Jɔnn 5

Yisa kaah teb uja kubiɛŋin man

1N-yonn nba a bɔɔn, le Yisa nan jon don Jerusalam ke un tan ji Juu yaab a chiig. 2Tɔ le Jerusalam a poolin kubiɛŋ nan be ki mal ntimansanmɔnn man wee bi yi ki ke Ipee a Timansanmɔmin, kubiɛŋ kan wee Juu yaab a leen Aramayig bi yi ki ke Befesida wee ki jɔɔ nnaadam miŋmu man jin kubiɛŋin ki too-n. 3Doo le kuninfogbaluŋ ban ye bibaarib nan ti dɔɔ, bijɔɔm, ndiɛm nin nwɔbim. 4#5:4 Chinchinn a sɔbim nin nsɔbim man wee ti num gbee kaa jɔɔ Jɔnn 5:4. N-yonn nba ke, Uyudaan a malaka jiirin le ki nan gbir nnyumin. Le wan chinn jiir nnyum n-yaan ke u li kan waah bu iwiɛn yan biɛn nin a tebug. 5Ubaar wan nan be niin ni nan ŋa ibin piita nin iniin kaa fir choon ni. 6Yisa kaah nan kan u dɔ niin wee ki sin gbir ke u binbem nmɔn yuurin, le u baan u ke, “A ban a kan kutebugaa?”

7Le ubaarin jiin ke, “Uninkpel, nnyum nan nan dam dam ke maa jɔɔ wan li terim wee n jiiri. N gbaar n jiir ke uba chinn jiirim le.”

8Tɔ le Yisa bei u ke, “Fii paaba! Yuur a wandɔɔnwaŋ ki li choon na.” 9Libonl nmɔn le uja-n nan kan kutebug; le ki yuur u wandɔɔnwaŋ le ki nan choon.

Lidaal lan wee man nmɔn nan ŋa-n nan ye likpakɔɔl daal le, 10mambu le Juu yaabin nan bei uja wan nan kan kutebugin ke, “Ni ye likpakɔɔl daal le; nsiimin kaa chee nin a tu a wandɔɔnwaŋin.”

11Amaa le u jiin ke, “Uja wan che n pɔɔgin beim ke, ‘Yuur a wandɔɔnwaŋ ki li choon na.’ ”

12Mambu le bi baan u ke, “Udaan ye ŋmiɛ wee ki beiŋ ke a taa a wandɔɔnwaŋ ki li choon naa?”

13Uja wan nan kan kutebugin kaa nan nyi wan ye wi, nan bu-n Yisa nan ŋmarin kubabug nmɔn yan ki bora.

14Lidaal nmɔn a bɔɔn le Yisa nan ban kan u iwonjiɛn niin le ki bei u ke, “Lig, a pɔɔga. Jiɛn tibir a tuma, naa ye man ke nan bir jon man li fir kaŋ.”

15Le uja-n nan fɔr niin le ki nan tan bei Juu yaab ke Yisa li nan che u kan kutebug. 16Yisa kaah nan teb uja-n likpakɔɔl daalin bu, le Juu yaab nan piin ki mugir u. 17Le Yisa bei bi ke, “N baa le tun U toon le ki nan kpaa dinan, le n mu, tɔɔl, tun le.”

18Yisa kaah nan len man nin bu le Juu yaab nan walin npɔɔn bu ke bin ku u; baa nan yin ku u ke waah bii likpakɔɔl daal a siimin a binba bu, amaa ke u le ji yi Uwonbɔr le ke u Baa, ki ke uma nin Uwonbɔr kpaa le.

Uwonbɔr sei Bija-n Tininkper a Pɔɔm

19Le Yisa nan jiin ki bei bi ke, “N bei ni ibamɔn le, Bija-n kaa li fir ŋa niba u baantɔɔli, u li fir ŋa nan wee u kan u Baa-n ŋaan le, nan bu-n niwann nan biɛn wee Baa-n ŋaan nin Bija-n mu ŋaan ni ma le. 20Baa-n kaah jiɛ Bija-n bu le u wɔɔn u nan biɛn u ŋaan. Nn, u li wɔɔn u niwann nan jon man hali ke nin gar ni. 21Nan bu-n Baa-n kaah le fiin ban kpo nkumin ki tenn bi limiɛfol man nin, man le Bija-n mu tenn ban wee u num gbee limiɛfol. 22Nan kpiɛ ye le ke, Baa-n kaa ji uba tibɔri, amaa le ki ta libɔjil ki ŋubin Bija-n a nɔɔn, 23ke bininfob biɛn li tenn Bija-n jilima ke baah tenn Baa-n jilima nan nin. Wan kaa sei Bija-n jilima ke waa sei Baa wan nan tun win, jilima.

