taa chinn gbir u bɔr wee ki biɛ waah tun nan naa?”

52Le bi jiin ke, “A mu nyan Galilii lee? Lig ni poolin na, wee ki biɛ ke ulinlenn kaa nyann Galilii.”

53 # 7:53 Chinchinn a sɔbim nin nsɔbim man wee ti num gbee mu terim ki kpiɛ bitinkpegib a siɛra jib kaa jɔɔ Jɔnn 7:53—8:11. Le bi biɛn nan jir kun bi baantɔɔl a niin yin.

Currently Selected:

Jɔnn 7: KUGL

Highlight

Copy