Jɔnn 3

Yisa nin Nikodimosi

1Uja uba le nan be ki ye Farasii a ninfou le u yinl ye Nikodimosi, u nan ye Juu yaab a yudam a laguŋ a ni uba le. 2Daal liba a nyiɛg le u nan dan Yisa ban le ki nan ke, “Rabbi, ti nyi ke a ye wan wɔɔnn le ki nyann Uwonbɔr ban. Nan bu-n uba kaa li fir ŋa ligaril a siɛram yan wee a ŋaan nan wee naa ye Uwonbɔr le be u ban ni.”

3Le Yisa jiin ki bei u ke, “N beiŋ ibamɔn le, uba kaa li fir kan Uwonbɔr a naami, see ke bi ji ma u.#3:3 bin ji maa win wɔɔn ke un kpenn u binbem.”

4Le Nikodimosi baan u ke, “Bi yin ŋa nii ki ji maa uninkpelaa? Ibamɔn waah ji li fir jir kɔɔ u na a poolin wee bin ji maa wi!”

5Le Yisa jiin ke, “N beiŋ ibamɔn le, uba kaa li fir kɔɔ Uwonbɔr a naamin ni, see ke bi ma u nin nnyum nin Kasi a naaŋin. 6Tigbanann le maa tigbanann, amaa le Kasi a naaŋ mu maa kinaaŋ. 7Laa che nin gariŋ nin maah len ke, ‘Ni kpaa le ke bi maa ni jigin nni.’ 8Kutafaag daar chaa kaah ban nan paam le. A gbir ki fur le, amaa ŋaa li fir biɛ kaah nyan nan paam bee kaah chaa nan paami. Man le ye ni ki sei ban biɛn wee bi maa bi Kinaaŋin ni.”

9Le Nikodimosi baan ke, “Ni li fir ŋaa nan naa?”

10Le Yisa ke, “A ye Iziral yaab a wan wɔɔnn le, le ŋaa biɛ ni nan naa? 11N beiŋ ibamɔn le, ti pag taah nyi nan le, le ki ji siɛra taah nan kan nan bu, amaa ni ma biɛn nan yɔli naa ŋa ti siɛra nmɔn yada. 12N pag nan ŋaan dulinya nan yaan le ki seiŋ le ŋaa ŋa yada; ni ye n nin pag nan ŋaan papaab ke a yin ŋa nii ki ŋa yadaa? 13Uba kaa be ki nyi don paabi, sei uninfosaal a bija wan nan nyann paabin. 14Moziz kaah nan yuur liwaalabil paab kukunkɔɔgin man nin, ni kpaa le nin bi nan yuur uninfosaal a bija mu paab, 15wee wan biɛn ŋa u yada ke u li kan limiɛfol lan kaa jɔɔ ndiɛmi.

16Mambu Uwonbɔr kaah jiɛ dulinya nan kagin bu le u ta u bija gaŋ sei ti, ke wan ŋa u yada ke waa li kpo, amaa u li kan limiɛfol lan kaa jɔɔ ndiɛmi. 17Uwonbɔr kaa nan tunn u bija dulinya nan yaan ke un nan bii dulinya le, amaa u bu le dulinya yaab li kan feegab.

18Waa yin bii wan biɛn ŋaa u yada, amaa wan biɛn kaa ŋaa yada pii si nbiimin le nan bu-n waa ŋa Uwonbɔr a Bija gaŋin yada. 19Ni nan le ye Uwonbɔr kaah len man: Nwonween dan dulinya nan yaan na, amaa bininfob jiɛ libunbɔnl le ki jon nwonween, nan bu-n bi toon biɛn nan ye tibir le. 20Wan biɛn tun tibir a toon ke u nan nwonween le, le kaa yin dan nwonween nin ni ki san ke u bir li nya npaan nin bu. 21Amaa wan biɛn be nin ibamɔn nin ke u chaan nwonween nin le, wee bin kan npaan nin ke waah ŋa man nin u ŋa Uwonbɔr a pɔɔm bu le.

Yisa nin Jɔnn

22Ni bɔɔn bu, le Yisa nin u bɔɔnɔɔb nan jon Judiya a tiŋ paamin, nan yaan wee bi la nan tan be nin bi, ki fu bininfob Uwonbɔr a nyunful. 23Jɔnn tɔɔl nan fu bininfob Uwonbɔr a nyunful le Anon kan mal Salim a tiŋin, nan bu-n nnyum takpem le nan be niin, le bininfob nan ti chaan u ban le u fu bi Uwonbɔr a nyunful. 24(Ni nan ŋa keh Jɔnn kaa la kɔɔ kuloondiigin ni.)

25Limɔkpel le nan dan Jɔnn a bɔɔnɔɔb biba nin Juu a ninfo uba a sisiigin ki ta jiin liwonjiɛnl a kaal a ŋunnim paam. 26Le bi nan dan Jɔnn ban ki nan bei u ke, “Wan wɔɔn, uja wan nan be a ban Jɔdann a kpendoolin, wan a siɛra wee a nan jin nin, lig u nin fu bininfob le Uwonbɔr a nyunful, le bininfob biɛn chaa u ban.”

27Le Jɔnn jiin ki len ke, “Uninfo le li fir gaa nan nyan paab ki tenn u le. 28Nim baantɔɔl le fir ji siɛra ke n nan len ke, ‘Maa ye Masiya-n ni, amaa Uwonbɔr nan chinn tun min le, le u nin ŋɔɔrin.’ 29Lipiichanil daan li ye upii wan wee bi chann ni. Lipiichanil daan a jɔ wan dan u ban nin si guu u le ki sin pelig, le ki nan gbir Lipiichanil daan a kukɔl ke u pool nsɔŋ. Nposɔɔn nmɔn ye n yaan le, mambu n gbee nin nposɔɔn na. 30Ni kpaa le ke u yinl ndon; ki kpaa le ke n mu a yinl njiir.

U ma Wan Nyann Paabin

31“Wan nyann paabin le jon ni biɛn; wan nyann tumin ye tum yaau le, le ki pag ke wan nyann tumin. Wan nyann paabin le jon ni biɛn. 32U jin waah nan kan nan ki gbir nan a siɛra le, amaa uba kaa gaa u siɛra nmɔn ni. 33Uja wan nan gaa siɛra-n u chee ke Uwonbɔr ye ubamɔndaan le. 34Nan bu-n wan wee Uwonbɔr nan tun nin pag Uwonbɔr a mɔbonl le, nan bu-n Uwonbɔr gbeen u Kinaaŋ le. 35Baa-n kaah jiɛ Bija-n bu le u ta niwann biɛn ki ŋa u nɔɔn. 36Wan le ŋa Bija-n yada ke u li kan limiɛfol lan kaa jɔɔ diɛm, amaa wan yii Bija-n ke waa li kan limiɛfoli, nan bu-n Uwonbɔr a ŋuufiiŋ yin gbaa be udaan bu le.”

Currently Selected:

Jɔnn 3: KUGL

Highlight

Copy