24“N bei ni ibamɔn le, wan biɛn gbir n mɔleen wee ki ŋa Uwonbɔr wan nan tumin yada li kan limiɛfol lan kaa jɔɔ diɛm wee kaa li kpo; u lagir nkum bu ki kan limiɛfola. 25N bei ni ibamɔn le, n-yonn chaan le n-yonn nmɔn pii foon na le ban kpo li gbir Bija-n a kukɔl le ban gbir waah len man nin li kan limiɛfol. 26Ke Baa-n kaah jɔɔ limiɛfol u baantɔɔl man nin, man le u sei Bija-n npɔɔn ke u mu li jɔɔ limiɛfol u baantɔɔla. 27Le u sei u tininkper a pɔɔm ke u li ji tibɔra nan bu-n u ye Uninfosaal a Bija le.

28“Ni laa che nin ŋa ni ligarili, ke n-yonn chaan le ban biɛn be bi kaarin li gbir u kukɔl 29le ki nyann, ban ŋa nan ŋan li fii nin limiɛfol, le ban ŋa titoonbir li fii ki kpo.

Ban Jin Yisa a Siɛra

30“N binba kaa li fir ŋa niba; n ji tibɔr maah gbir man le, le n bɔjil ye ibamɔn le, nan bu-n maa ŋaan n wiib kaah ban man ni, amaa n ŋaan wan nan tumin kaah ban n ŋa man le.

31“Ni ye ke n jin n baantɔɔl a siɛra ke, uba kaa li chee ke n bɔr nmɔn ye ibamɔn ni. 32Uba li be kpiɛ le ki ji siɛra maah ban man, le n nyi ke u siɛra jil ki jiin n paam ye ibamɔn le. 33Ni nan tun ki tan baan Jɔnn na, le u nan jin n siɛra ibamɔn bu. 34Naa ye ke n gaan uninfosaal a siɛra le; amaa n pag Jɔnn a siɛra le wee ni kan feegab. 35Jɔnn le nan ye fila kan gaan ki sei ni nwonween, le ni nan gann n-yonn nba ki ji nwonween nmɔn a mɔm. 36N jɔɔ n baantɔɔl a siɛra jil ke ki kpiɛg ki jon Jɔnn kaah jin n siɛrau. Nan bu-n, litoonl lan wee Baa-n ta seim ke n tun diɛ-n, le n be tun nin, le jin siɛra ke Baa-n li nan tunim. 37Le Baa wan nan tunimin baantɔɔl nan jin siɛra n buu. Naa la nyi gbir u kukɔl bee ki kan u nunaŋi, 38le u mɔleen mu kaa kɔɔ ni sufu ni, nan bu-n naa ŋa wan u nan tun nin yada. 39Ni tinn Uwonbɔr a gbɔŋin le linunmanl ki tiɛr ke nsɔbimin bu ni li kan limiɛfol lan kaa jɔɔ diɛmi. Nsɔbim nan mu li wɔɔn siɛra maah ye wan, 40amaa nin ni ma biɛn yɔli, ni yii le ke naa yin dan n ban ki nan kan limiɛfoli.

41“Maa ban kupag bininfob ban ni, 42amaa n nyi naah ye lininfobol lan. N nyi ke naa jiɛ Uwonbɔr ni sufu ni. 43N ta n Baa a yinl le ki dan, le naa gaami; amaa ni ye ke uba ma ta u tɔɔl a yinl ki dan ke, ni li gaa u. 44Ni ye ke ni ban tab a pagim ke, ni yin ŋa niin ki ŋa yadaa, wee kaa sin pɔɔg ni ba ke ni kan kupag kan nyan Uwonbɔr uba-n ban naa? 45“Amaa ni laa tiɛr ke n li galin ni Baa-n a nintogili. Wan galin ni ye Moziz, wan bu wee ni tama be-n le. 46Ni ye ni nan bi ŋa Moziz yada ke, ni bi li ŋaam yada, nan bu-n u nan sɔb n bɔra. 47Amaa naah kaa nan ŋa waah nan sɔb nan ni yada-n, ni yin ŋa nii ki ŋa maah len man nan yadaa?”

Currently Selected:

Jɔnn 5: KUGL

Highlight

Copy